Македонија
Сончево и многу топло, максималната температура до 40 степени

Времето денеска ќе биде сончево и многу топло. Ќе дува слаб до умерен ветер од југоисточен правец. Минималната температура ќе биде во интервал од 12 до 21, а максималната ќе достигне од 32 до 40 степени.
Во Скопје сончево и многу топло со слаб до умерен ветер од југоисточен правец. Минималната температура ќе се спушти до 17, а максималната ќе достигне до 39 степени.
Времето во наредните денови
Под влијание на многу топла воздушна маса во текот на оваа седмица ќе се задржи сончево и топло време со умерена облачност во текот на денот. Ќе дува слаб до умерен ветер од југоистоичен правец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски најави бесплатен оброк за сите ученици од прво до четврто одделение од следната година

Градоначалникот на Општина Центар Горан Герасимовски, утрово го посети општинското основно училиште „Киро Глигоров“ за да им посака успешен старт на првачињата и сите ученици по повод првиот ден од новата учебна година.
Во своето обраќање, тој информираше дека од следната учебна година, се воведува бесплатен оброк за сите ученици од прво до четврто одделение.
„Денеска, првачињата го започнуваат своето најважно патување, најубавиот дел од животот. Ќе стекнуваат нови другарства, ќе го осознаваат светот околу себе. Денеска, за нив е најважниот ден. Ние, повозрасните имаме обврска да ги создадеме условите, да направиме се’, за нашите првачиња и сите ученици, бидат среќни, задоволни и да станат успешни и вредни личности, кои ги делат вредностите на почитта, разбирањето, помошта и солидарноста, вредностите на своите родители и предци. Сакам одговорно и директно да Ве информирам дека од следната учебна година, воведуваме бесплатен оброк за сите ученици од 1 до 4 одделение. Здрав, правилен и обилен оброк за сите 2500 ученици од прво до четврто одделение, кој ќе го обезбедува Општината“, рече Герасимовски.
Тој, потенцираше дека за сите ученици од петто до деветто одделение, се воведува бесплатна екскурзија, насловена како „Ја сакаме Македонија“ преку која учениците ќе ги видат во неколку дена сите природни, историски и културни убавини и вредности на нашата сакана Македонија.
„Сакаме на сите деца да им дадеме можност да бидат дел од подобрата македонска иднина, како успешни личности кои ги сакаат, почитуваат и негуваат македонскиот јазик, култура и минато. Ја видовме гордоста денес, кога нашите ученици го подигаа македонското знаме, и знам дека мора да им помогнеме уште посилно да ја сакаат својата држава. За сите ученици кои имаат потреба, воведуваме бесплатна дополнителна поддршка, особено во природните науки, преку ангажирање на пензионирани наставници и професори, кои ќе бидат на располагање за полесно и адекватно, и основно, но и напредно, совладување на знаењата“, истакна Герасимовски.
Герасимовски, изјави дека се воведува и бесплатно користење на базен, во рамки на постоечкиот базен во едно од училиштата во Центар, кој целосно ќе се реновира, и до крајот на годината се започнува со изградба на уште еден затворен базен во друго основно училиште. Сите овие активности се планирани, подготвени и веќе на крајот на оваа година ќе бидат составен дел на општинскиот Буџет и новите Програми.
„Како Градоначалник на Општина Центар, Ве уверувам дека вашите првачиња, заедно со сите ученици, ќе учат во најдобрите основни училишта во градот и државата. Ве уверувам дека ги овозможивме најдобрите технички услови за образование, и во сите училишта имаме највисоки стандарди за образовниот процес, за хигиената, за исхраната, за безбедноста, за новите наставни техники, најважно имаме прекрасни и високо способни наставници. И оваа година, како и претходните, за првачињата обезбедивме нови ранци и училишен прибор. Од оваа учебна година, за првпат, обезбедивме и униформи, за да нашите ученици се чувствуваат удобно, но и еднакво помеѓу себе. Сакаме нашите ученици со гордост да ја чувствуваат припадноста кон своето училиште и кон општината Центар во која живеат“, посочи Герасимовски.
Македонија
Тошковски: Почеток на регионална обука за распоредување на службени кучиња на тешко пристапни терени

