Македонија
Состанок на лидерите од Западен Балкан: Добрососедските односи донесоа повеќе придобивки

Третиот состанок за унапредување на соработката меѓу земјите од Западен Балкан што денеска се одржува во Тирана, започна со работниот дел на кој премиерот Зоран Заев, премиерот на Албанија, Еди Рама, и претседателите на Црна Гора и Србија, Мило Ѓукановиќ и Александар Вучиќ, го разгледаа напредокот на спроведување на четирите слободи во регионот, утврдени на претходните два состанока во Охрид и Нови Сад.
Лидерите заклучиле дека духот на инклузивност и на добрососедските односи што го поттикнаа овој процес донесе повеќе придобивки од непосреден интерес на граѓаните во регионот.
Трагедијата предизвикана од земјотресот во Драч поттикна взаемната поддршка при природни катастрофи и вонредни состојби да биде вклучена како уште еден столб во унапредувањето на соработката во регионот, и во таа насока во февруари во Белград, надлежните институции на секоја од земјите од Западен Балкан ќе го потпишат документот Протокол од Драч за соработка на дирекциите за заштита и спасување.
Со поттик од иницијативата за соработка во регионот, завршија преговорите меѓу Република Србија и Северна Македонија и наскоро ќе започне градбата на новиот граничен премин Лојане – Миратовац, до следниот состанок на оваа иницијатива во Белград, царинските дирекции на Северна Македонија и на Албанија ќе го потпишат договорот за One Stop Shop за граничниот премин Ќафасан, каков што имаме со Србија на граничниот премин Табановце.
Главната цел на овие One Stop Shop, односно гранични контроли со едно застанување наскоро да станат Нон Стоп Шоп, односно премини без застанување, и како придонес за остварување на оваа постапка ќе биде и воведувањето на бесхартиен систем кој ќе ги поедностави царинските постапки.
Во таа насока за истакнување се и неодамнешните одлуки донесени во рамките на ЦЕФТА, за време на претседателството на Албанија, особено одлуката за автоматско признавање на овластени економски оператори, и унифицирањето на процедурите за работни дозволи за сите граѓани во сите држави во регионот.
Лидерите на земјите учеснички и на оваа средба го реафирмираа ставот дека оваа иницијатива има за цел да ја забрза соработката за да се олесни и забрза процесот на европска интеграција на секоја од земјите од Западен Балкан, и дека таа е отворена за сите 6 земји во регионот.
На состанокот во Тирана лидерите од Западен Балкан позитивно го оценија охрабрувањето на Европската Комисија, на политичките и финансиските институции на ЕУ, на Регионалниот совет за соработка, како и на Светската Банка, и другите приврзаници на европската перспектива на регионот за поддршката во спроведувањето на иницијативите што произлегоа од овој процес.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова: Цинизам и хипокризија е да барате од некого да биде отпорен на трети влијанија, оставајќи го пред портите на Европската Унија

Претседателката Гордана Сиљановска-Давкова денеска се обрати на годинешната средба на земјите учеснички во „Процесот Брдо-Бриони“, којашто се одржа во Драч, Република Албанија.
Укажувајќи на неодржливоста на предолгото чекање на Западен Балкан пред портите на Брисел, заради насушната потреба од проширување на ЕУ со сите европски држави во функција на зајакнување на нејзината улога, како и заради зголемување на отпорноста на трети влијанија, Сиљановска-Давкова истакна дека е цинизам и хипокризија да барате од некого да биде отпорен на трети влијанија, оставајќи го пред портите на Европската Унија.
Претседателката потенцираше дека годинава, за разлика од лани, Декларацијата е усвоена со консензус на лидерите на земјите учеснички во „Процесот Брдо-Бриони“.
За неа, соработката е неопходна заради решавање на заедничките проблеми, како: егзодусот на младите, опасноста од стагнирање на економијата и надминување на безбедносните предизвици.
„Верувам во добрата волја, верувам во добрите намери, верувам во посветеноста на Хрватска и Словенија на процесот и нивната посебна одговорност кон регионот и неговото забрзано чекорење кон ЕУ“, заклучи претседателката Сиљановска-Давкова.
Иницијатори на „Процесот Брдо-Бриони“ се Република Хрватска и Република Словенија. Во процесот, покрај нас, вклучени се и: Република Црна Гора, Република Србија, Република Албанија, Босна и Херцеговина и Косово.
Претседателите на овие земји се состануваат најмалку еднаш годишно. Следниот состанок ќе се одржи во Република Хрватска.
Македонија
(Видео) Мемов: Дебар Маало е претворено во жртва на урбаното дивеење, Герасимовски е градоначалник со невино лице, без глас

