Македонија
Со грант преку проектот МСИП подобри услови за учење за 1.400 деца во Чаир

Со грант-средства преку Проектот за подобрување на општинските услуги – МСИП извршена е реконструкција на покривот на основното училиште „Рајко Жинзифов“ во општина Чаир, во кое учат над 1.400 ученици. Денеска, заменик-министерката за финансии, Ширет Елези, и градоначалникот Висар Ганиу го посетија училиштето.
Грантот е во висина од 3 милиони денари, а исто толку кофинансира и општината. Овој грант ѝ е доделен на Општината од страна на Светската банка преку МСИП поради успешно спроведување три други потпроекти преку истиот проект, односно реновирање две градинки и училиште во општината, со што им се обезбедени подобри услови за образование на над 2.000 деца.
„Учениците на ова училиште ќе ја почнат новата учебна година во училиште што ќе има нов покрив, без азбестни цементни блокови, кои не се добри за здравјето. Истовремено, ќе се подобри енергетската ефикасност на училиштето и се очекува сметките за енергија во просек да се намалат околу 30 отсто“, рече заменик-министерската за финансии, Ширет Елези.
Градоначалникот на општина Чаир истакна дека преку заеднички ангажман ќе се овозможат подобри услови за поквалитетен образовен процес на местата каде што се подготвува идна здрава генерација.
„Останувајќи целосно фокусирани за подобрување на инфраструктурата на нашите основни училишта и детски градинки, како Општина во континуитет остваруваме ефикасна соработка со други државни институции и ги користиме сите можни законски механизми за олеснување на реализирањето на многу слични проекти во служба на учениците и општо на сите граѓани.
Инаку, Проектот за подобрување на општински услуги – МСИП, Министерството за финансии го спроведува со поддршка на Светската банка, како и на Европската Унија. Вкупниот фонд на проектот е над 100 милиони евра, и тоа: 80 милиони евра заем од Светската банка, 15 милиони евра ЕУ-грант средства преку ИПА и кофинансирање од буџетот од речиси 5 милиони евра.
Проектот МСИП овозможува финансирање капитални општински проекти од типот: водоснабдување, канализација и одведување отпадни води, енергетска ефикасност (улично осветление, изолација на општински објекти и сл.), локална патна инфраструктура (модернизација и реконструкција на улици и патишта), комунални услуги (набавка на возила за јавните комунални претпријатија), како и други општински услуги и надлежности, како изградба на детски градинки, зелени пазари, инфраструктура во индустриска зона и сл.
Преку Проектот за подобрување на општински услуги поддржани се речиси 230 капитални проекти во сите општини во земјата. Целта е да се обезбедат подобри услови за живеењена сите граѓани во земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Средба Тошковски – Ходулин: Интензивна поддршка од ЕУ преку ИПА проектите за креирање полиција со европски стандарди

Министерот за внатрешни работи Панче Тошковски денеска оствари работна средба со претставници на Делегацијата на Европската унија, предводени од Стефан Ходулин, раководител на Одделот за соработка и Даница Стошевска, програм менаџер во канцеларијата.
На состанокот беше разгледана досегашната соработка помеѓу Министерството за внатрешни работи и Делегацијата на Европската унија во делот на спроведувањето на проектите финансирани преку Инструментот за претпристапна помош (ИПА).
Од страна на господинот Ходулин беше изразено задоволство од постигнатото во рамките на веќе спроведените проекти кои се имплементираат во министерството и изрази надеж дека посветеноста ќе продолжи со ист интензитет.
Министерот Тошковски во име на Министерството за внатрешни работи и се заблагодари на Делегацијата на ЕУ за досегашната поддршка и потенцираше дека истата е од исклучителна важност за министерството, и дека од наша страна ќе бидат обезбедени сите ресурси со цел максимално и рационално искористување на финансиската поддршка која е наменета за постигнување на европските стандарди во полициското работење.
За време на состанокот исто така се разговараше и за идните проекти кои се дел од Националната ИПА програма за 2025 година и следниот период, по што заеднички беше донесен заклучок дека ќе се продолжи со интензивни активности во наредниот период со цел финализирање плановите и проектите како основа за идното програмирање и обезбедување на сите неопходни предуслови од страна на министерството за внатрешни работи и целосна посветеност во нивната подготовка.
Двајцата соговорници изразија уверување и подготвеност за продолжување на одличната соработка и во иднина.
Македонија
Сиљановска-Давкова на средба со Радев: во фокусот трагедијата во Кочани и евроинтегративниот пат

Претседателката Гордана Силјановска-Давкова која е во Бугарија за да учествува во „Процесот Акаба“, пред медиумите соопшти дека ги посетила повредените пациенти кои настрадаа во трагедијата во Кочани и сега се на лекување во болницата „Пирогов“.
Рече дека се чувствуваат многу подобро. Таа оствари средба и со бугарскиот претседател Румен Радев.
Фокусот бил на трагедијата во Кочани, но се разговарало и за одблокирање на нашиот евроинтегративен пат, при што двајцата заклучиле дека се неопходни позачестени средби. Претседателката нагласила дека се можни компромиси и очекува исчекор на тој план.
Оддавајќи му признание на Радев таа кажа дека тој бил првиот претседател којшто утрото по трагедијата во Кочани и се јавил и и понудил секаков вид на помош.
„Прв ми се јави претседателот Радев. Благодарам. За жал или за добро, понекогаш трагедијата го вади доброто во сите нас, не политичкото, туку човечкото. Ова нема да може да го заборави ниту еден политичар од двете страни“, ја пренесуваат изјавата на Силјановска-Давкова бугарските медиуми.
Македонија
Отежнато се одвива сообраќајот на патниот правец Валандово – Струмица поради одрони

На патниот правец Валандово – Струмица, кај Костурино поради одрони сообраќајот е одвива отежнато и забавено.
Патниот правец Крушево-с.Долно Дивјаци -с.Кочиша е небезбеден за сообраќај и претсавува опасност за нормално одвивање на сообраќајот и поради таа причина истиот од 15.00 часот на 04.04.2025 година до негово санирање истиот ќе биде затворен за секаков вид на сообраќај, а граѓаните од населените места ќе користат регионален пат с.Пуста Река -Крушево.
Сообраќајот на државните патишта се одвивa непречено, по претежно влажни коловози.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.