Македонија
Сопствениците на ресторани за свадби со тричасовна блокада на булеварот во Автокоманда

Сопствениците на ресторани за свадби во знак на протест од 14 до 17 часот ќе го блокираат булеварот Александар Македонски во Автокоманда.
Сопствениците на рестораните за свадби, крштевки и други веселби бараат Владата да ја укине забраната за нивна работа и да донесе протокол за вршење на нивната дејност пред сезоната за венчавки. Тие апелираат до Владата да не ги држи во неизвесност илјадниците младоженци и оваа сезона како и претходната.
ЈСП информира дека поради најавениот протест и блокада на крстосницата на булеварот Александар Македонски со улицата Интернационални бригади, возилата од линиите што сообраќаат во посочениот реон ќе бидат пренасочени.
По изменета траса од вообичаената ќе возат:
Линија 2 во правец од Сарај кон Автокоманда ќе биде скратена до кружниот тек кај „Континентал“, а по истиот режим возилата ќе сообраќаат и во обратна насока.
Линиите 2А и 16 во правец од Сарај и Пржино, од Бит-пазар ќе продолжуваат кон Чаир и по улицата Ферид Бајрам кон Железара до кружниот тек кај стадионот на Металург.
Во правец кон Сарај и Пржино возилата ќе возат по истата траса, од постојката кај стадионот на Металург.
Линиите 13 и 42 во правец од Кисела Вода и Драчево од подвозникот кај кланица, ќе вртат лево кон „Пивара“, па од ЈСП до постојката кај „Алкалоид“.
Во правец кон Кисела Вода и Драчево возилата ќе тргнуваат од „Алкалоид“.
Линиите 43 и 50 од Дом на печатот и Клиничкиот центар, после Работничкиот дом, ќе возат по улицата Кеј 13 Ноември кон населбата Јане Сандански, па по булеварите Србија и Киро Глигоров преку надвозникот во Автокоманда до крајните станици.
Во обратна насока, од улицата Јужноморавски бригади и Хиподром, преку надвозникот во Автокоманда, булеварите Србија, Киро Глигоров и Јане Сандански кон НБРСМ, па кон МАНУ, односно МНТ, ќе продолжуваат по редовните траси.
Линиите 45, 52, 53, 54, 55, 55А, 55В, 62, 63, 65, 65Б, 66, 66А и 68 од Автокоманда кај „Макпетрол“ ќе продолжуваат по надвозникот преку булеварите Киро Глигоров, Србија и Јане Сандански до крајните постојки на Транспортен центар.
Посожениот режим ќе важи и во обратна насока на сообраќање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски разговараше со бугарскиот колега: Македонија останува посветена на европскиот пат

Министерот за надворешни работи и надворешна трговија, Тимчо Муцунски, денеска оствари телефонски разговор со својот бугарски колега, министерот за надворешни работи, Георг Георгиев.
Министерот Георгиев го информираше министерот Муцунски за одлуката донесена од страна на бугарското Собрание, која се однесува на напредокот на Република Северна Македонија во процесот на пристапување во Европската унија.
Во разговорот, министерот Муцунски ги повтори принципиелните позиции на нашата земја поврзани со процесот на евроинтеграција. Притоа, ја нагласи подготвеноста на државата за натамошно унапредување на соработката со Бугарија во насока на градење поголема меѓусебна доверба, во интерес на граѓаните.
„За таа цел, подготвени сме да продолжиме со активен придонес во градењето доверба заснована на принципиелност и заемно почитување“, рекол Музунски, информира МНР.
„Како соседи и НАТО-сојузници, двете земји имаат заедничка обврска, ориентирани кон иднината, да продолжат да развиваат односи засновани на европски принципи“, рекол тој.
Во таа насока, министерот Муцунски уште еднаш ја потенцираше нашата посветеност на европскиот пат, кој не треба да биде обременет со билатерални прашања.
„Владата посветено работи на реформската агенда и на исполнување на Копенхашките критериуми, кои треба да бидат единствен услов за членство на земјата во Европската унија“, рекол Муцунски.
Македонија
Герасимовски: Исцрпени средствата за велосипеди, повикот за дополнителна опрема сѐ уште е во тек