Движењето ЗНАМ – За Наша Македонија на денешната прес-конференција објави уште еден, како што велат, урбанистички скандал во општина Центар.
Според портпаролот, Никола Мемов, Дебар Маало, симболот на култура, урбана традиција и живеење со душа во срцето на Скопје, денес е претворено во жртва на урбаното дивеење и апсолутната незаинтересираност на градоначалникот на Општина Центар, Горан Герасимовски.
„Пред само 2–3 недели никна нова нелегална градба, односно ресторанот „Мечка“ се прошири буквално преку ноќ, на простор кој е јавен: на тротоарот, па дури и зафаќајќи дел од коловозот.
Узурпиран е простор наменет за пешаци и за движење на граѓаните, простор кој треба да биде за сите, а сега е дел од приватен бизнис“, рече Мемов и запраша:
„Кој го дозволи ова? Кој дозволи во срцето на Дебар Маало, на неколку чекори од улицата „Орце Николов“, а на само 200 метри од кабинетот на самиот градоначалник, да се узурпира јавен простор и да се изгради дел од објект?
Дали воопшто градежниот инспекторат на Општина Центар постапил на терен?
Дали постои било каков документ, одобрение или решение – или ова е типичен пример на дивоградба, „пуштена“ да никне преку ноќ?
Дали ова е Општина Центар или Див Запад, каде секој си гради што сака и каде сака?
Кој ќе ја понесе одговорноста што објектот и понатаму стои, како симбол на беззаконие и селективна правда“.
Мемов потенцира дека ова не е прашање кое може градоначалникот Герасимовски да го сокрие со молк, затоа што се случува на улица, пред очите на сите и како што рече тој, и пред очите на Герасимовски, бидејќи тој секојдневно се вози со неговиот скап велосипед по улицата „Дане Крапчев“.
„Ова е буквално во Вашето маало, на неколку чекори од Вашиот дом.
Па, ако тука не реагирате, како граѓаните да веруваат дека ќе реагирате воопшто.
Ова е срамота. Ова е слика на една неспособна и незаинтересирана општинска власт, карактеристична за владеењето на СДСМ.
Жителите на Дебар Маало секој ден гледаат како јавните површини се претвораат во приватни имоти. Како зеленилото исчезнува. Како тротоарите се претвораат во маси и тераси. Како јавниот интерес исчезнува, а на негово место никнуваат бетон, стакло и пари.
Го прашуваме актуелниот градоначалник Герасимовски:
-Како ќе им погледнете во очи на вашите соседи, на луѓето со кои живеете во иста населба, од кои имено барате и поддршка за втор мандат?
-Што ќе им кажете на жителите на Дебар Маало – дека не можете да ги заштитите ни од дивоградба под вашиот прозорец?
Дека не сте виделе што се гради на само 200 метри од вашата канцеларија?“
Тоа што го гледаме денес, вели Мемов е деградација, потценување и отворено понижување на жителите.
Тој потенцира дека ова не е само проблем со една дивоградба кај националниот ррсторан „Мечка“, туку ова е симбол на начинот на кој четири години се владее во Центар.
Македонија
Медицинските сестри бараат да бидат слушнати, реагираат дека не биле поканети на јавна расправа со министерот

Унијата на медицински сестри бараат да бидат слушнати, реагираат дека не биле поканети на јавна расправа со министерот иако, како што велат од таму, претходно им било ветено дека ќе бидат вклучени во истата.
„Како претседател на најголемата и најактивна унија на медицински сестри во државата, остро реагирам на начинот на кој денес беше организирана јавната расправа поврзана со прашања што директно ги засегаат медицинските сестри.
Иако имавме официјална средба со министерот за здравство, на која јасно се договоривме Унијата на медицински сестри, предводена од здружението ЗМСТАС „За-нас“, да биде вклучена во работните групи, денес не бевме поканети. Ова го сметаме за директно игнорирање на реалните потреби и гласот на професионалците кои секојдневно се на терен и го носат товарот на здравствениот систем“, вели претседателката на Унијата, Гордана Бешлиовска.
Таа додава дека медицинските сестри заслужуваат да бидат слушнати — не преку формални претставници, туку преку вистински, активни и професионално организирани тела, каква што е нашата Унија.
Бешлиовска бара објаснување зошто е прекршен договорот со министерот и бара итно вклучување на легитимни и активни претставници на медицинските сестри во сите идни работни групи и јавни расправи.
„Апелираме до институциите да престанат со формални и политички решенија кои ја маргинализираат сестринската професија. Особено разочарува фактот што токму овие денови, додека државата нè игнорира, медицинските сестри од Македонија испишуваат историја. Овој викенд, во Струга, се одржа четвртиот меѓународен конгрес на медицинските сестри и Регионалната ЕСНО конференција, со повеќе од 80 предавања и со присуство на еминентни имиња од регионот, Европа и САД. Тоа беше настан од највисоко професионално и научно ниво, кој уште еднаш ја потврди посветеноста, компетентноста и лидерството на македонските медицински сестри на меѓународната сцена“, вели Бешлиовска.