Македонија
Спасовски: Договорот за ФРОНТЕКС помеѓу ЕУ и Северна Македонија е уште еден важен чекор напред
„Како министер за внатрешни работи на Република Северна Македонија, земја која е дел од ‘Балканската рута’ и која од почетокот на миграциската криза беше и останува транзит земја, но не и земја на потекло или земја како крајна дестинација, би сакал да истакнам дека соработката и активностите реализирани во рамки на Прашкиот процес, како и на сите процеси и платформи за управување со миграцијата, за нас се од огромно значење. Токму затоа остануваме посветени на спроведувањето на воспоставената соработка, со цврста определба и за реализација на новиот Акциски план на Прашкиот процес за периодот 2023-2027, кој во голема мерка се совпаѓа и со приоритетите на МВР на Република Северна Македонија во областите околу управувањето со миграцијата: спречување и сузбивање на илегалната миграција, трговија со луѓе, враќање и реадмисија, зајакнување на системот на азил и меѓународна заштита“, истакна министерот за внатрешни работи Оливер Спасовски на заедничката прес конференцијата со еврокомесарката за внатрешни работи Илва Јохансон, министерот за внатрешни работи на Чешката Република Вит Ракушан и заменик претседателот на Собранието на Киргистан за миграции Медер Рахман, која се одржа по усвојувањето на Заедничката декларација и Акцискиот план на Четвртата Министерска конференција во рамки на Прашкиот процес.
Спасовски уште еднаш ја нагласи посветеноста на Министерството за внатрешни работи на Република Северна Македонија за зајакнување на соработката и постигнување одржливо партнерство за поефикасно справување со предизвиците кои ги носи миграцијата, како преку миграциските партнерства, како што е Прашкиот процес, така и со агенциите на ЕУ.
„Задоволство ми е да кажам дека со почитуваната еврокомесарка Јохансон ќе го потпишеме Договорот за оперативни активности спроведени од страна на Агенцијата за европска гранична и крајбрежна стража помеѓу Република Северна Македонија и Европската Унија. Со овој Договор ќе овозможиме подобра заштита на границите, брзо распоредување на персонал и опрема на ФРОНТЕКС или странски полициски службеници на критични точки на границите“, рече Спасовски, додавајќи дека распоредувањето на персонал на ФРОНТЕКС ќе уследи по повеќегодишната реализација на Заедничката операција на јужната граница на Република Северна Македонија, во рамки на која странски полициски службеници од повеќе европски земји и партнери заеднички работат на зачувување на границите и на безбедноста на македонските граѓани, а со тоа и зачувување на границите и безбедноста на државјаните на Европската Унија.
Оценувајќи ја како успешна и конструктивна дискусијата на министрите во текот на Четвртата конференција во рамки на Прашкиот процес, еврокомесарката Јохансон се осврна на глобалните случувања, меѓу кои и војната во Украина, која уште повеќе ја наметна потребата од европско единство, како основа за успех. Во делот на миграциите, Јохансон се задржа на неопходноста од усогласување на политиките на визен режим помеѓу партнерските земји од Западен Балкан со оние на ЕУ за да се спречи злоупотребата на слободниот визен режим што придонесува за наплив на мигранти од Индија, Бурунди, Куба во земјите од ЕУ.
„Мора да го поддржиме ФРОНТЕКС во земјите партнери од Западен Балкан, каде веќе имаме 300 мажи и жени кои овозможуваат поддршка на границите на нашите партнери од Западен Балкан, утре веќе очекуваме предлог за ново преговарање на постојниот договор, со што тој ќе може да се прошири и на границите помеѓу земјите на Западен Балкан, а во среда ќе одам во Скопје за со министерот Оливер Спасовски да го потпишеме Договорот за ФРОНТЕКС помеѓу ЕУ и Северна Македонија, што мислам дека ќе биде уште еден важен чекор напред. Покрај ова, треба да ја зајакнаме поддршката кон нашите партнери од Западен Балкан околу враќањето и реадмисијата и да ја интензивираме нашата поддршка и активностите во врска со сузбивањето на криумчарите со мигранти, па се надевам дека следната недела веќе ќе можеме да зборуваме за отпочнување на оперативно партнерство против криумчарењето мигранти заедно со партнерите од Западен Баллкан“, истакна Јохансон.