Општина Центар информира дека се исцрпени средствата за субвенционирање на велосипеди, електрични велосипеди и е-тротинети во рамки на јавниот повик „Цел Центар на точак“.
„Проектот „Цел Центар на точак“ е потврда дека центарци се подготвени да направат вистински избор за поеколошки и поодржлив начин на движење низ градот. И овојпат интересот беше толку голем што за кратко време се искористија средствата. Ова е доказ дека сме на вистинскиот пат,“ порача градоначалникот Горан Герасимовски.
Од вкупно предвидените 600.000 денари, субвенционирани се 197 жители на Општина Центар, додека јавниот повик за субвенционирање на дополнителна опрема останува активен.
Овој долгогодишен и популарен проект предвидува субвенции за купување велосипед, електричен велосипед или е-тротинет, во износ од 30% од цената, но најмногу до 3.000 денари, како и субвенции за набавка на дополнителна опрема,, во износ од 30% од цената, но не повеќе од 1.000 денари, велат од општината.
Под дополнителна опрема се подразбираат: детско седиште, заштитна кацига, светло, катадиоптри, ѕвонче, безбедносна сајла, катанец и други елементи што го зголемуваат нивото на безбедност при користење.
Македонија
Македонската дипломатија нема да биде ничија партиска сопственост, одговори МНР по прозивките од СДСМ

Македонската дипломатија не е, и нема да биде ничија партиска сопственост. По години на политичка злоупотреба, ја враќаме дипломатијата на државата, институционално, професионално и во согласност со законот, реагираат од МНР по прозивките од страна на СДСМ кои на прес -конференција кажаа дека Муцунски и ВМРО-ДПММЕ ја узурпираат дипломатијата.
„Автентичното толкување на член 39 став 3 од Законот за надворешни работи е легитимна, уставно заснована постапка, донесена од Собранието – единствениот орган со надлежност за толкување на законите. Министерството нема ниту овластување, ниту влијание врз овој процес.
Членот на Комисијата за надворешни работи од СДСМ, Фатон Бејта, го упатуваме на предметот Уставно право на кој било правен факултет во државата, каде што ќе може да се потсети дека државата се темели врз начелото на поделба на власта – законодавна, извршна и судска.
Целта на ова толкување е да се воведе дополнителен демократски филтер и јавна отчетност при изборот на амбасадори – не да се одземе уставната надлежност на Претседателот, туку да се зајакне транспарентноста пред граѓаните.
Собраниската процедура, спроведена пред Комисијата за надворешни работи составена од пратеници од сите политички партии, е доказ за инклузивност и независност на процесот.
Наместо да одржуваат безпредметни прес-конференции, СДСМ треба да одговори зошто нивните амбасадори со години беа апатични, невидливи или отворено политизирани, а именувањето на дел од нив беше спроведено спротивно на Законот за надворешни работи“.
Нашата цел не е партизација, велат од МНР, туку системска професионализација.
„За првпат по долг период се воспоставуваат јасни критериуми, јавни постапки и механизми за унапредување на кариерните дипломати. Најсилна потврда за ова се измените на Законот за надворешни работи, кои неодамна беа усвоени во Собранието, а чија главна цел е токму професионализацијата на дипломатијата.
Амбасадорите што чесно и професионално ја извршувале својата функција немаат од што да се грижат. Но оние што амбасадите ги третираа како партиски трофеи, нивниот мандат завршува“.
Оваа влада, се нагласува во реакцијата од МНР, гради модерна, отчетна и компетентна дипломатија, со амбасадори што ја претставуваат државата, а не партијата.