Македонија
Соња Симовска избрана за в.д. државен јавен обвинител: „Таа е вистински професионалец“, рече претседателката на Советот на јавните обвинители

Едногласно со девет гласа „за“, Советот на јавните обвинители ја избра Соња Симовска за в.д. државен јавен обвинител. Таа ќе го наследи Љубомир Јовески.
Според нив, Симовска е најсоодветна да ја извршува оваа функција сѐ до именувањето јавен обвинител на Република Северна Македонија.
„Јавниот обвинител Соња Симовска, која на денешната седница на Советот на јавните обвинители е определена за вршител на функцијата до именувањето јавен обвинител на Република Северна Македонија, е обвинител што има долгогодишно искуство, докажана е во својата професија како вистински професионалец, ги познава добро состојбите во Јавното обвинителство. Таа поседува и менаџерски способности, сметаме како членови на Советот дека јавниот обвинител Соња Симовска успешно ќе ја извршува функцијата до именувањето јавен обвинител на Република Северна Македонија“, изјави претседателката на Советот на јавните обвинители, Душица Димитриеска.
Како што објасни Димитриеска, барањето за давање мислење е пристигнато во Советот на јавните обвинители, рокот по закон е 15 дена за Советот да даде образложено мислење, позитивно или негативно, во писмена форма за секој од кандидатите што се пријавил и кој ги исполнуваат условите во согласност со законот.
„Пријавени се тројца кандидати, Советот, по разгледување на барањето, ќе го почитува рокот и ќе го даде мислењето до Владата“, додаде претседателката.
„За вршител на функцијата јавен обвинител може да биде определен еден од јавните обвинители, кој е од редовите на Јавното обвинителство на РСМ. Еден од тие е Соња Симовска. Ние како членови на Советот ги познаваме јавните обвинители, ја следиме нивната работа. Од сите податоци достапни за јавниот обвинител на Симовска, од личното познавање на членовите на Советот и јавните обвинители, се доби впечаток кај сите членови на Советот дека таа успешно ќе ја извршува оваа функција до именувањето јавен обвинител, со оглед на нејзиното долгогодишно искуство и докажаните резултати во работењето“, одговори Димитриеска на прашањето како Советот стигнал до името на Соња Симовска за да биде избрана за в.д. државен јавен обвинител.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Пожарот кај хотелот „Њу Стар“ локализиран, ЦУК бара итни мерки за дивата депонија во Визбегово

Пожарот кој избувна во близина на хотелот „Њу Стар“ во скопската населба Визбегово е локализиран, но на терен и понатаму дежураат две екипи на Територијалната противпожарна единица на Град Скопје.
Како што информира Центарот за управување со кризи (ЦУК), во денешната интервенција биле ангажирани вкупно седум противпожарни возила и 20 пожарникари. Пожарот зафатил површина од околу 5000 квадратни метри, при што биле опожарени жито, еден магацин со градежни материјали, како и дворот на хотелот.
„Денеска, при повторно разгорување, пожарот се прошири до хотелот „Њу Стар“, како и до околните куќи, со што директно беа загрозени животите на граѓаните“, стои во објавата на ЦУК на Фејсбук.
Оттаму апелираат до сите надлежни институции и локалните самоуправи итно да се вклучат со конкретни чекори и да се стави крај на проблемот со дивите депонии, кои, според нив, претставуваат сериозна опасност по животната средина и јавното здравје.
ЦУК информира дека директорот Мухамед Али денеска испратил ново барање до надлежните институции со цел итно преземање активности за конечно решавање на овој проблем.
„Проблемот со оваа дива депонија трае подолг временски период и претставува реална закана за здравјето, безбедноста и добробитта на граѓаните, како и сериозна оперативна оптовареност за БППЗ, која често е ангажирана на истата локација“, посочуваат од ЦУК.
Оттаму потсетуваат дека во текот на изминатата недела директорот Али повеќекратно испратил официјални барања за интервенција, но засега нема конкретен одговор од надлежните.
Македонија
Мицкоски ја доби тужбата против Славјанка Петровска за клевета

Граѓанскиот суд во Скопје донел правосилна пресуда во корист на премиерот Христијан Мицкоски, утврдувајќи дека пратеничката од СДСМ и поранешна министерка за одбрана, Славјанка Петровска, јавно ширела невистини и клевети против него.
Како што информира премиерот преку објава на социјалните мрежи, судот ѝ наложил на Петровска не само да се извини, туку и да ја објави пресудата во медиумите.
„Ова е уште една потврда дека на лагата ѝ се кратки нозете. Судот потврди дека поранешната министерка и актуелна пратеничка ширела лаги и клевети против мене. Вистината мора да излезе на виделина“, напиша Мицкоски.
Тој ја искористи приликава и за поширока критика на политичката култура на неговите опоненти.
„Очигледно, лажењето како синдром на политичката култура на СДСМ не престанува да биде нивен заштитен знак. Со оваа пресуда се потврдува не само дека лажат, туку и дека не се промениле. Продолжуваат да го потценуваат народот“, порача премиерот.
Според Мицкоски, оваа судска победа не е лична, туку борба за вистината и достоинството на секој човек кој се спротивставува на политичките манипулации.
„Ова не е моја лична битка, ова е битка за принципи, за вистината, за достоинството на секој поединец кој не дозволува неказнето да му се лепат лаги“, стои во неговата објава.
Тој додава дека продолжува да работи со посветеност и дека „лагите ќе паднат, а вистината победува“.
Скопје
Град Скопје: Обвинителството го отвори првиот случај за дивоградбите во Чаир

Основното јавно обвинителство ја започна постапката по првата пријава за фалсификати поврзани со градби во Општина Чаир, информираа денеска од Град Скопје.
Според соопштението од прес-службата, истрагата се однесува на сомневања за фалсификување на документи и незаконска легализација, а се поврзува со поранешниот градоначалник на општината, Висар Ганиу.
„Основното јавно обвинителство ја започна постапката по првата пријава со фалсификатите. Таму веќе се водат уште две постапки претходно започнати за Висар Ганиу, првата за фалсификување на целата архивска книга со броеви и барања за легализации, а втората за уште еден случај каде што незаконски се легализирале објекти со соучесник“, стои во соопштението.
Од Град Скопје испратија и повик до Основното јавно обвинителство за гонење на организиран криминал и корупција, со барање конечно да започне постапка против, како што велат, „организираната криминална банда“ во Чаир.
„Очекуваме и Основното јавно обвинителство за гонење на организиран криминал и корупција да се одважи и да почне да постапува против организираната криминална банда во општина Чаир, која овозможувала градење незаконски на небезбедни згради со црни пари од нелегални извори“, велат од Град Скопје.
Во реакцијата се посочува и дека некои од лицата кои се појавуваат како сопственици на овие објекти сега се милионери, а официјално се прикажани како градители на зградите уште од пред 5, 6, 10, па и 11 години.