Министерот за внатрешни работи и прв заменик премиер на Република Чешка, Вит Ракушан, заблагодарувајќи се до земјите учеснички на Прашкиот процес потсети дека овој дијалог отпочнат во 2009 година во Прага дозволува земјите да се справат во поширок контекст со клучните предизвици на глобално и европско ниво.
„Оваа конференција докажува дека европските земји и земјите членки на ЕУ се сеуште вољни да учествуваат во работата на Прашкиот процес, после 13 години историја, ние имаме големи предизвици кои ни претстојат, како што е украинската миграциска криза“, рече Ракушан.
Притоа, тој додаде дека усвојувањето на Заедничката декларација и Акцискиот план 2023-2027 на Четвртата Министерска конференција во рамки на Прашкиот процес дозволуваат Прашкиот процес да го продолжи својот мандат во годините што следуваат.
„Овие документи дозволуваат да се продлабочи соработката и ги рефлектираат нашите намери во соработката за земјите што се дел од Прашки процес, како и најновите трендови, кои не се присутни само во Европа, туку и на глобално ниво. Ние успеавме да ги оцениме кои се важните механизми и алатки за понатамошна соработка, како и јакнење на капацитетите и дополнителни начини на соработка. Пред нас стојат години на имплементација на овие резултати, кој е еден многу амбициозен план на Прашки процес”, подвлече министерот Ракушан.
Известувачот за трговија со луѓе при Советот за миграција во рамки на претседателот на Собранието на Киргистан, Улан Ногобаев, ја оцени денешната конференција како многу продуктивна, одлична платформа за дијалог, додека самиот Прашки процес им помага на земјите како Киргистан да ги надминат предизвиците со кои земјите денес се соочуваат.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нормализиран сообраќајот на патниот правец Охрид – Ресен
Сообраќајот на патниот правец Охрид – Ресен е нормализиран, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани –Делчево.
Македонија
Јаневска – Рокас: соработката со Европската унија е од суштинско значење за реализација на планираните образовни промени
Министерката за образование и наука Весна Јаневска денеска оствари средба со новоакредитираниот амбасадор на Делегацијата на Европската унија, Михалис Рокас.
Посакувајќи му успешен мандат, Јаневска се заблагодари на амбасадорот Рокас за континуираната поддршка на ЕУ во процесот на реформирање на националниот образовен систем.
На средбата, таа ги претстави тековните активности и планот за поквалитетно образование на сите нивоа.
„Стремежот за полноправно членство во Европската Унија продолжува да биде важен општествен стимул и значаен фактор на кохезија за македонските граѓани, кои пак, од нас како Влада очекуваат современо и модерно образование. Истрајни сме во определбата да ги реализираме промените кои ги претставивме на почетокот на нашиот мандат. Оптимизам и решителност постои, а соработката со Европската унија е од суштинско значење за остварување на зацртаната цел, рече Јаневска на средбата.
Евроамбасадорот укажа на подготвеноста на ЕУ и понатаму да биде посветен партнер на државата во градењето современ образовен систем, кој ќе образува европски граѓани.
Македонија
Сиљановска Давкова – Гутереш: Не смее да се дозволи, билатерализацијата во случајот со македонската евроинтеграција да стане камен на сопнување за проширувањето
Претседателката Гордана Сиљановска Давкова, во рамки на учеството на 79. Генерално Собрание на Обединетите Нации во Њујорк оствари средба со Генералниот секретар на Обединетите Нации, Антонио Гутереш.
На средбата претседателката ги потенцираше принципите на светската организација како основа на којашто мора да функционира меѓународниот поредок, без разлика дали се работи за мали или големи држави. Таа на својот соговорник му посочи дека во случајот со македонската евроинтеграција не смее да се дозволи билатерализацијата да стане камен на сопнување за проширувањето на Европската Унија, која е настаната како мировен процес.
Генералниот секретар на ОН, Гутереш, на средбата искажа лутина поради пречките коишто Северна Македонија ги има на патот кон Европската Унија. Порачувајќи дека е голем почитувач на македонската евроинтеграција, во разговорот тој ја потенцираше својата лична солидарност за напорите на земјата да биде дел од ЕУ.
Генералниот секретар како добар познавач на процесите на евроинтеграција и состојбата во регионот на Западен Балкан, нагласи дека македонската евроинтеграција, целосно заслужено, треба да се случи колку што е можно побрзо.