Македонија
Со бројни гости во свечена атмосфера, синоќа беше отворено киното во Кисела Вода
Со бројни гости, во свечена атмосфера, синоќа беше отворено киното во Кисела Вода. После 35 години, на истата локација, врз темелите на старото кино, во комплетно реновираниот Дом на култура „Билјана Беличанец“ започна да функционира “Киноверзум”. Настанот го отвори актерот Рубенс Муратовски кој, евоцирајќи спомени од минатото ја назначи важноста на овој проект за културниот живот во општината и му се заблагодари на градоначалникот за целокупниот ангажман во оваа сфера. Градоначалникот Ѓорѓиевски во своето излагање го истакна сентименталното значење на старото кино за повозрасните жители на Кисела Вода и потенцираше дека отворањето на новиот објект е историски миг за сите кои ја сакаат оваа општина. Повика на аплауз за прерано починатата градоначалничка Билјана Беличанец, која го отпочна проектот и чиј сон, како што истакна, од денес започна да живее. Говореше за сите содржини кои обновениот дом на култура ќе ги нуди, како концерти, изложби, театарски претстави, литературни читања и библиотека, а најмногу се задржа на киното, кое со атрактивниот репертоар веќе предизвика внимание кај граѓаните. Изрази надеж дека наскоро во перцепцијата на граѓаните “одиме на кино” ќе значи одиме во киното во Кисела Вода.
-За мене, а верувам и за сите вас тука присутни, ова е историски момент. После 35 години, Кисела Вода повторно добива кино врз темелите на старото кино, култно место од кое секој носи спомени и кое секогаш се појавува во приказните за нечија младост. Денес, заеднички со вас, го започнуваме новото поглавје на овој културен дом. Со нов дух и нова енергија, ги отвораме вратите на она што започна како визија на поранешната, сега за жал покојна градоначалничка Билјана Беличанец. Ова беше нејзиниот сон кој успеавме да го оствариме.
Во изминативе две години јас и мојот тим сме силно насочени кон повторното издигнување на културниот живот во нашата општина. Со бројни проекти, го олеснуваме пристапот на граѓаните до културните сцени и збиднувања, давајќи им можност и на уметниците за експресија на нивниот креативен потенцијал. Културата мора да биде достапна. Оттука во фокусот на моето делување како градоначалник е овозможувањето на непосреден пристап на граѓаните до културни манифестации, претстави, изложби и настани, кои се организираат во близина на нивниот дом, во нивното соседство. Возобновувањето на домот на култура Билјана Беличанец и отворањето на кино во Кисела Вода после 35 години се вистинска илустрација за олеснувањето на патот до културната сцена, но и за создавањето на нови платформи за уметниците каде што ќе можат да го споделат својот уметнички израз. Тие за себе добиваат нова сцена, нов дом каде што ќе можат да ја оживуваат магијата на културата. Покрај кино салата и проекциите на најновите светски достигнувања од филмскиот свет, во домот на културата Билјана Беличанец, ќе можат да се гледаат и театарски претстави, уметнички изложби, концерти, а наскоро тука ќе функционира и библиотека со богат библиотечен фонд. Секако, следејќи ја стратегијата за рамномерен развој на сите населби и населени места во општината, во периодот што е пред нас, ќе овозможиме слични културни содржини и во Домот на култура во Драчево, кој исто така беше обновен-истакна градоначалникот Ѓорѓиевски и посебно им се заблагодари на соработката на “Киноверзум”, кои како што истакна, во изминатиот период се етаблираа како силен столб помеѓу македонската културна сцена и светската филмска индустрија.
-Ланецот кина “Киноверзум” започна со работа најнапред во Свети Николе, сега работи и во Штип и во Велес, а вечерва го отвораме ова кино и во Кисела Вода, односно во Скопје. “Киноверзум” е единствен ланец на кина на Балканот кои се домашен производ, односно македoнски бренд и се надевам дека овој бренд освен во Македонија ќе го прошириме и во регионот- истакна д-р Јордан Ѓорчев, од Меѓународниот Славјански Универзитет, во чии рамки функционира “Киноверзум”.
Присутните во кино салта, потоа можеа да го погледнат светскиот филмски хит “Dune: Part Two”.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
„Влен“: Во нашата кампања, ниту еден кандидат не користел говор на омраза
„Влен“ се осврна на соопштението на Левица која претдхоно го впери прстот кон кандидатот за градоначалник на Брвеница, Хаќим Рамадани, обвинувајќи го за ширење етнички тензии и национал-шовинизам во повиците за етничко гласање.
Од „Влен“ коментираат дека со потсмев го гледаат обидот на Левица, која ја нарекоа, партија позната по говорот на омраза, анти-НАТО ставови и ултранационалистичка реторика, да држи лекции за соживот и толеранција.
