Македонија
Спасовски и албанскиот колега Чучи потпишаа обновени аранжмани со ЕК за борба против тероризмот во Западен Балкан

Комисијата денеска потпиша ревизија на билатералните аранжмани со Албанија и Северна Македонија, обновувајќи ги активностите за спроведување на Заедничкиот план за акција за борба против тероризмот во Западен Балкан. Ова дополнително ќе ја надогради соработката во полето на борбата против тероризам, спречување и борба против насилен екстремизам. Аранжманите ги потпишаа комесарката за внатрешни работи Илва Јохансон, министерот за внатрешни работи на Албанија Бледар Чучи и министерот за внатрешни работи на Северна Македонија Оливер Спасовски.
Комесарката за внатрешни работи Илва Јохансон изјави: „Заедничкиот план за акција за борба против тероризмот останува столб на нашата соработка со Западен Балкан за да осигураме заедничка безбедност. Го поздравуваме напредокот постигнат од Албанија и Северна Македонија во спроведувањето на приоритетните акции, а потпишувањето на овие обновени аранжмани е конкретен знак за нашата континуирана вклученост и поддршка за нашите партнери.“
Министерот за внатрешни работи на Албанија Бледар Чучи изјави: „Потпишувањето на ревидираниот аранжман ќе ни овозможи, заедно со ЕУ, подобро да се соочиме со заканата што ја поставува тероризмот, да го усогласиме нашето законодавство со законодавството на ЕУ и да ги подобриме нашите капацитети. Размената на информации во рамките на овој договор ќе обезбеди појасна слика за вистинските закани и подобра подготвеност за справување со тероризмот и насилниот екстремизам.“
Министерот за внатрешни работи на Северна Македонија Оливер Спасовски изјави: „Задоволен сум што сум тука да го потпишам овој ревидиран аранжман со Европската комисија. Се појавуваат нови безбедносни закани и предизвици и покажуваме дека меѓународната соработка е од најголема важност. Ревидираниот аранжман ќе им овозможи на Северна Македонија и на ЕУ поблиску да соработуваат за да предвидат, спречат, заштитат и одговорат на терористичките закани. Тој исто така ја покрива областа на спречување на насилниот екстремизам и поларизацијата на нашите општества поттикнати од дезинформации“.
Ревидираните аранжмани меѓу Комисијата и властите на Албанија и Северна Македонија идентификуваат конкретни приоритетни акции во областа на соработката против тероризмот што ќе се спроведуваат во текот на 2023 година и 2024 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова: Ромите не заслужуваат маргинализација и дискриминација, туку отворена поддршка и рамноправност во сите права

Претседателката Гордана Сиљановска-Давкова се обрати на второто издание на годишниот настан „Разговори за еднаквост“ којшто годинава Комисијата за спречување и заштита од дискриминација го организираше на тема „Право на домување на Ромите“.
Во своето обраќање Сиљановска-Давкова истакна дека не треба да се зборува само за статистика или политики, туку да се чуе за нееднаквоста, за животните искуства на Ромите, како најранлива категорија наши граѓани, кои се соочени со системска и со структурна дискриминација врзана за законско непоседување сопствен дом или стан, „осуденост“ на живот во непостојано, несигурно или супстандардно живеалиште на периферијата, без пристап или отежнат пристап до вода за пиење, без услови за лична хигиена, во недостиг на животен простор, односно катче за секој член на најчесто многудетното семејство.
Како претседателка која ги претставува сите граѓани, таа посочи дека има политичка, правна, етичка и морална обврска да не дозволи ниту една заедница да се чувствува запоставена, изоставена, маргинализирана, дискриминирана.
Според неа, потребна е не само институционална, туку и индивидуална човечка борба за надминување на предрасудите, на стереотипите и докажана грижа за најранливите, односно обид за согледување на Ромите низ ромски очи, заради уривање на (не)видливите ѕидови зад коишто е изолирана и маргинализирана ромската заедница. Потребни се чекори за вклучување на Ромите во општествениот и политичкиот живот.
,,Потребна е инклузивна, наместо ексклузивна политика на домување во чие креирање ќе учествуваат и Ромите” – рече претседателката.
Во општините со доминантно ромско население, според претседателката, мора да се применуваат исти урбани стандарди, вклучувајќи ги и оние на домување како и во другите општини.
Сиљановска-Давкова посочи дека на нашите сограѓани Роми секогаш им вели дека не се дојденци во оваа земја, туку таа е и нивен дом. Порача дека тие не заслужуваат маргинализација и дискриминација, туку отворена поддршка и рамноправност во сите права, вклучувајќи го и правото на пристоен дом.
Настанот на којшто се обратија и шефот на делегацијата на Европската Унија, амбасадорот Михалис Рокас, заменик министерот за локална самоуправа, Ерџан Селими, претседателот на Комисијата за спречување и заштита од дискриминација, Лимко Бејзароски и лидерката на компонентата 4 од проектот „Поддршка на ЕУ за владеење на правото“, Барбара Лигл е финансиран од ЕУ и имплементиран од Лудвиг Болцман Геселшафт – Институт за фундаментални и човекови права (LBI-GMR), австриско владино тело кое функционира како институт за истражување, обука и консултации.
Македонија
Хеликоптер на МВР исфрли повеќе од 30 тони вода во реонот на Дојран

Денеска во попладневните часови хеликоптерот бел 412 беше повикан за гасење пожар во реонот на Дојран, соопшти МВР.
Притоа во 22 налети биле исфрлени преку 30 тони вода.
„Поради ноќните услови хеликоптерот се повлече во базата“, информираа од ова министерство.
Македонија
Морбидни обивнувања на Мицкоски и измислени приказни за пожарите, велат од СДСМ

Нема крај на морбидното однесување на ВМРО-ДПМНЕ и Христијан Мцикоски. Во услови на огнена стихија и прогласена вонредна состојба на територија на целата држава, партијата на власт наместо да бара решенија, бара изговори за катастрофата, реагираат од СДСМ.
„Минатата година со ВМРО-ДПМНЕ на власт изгореа помеѓу 10% и 15% од целокупната територија на земјата. И тогаш наместо одговорност, Мицкоски бараше виновници додека ветуваше дека ЌЕ биде подобро следната година.
Точно една година подоцна, во моментов гори тоа што остана од шумите и зелените површини низ земјава да догори.
Нема нова опрема – промовираа стари реновирани хермелини и БТР кои ги нема никаде на терен бидејќи веќе се во сервис.
Нема нови авиони, поточно, воопшто нема авиони.
Нема пилоти, иако ветуваа дека за една година ќе обучат и вработат доволно нови пилоти.
Нема нови пожарникари, а сега за 24.000 денари бараат привремени пожарникари кои би требало за минимална плата да го ризикуваат сопствениот живот. Цела година немаат абер да почнат да работат“.
Населението, додаваат од опозициската партија, само се спасува, кравите бегаат и не ја пасат тревата, пожарите беснеат, само Мицкоски не е крив.
„Мицкоски е одлепен од реалноста. Веќе има една жртва од пожарите, а наместо збор на утеха или превземање на мерки, Мицкоски повторно забегува во некрофилска реторика и бара виновници, бркајќи духови“, оценуваат од СДСМ.