Министерот за внатрешни работи, Оливер Спасовски, вчера и денеска учествува на 18-тиот состанок на Комитетот на министри на конвенцијата за полициска соработка во Југоисточна Европа и министерскиот состанок во рамките на процесот Брдо во Крањ, Словенија. Во своето обраќање Спасовски потенцира дека потпишувањето на конвенцијата за полициска соработка во Југоисточна Европа и нејзиното успешно спроведување во изминатите години ја направи еден од најзначајните и водечки инструменти за полициска соработка во регионот.

„Она што оваа конвенција ја прави посебна и универзална алатка за ефикасно полициско работење е тоа што нуди многубројни можности за примена на разновидни и современи методи и техники преку кои се одразува полициската работа и се прикажуваат најдобрите пракси на полициите на нејзините договорни страни. Преку успешна и доследна примена на овие методи и техники заеднички придонесуваме кон зајакнување на стабилноста и безбедноста, справување и спречување на заканите за јавниот мир и безбедноста и кон успешна борба против криминалните појави во регионот и пошироко. Сведоци сме на растечките трендови на глобализацијата и напредокот во технологијата, со што комуникацијата помеѓу поединците станува сè полесна, а размената на информации помеѓу луѓето сè побрза и понепосредна. Ваквиот тек на експанзија на технологијата, од една страна, ни нуди големи придобивки за нас како луѓе, ни ги олеснува начинот на живеење, движењето и функционирањето. Од друга страна, пак, за жал, истата таа технологија станува сè покорисна и поупотребувана од страна на криминалците што ја користат за вршење нелегални активности и остварување нелегален профит“, рече Спасовски.

Тој додаде дека само преку заеднички пристап со користење на сите можни форми на размена може да бидеме во чекор со предизвиците што претставуваат закана за граѓаните на Македонија и граѓаните на другите земји од Југоисточна Европа, каде што често живеат и престојуваат и наши државјани.

Во обраќањето на министерскиот состанок во рамките на процесот Брдо на тема „Трговија со луѓе“ министерот Спасовски истакна дека земјава успешно ја воспостави Националната единица за сузбивање шверцување мигранти и трговија со луѓе. На маргините од министерскиот состанок во Брдо, Крањ, државниот секретар на Република Македонија, Магдалена Несторовска, и Милан Радојевиќ, како национален координатор на Националното тело за борба против трговијата со луѓе во Република Косово, потпишаа меѓувладин протокол за соработка, а набргу ваков документ ќе биде потпишан и со владата на Црна Гора.