„Иронијата е очигледна, токму тие што со години ја трујат јавноста со поделби и политички примитивизам, денес зборуваат за „шовинизам“. Во нашата кампања, ниту еден кандидат на ВЛЕН не користел говор на омраза, туку зборувал за патишта, училишта, водовод, економски развој, за реалните проблеми на луѓето. А вистинската иронија е што ДУИ, преку својот нов коалиционен партнер – Левица, избра да се фати за партија анти-НАТО, доживувајќи ја како последна сламка за политички спас. Таа комбинација на очај и лицемерие веќе доби одговор на 19 октомври, кога граѓаните со јасна порака им ја покажаа вратата и на едните и на другите“, велат од „Влен“.
Се додава дека тие остануваат единствената коалиција што доследно ги брани евроатлантските вредности, и секој обид да се стават на исто рамниште со екстремистички партии е смешен уште од самиот почеток.
Од „Влен“ сепак не ги искоментираа изјавите на Рамадани и повиците заедно со ДУИ да се гласа за Албанци за „да се знаело кој е газда дома“ и да се поразат кандидатите на ВМРО-ДПМНЕ со кои се во владина коалиција. Рамадани најави дека во вториот круг ќе соработува со ДУИ, партијата за која „Влен“ не штеди зборови во партиските соопштенија дека е криминална, поразена и на дното на бунарот. „Влен“ засега не се оградува од ваквите повици.
Премиерот Христијан Мицкоски претходно денес од Брвеница порача дека секој кој зборува за иднината на Македонија е добредојден како негов соговорник, а тие што шират поделби, особено етнички, не му мислат добро ниту на Македонецот, ниту на Албанецот, ниту на било кој друг наш сограѓанин. Мицкоски истакна дека со жалење го слушал сето она што Рамадани од „Влен“ го кажувал во една , како што ја нарече, егзалтирана состојба и дека направил голема грешка. Додаде дека ваквата реторика стигнала и до влијателни претставници на меѓународната заедница, така што и тие гледаат со големо жалење и со неверување на она што го слушаат, дека некој во 21 век може да користи таков речник.
Македонија
Јаневска: Секоја успешна образовна приказна започнува со наставник кој верува во ученикот
На денешната панел-дискусија во Прилеп, дел од кампањата „Магијата е во знаењето“, од различни перспективи се зборуваше за суштината на наставничката професија и за тоа што навистина значи да се биде добар учител.
Наставник што верува во секое дете, што станува глас на охрабрување, водич низ секојдневието и сојузник во учењето, токму такви примери беа во фокусот на денешната панел – дискусија што се одржа во Прилеп, во рамки на националната кампања „Магијата е во знаењето“, која ја спроведува Министерството за образование и наука.
Панел-дискусијата со наслов „Добриот наставник прво е пријател, па потоа учител – Магијата на ‘Добро утро, деца’“ собра наставници, стручни лица, родители и претставници на академската заедница, кои од различни перспективи зборуваа за суштината на наставничката професија и за тоа што навистина значи да се биде добар учител.
Во своето обраќање, министерката за образование и наука проф. д-р Весна Јаневска, ја нагласи исклучителната улога на наставниците не само како пренесувачи на знаење, туку и како личности што со својата посветеност, емпатија и личен пример оставаат неизбришлива трага во животите на младите.
„Секоја успешна образовна приказна започнува со наставник кој верува во ученикот. Кога едно дете ќе почувствува дека некој со внимание го гледа, го слуша и верува во неговиот потенцијал, тогаш се случува вистинска промена. Нашата мисија е да го зајакнеме системот кој ги препознава и цени наставниците, а преку оваа кампања, сакаме не само да ја потврдиме нивната важност, туку и да го вратиме достоинството на професијата што ја гради иднината“, истакна Јаневска.
Министерката потенцираше дека со потпишувањето на спогодбата со СОНК, Владата обезбеди гаранција за континуиран годишен раст на платите на наставниците, кој ќе биде реален и ќе зависи од степенот на инфлација. Додаде и дека овозможен е кариерен развој на наставниците и стручните соработници преку повиците за напредување во звања ментор и советник не само во основните, туку за прв пат годинава и во средните училишта.
Проф. д-р Данче Сивакова Нешковски, декан на Педагошкиот факултет во Битола, рече дека добриот наставник е оној кој пред сѐ умее да слуша, да разбере и да создаде врска со секое дете, а дури потоа да предава.
Наставниците и стручните лица од основните и средните училишта во Прилеп говореа за секојдневните предизвици во работата, но и за моментите кои им се показател дека нивниот труд прави разлика. Родителите истакнаа дека вистинскиот наставник е оној што детето го гледа како сојузник, а училиштето како средина што го поддржува и инспирира детето.
Денешната панел-дискусија е дел од националната кампања „Магијата е во знаењето“, во чии рамки се реализираат низа активности, од јавни настани и тематски собири, до едукативни видеа, интерактивни работилници и вклучување на широк круг чинители од образовниот и општествениот живот.