Министерот за внатрешни работи Панче Тошковски денеска во Регионалниот К9 центар за обука и сертификација во полицискиот центар во Ѓорче Петров присуствуваше на почетокот на регионалната обука за распоредување на службени кучиња во тешко пристапни терени, која се спроведува во рамките на проектот “Поддршка на националните власти во намалувањето на ризикот од пролиферација и злоупотреба на мало и лесно оружје“.
Тошковски потенцираше овој проект не е само почетокот на стандардна професионална обука туку пример за успешна меѓународна соработка, на партнерство засновано врз доверба, заеднички цели и посветеност кон зголемена безбедност на локално, регионално и глобално ниво.
„Пред единаесет месеци од истово место бевме сведоци на почеток на работата на Регионалниот К9 центар за обука и сертификација-значаен дел од целокупниот систем на безбедност како на оперативно, така и на стратешко ниво. Во изминатата речиси една година центарот беше домаќин на голем број на работилници, обуки и тренинзи. Соработката на нашата институција со Мисијата на ОБСЕ претставува еден од носечките елементи во процесот на надградување на капацитетите на полицијата по стандардите на Европската Унија“, потенцираше Тошковски.
Тој нагласи дека целта на министерството е иднината на овој центар е истиот да прерасне во регионален центар во областа на зајакнување на капацитетите на агенциите за спроведување на законот, преку современи обуки и пренос на експертиза во користење на службените кучиња.
„ Службените кучиња се посебен дел од нашите безбедносни системи. Тие не претставуваат алатка, туку истите се партнери и дел од полицијата, кои со својата обученост имаат непроценлива улога во спасувањето на животи. Во многу случаи, нивната реакција е пресудна за успех на целата акција. Но зад секое службено куче стои полициски службеник, тренер и институција. Поради тој факт знаеме дека вложувањето во капацитетите на единиците за службени кучиња е вложување во поголема безбедност за сите нас“.
Тошковски се заблагодари на ОБСЕ и нашите меѓународни партнери и потенцираше дека раководството на министерство останува цврсто посветено во градење на систем за безбедност кој ќе биде гаранција за напредокот на нашата држава и сигурноста на граѓаните.
Македонија
Бошковска: Обезбедени се сите учебници, следува покачување на платите во образованието

Подготвено ја започнуваме новата учебна 2025-2026 година. На сите ученици, на наставниците, стручните соработници им посакуваме многу успеси и нови достигнувања. Владата предводена од ВМРО – ДПМНЕ се погрижи да бидат обезбедени сите услови за квалитетна настава, истакна на прес-конференција Емилија Бошковска од ВМРО-ДПМНЕ.
„Обезбедивме учебници за сите ученици. Истите се испорачани веќе во училиштата, а за прв пат нови учебници ќе има за странските јазици, нешто што ни недостасуваше во изминатите 7 години.
Инфраструктурните услови се доста подобрени и продолжуваат да се подобруваат. Владата и Министерството вложија 67 милиони евра во изградба на нови училишта, спортски сали и во реконструкција на постојните објекти. Во поголем дел од училиштата поставена е модерна информатичка опрема, вклучително и опрема за мрежно поврзување и безбеден интернет“.
Како што нагласи, вештачката интелигенција станува дел од наставните содржини. За таа цел, додаде Бошковска, изготвено е упатство за наставници и ученици, за етичка примена на вештачката интелигенција за образовни цели.
„За прв пат во средните училишта се ангажираат 130 образовни асистенти кои ќе им помагаат на учениците со посебни образовни потреби. Во основните училишта ќе има над 1300 образовни асистенти, а воведено е и формално образование за децата кои се на подолго болничко лекување на детските клиники со што тие повеќе нема да губат настава.
Надлежното министерство стави во употреба и нов електронски дневник, далеку посовремен и пофункционален од претходниот“.
Бошковска потенцира дека откако Владата предводена од ВМРО – ДПМНЕ го започнала својот мандат, наставниците добиле зголемување на платите од над 12 проценти. Следното покачување според неа, ќе изнесува помеѓу 7,5% и 10%, во зависност од степенот на инфлација, а ќе се случува во текот на учебната година, поточно во март 2026та година.
„Го враќаме достоинството на наставниците со јасен план и потпишана спогодба за раст на платите во секоја година од мандатот.
Расте поддршката кон учениците, преку зголемени квоти на стипендии и покривање на трошоците за учество на меѓународни научни олимпијади.
Образованието е приоритет за оваа Влада и за ВМРО – ДПМНЕ. Буџетот за овој ресор годинава е најголем досега и изнесува речиси 40 милијарди денари, односно за 6 повеќе од лани. Застојот од изминатите 7 години е откочен. Промените се интензивираат, се следат глобалните трендови и стандарди, а квалитетот се зголемува“.