Преку овие активности, се настојува да се создаде поширока општествена поддршка и разбирање за значењето на наставничката улога. Фокусот е ставен на тоа наставниците да добијат поголема видливост, почит и поддршка, како луѓе кои секојдневно вложуваат знаење, труд и посветеност во воспитувањето и образованието на новите генерации и кои претставуваат двигатели на напредокот на секое општество.
Македонија
И меѓународната заедница гледа со неверување дека некој во 21 век може да се однесува така, рече Мицкоски по повиците за етничко гласање во вториот круг
Претседателот на ВМРО-ДПМНЕ, Христијан Мицкоски, денеска од Брвеница испрати порака дека сите кои работат за иднината на државата имаат негова и владина поддршка, без оглед на етничката, верската или политичката припадност. Ова се случува откако кандидатот на Коалицијата „Вреди“ за градоначалник на Брвеница, Хаќим Рамадани рече дека заедно со кандидатите на ДУИ бараат гласови за општините каде во втор круг се тркаат Македонци и Албанци, за да се знае кој е газда.
„Секој кој зборува за иднината на Македонија е добредојден мој соговорник, а тие што шират поделби, особено етнички, не му мислат добро ниту на Македонецот, ниту на Албанецот, ниту на било кој друг наш сограѓанин“, изјави Мицкоски.
Тој истакна дека со жалење го слушал сето она што противкандидатот на Јовица Илиевски во Брвеница го кажувал во една , како што ја нарече, егзалтирана состојба.
„Не знам дали беше тоа специфичен момент за него, но мислам дека направи голема грешка. Направи голема грешка пред се за кандидатите, од истата онаа коалиција за која тој настапува. Замислете што ќе се случува сега во Струга, во Дебар и во одредени други општини, така што толку себичен потег од политичар до сега поновата историја Македонија не видела“, рече Мицкоски.
Додаде дека ваквата реторика стигнала и до влијателни претставници на меѓународната заедница, така што и тие гледаат со големо жалење и со неверување на она што го слушаат, дека некој во 21 век може да користи таков речник.
Мицкоски истакна и дека Владата предводена од ВМРО-ДПМНЕ вложува подеднакво во сите општини, без оглед на политичката или етничката структура на локалните власти.
„Покажавме со инвестиции и договори од половина милијарда евра во сите општини – без разлика дали се леви или десни, провладини или опозициски. Така се гради соживот, така се гради заедничка држава. Со поделби може само да уназадуваме“, рече тој.
Рамадани претходно најави дека во вториот круг ќе соработува со ДУИ, партијата за која „Вреди“ не штеди зборови во партиските соопштенија дека е криминална, поразена и на дното на бунарот, само со цел да се поразат кандидатите на ВМРО-ДПМНЕ, и покрај тоа што се коалициони партнери во Владата. Рамадани рече дека општините како Кичево, Брвеница и Тетово, каде што се мнозинство Албанците, треба да ги води Албанец, што во јавноста денес беше оценето како шовинистичка реторика.
Тензиите меѓу коалициските партнери почнаа уште пред неколку дена, кога лидерот на „Влен“, Билал Касами, во интервју за албанската телевизија Сири најави дека во вториот круг во Кичево ќе го поддржат кандидатот на ДУИ, Фатмир Дехари, а не кандидатот на ВМРО-ДПМНЕ, Александар Јовановски, само затоа што е Албанец.
Мицкоски тогаш остро реагираше, истакнувајќи дека политиката не смее да се темели на етнички поделби и шовинизам, туку на вредности и заедништво.
„Сите што се надеваат дека со етноцентрични теми ќе добијат нешто во политиката нека го погледнат примерот на падот на ДУИ – тоа е лекција за сите. Поддршката треба да се гради врз вредности, а не низ призмата на етничка припадност“, изјави тогаш Мицкоски.
ВМРО-ДПМНЕ во првиот круг немаше свои кандидати во неколку општини – меѓу нив Тетово, Чаир, Сарај и Струга – токму за да ја поддржи коалицијата „Вреди“ и нејзините кандидати.
„Понекогаш додека ги реализиравме овие стратешки цели крваревме како ВМРО-ДПМНЕ и поднесовме жртва. Не беше лесно да се гледаат нашите сопартијци како остануваат без кандидати, но тоа беше дел од поширокиот стратешки договор. Ние не бараме ништо за возврат, само почит за жртвата што сме ја дале за други“, изјави Мицкоски во неодамнешното обраќање.
Во вториот круг на локалните избори на 2 ноември, ВМРО-ДПМНЕ и „Вреди“ ќе се најдат во директна трка во неколку општини, меѓу кои Брвеница, Долнени.
И додека лидерот на ВМРО-ДПМНЕ ја брани позицијата на својата партија како носител на стабилност и меѓуетничко единство, „Влен“ се’ уште јавно не се произнесе за настапот на Рамадани.

