Македонија
Спасовски на средба со раководството на Регионалниот центар Запад, СВР Охрид и ОВР Струга

Министерот за внатрешни работи, Оливер Спасовски, во рамките на проектот „Безбедно лето 2023“, оствари средба со раководствата на Регионалниот центар за гранични работи Запад, Секторот за внатрешни работи Охрид и Одделението за внатрешни работи Струга.
Како што известува МВР, министерот Спасовски беше запознаен со безбедносната состојба на подрачјето на РЦ Запад, СВР Охрид и ОВР Струга, за состојбите со криминалитетот, како и за активностите што се преземаат во насока на намалување на стапката на криминалитет во приоритетните области, одржување поволен јавен ред и мир, безбеден патен сообраќај и превенција. Во согласност со презентираните показатели, безбедносната состојба на подрачјето во надлежност на овие организациони единици на МВР е стабилна, без индиции таа да биде нарушена, што е особено важно за граѓаните од овој дел, но и во рамките на генералната безбедносна оценка за државата.
Бројот на туристи пред самиот ек на туристичката сезона е зголемен 40 % – престој на странци до 3 месеци, годинава таа бројка изнесува 50.817 лица странци во споредба со истиот период минатата година кога таа бројка изнесуваше 36.843. Протокот на патници на граничните премини, кои спаѓаат во склоп на РЦ Запад, во споредба со истиот период од минатата година, 2023/2022 бележи зголемување од 16 %, односно регистрирано е влез/излез 1.527.153 во споредба со минатата година кога бројката беше 1.320.304 патници, велат од МВР.
Во делот на илегалната миграција се бележи намалување на илегални преминување на нашата граница како резултата на мерките и активностите што се преземаат на терен и добрата поставеност на нашите служби, откриени се 36 лица при обид за незаконско преминување на државната граница, од кои 4 – Мароко, 3 – Сирија, 2 – Палестина, 2 – Холандија и 25 лица од Албанија.
Вкупниот криминал на подрачјето на СВР Охрид во изминатите пет месеци од 2023 година, во споредба со истиот период претходната година, бележи намалување од 22 %. Во делот на тешките кражби, во текот на 2023 година бележиме намалување на овој вид пријавени кривични дела за 38 % во споредба со истиот период лани, информираат од МВР.
Класичниот криминал на територија на СВР Охрид во првите пет месеци од 2023 година бележи намалување од 20 % во споредба со истиот период 2022 година.
Исто така, бележиме намалување и во делот на економскиот криминал, каде што годинава во споредба со првите пет месеци од минатата имаме намалување од цели 38 % на територијата на СВР Охрид. Позитивен тренд се бележи и во областа на сообраќајот, каде што имаме намалување на бројот на сообраќајни незгоди.
Од страна на СВР Охрид во првите пет месеци во текот на 2023 година реализирани се 52 настани за превенција. На подрачјето на ОВР Струга во првите пет месеци од 2023 година компаративно со истиот период лани бележиме намалување за 28 % на вкупниот број регистрирани кривични дела. Во областа на класичниот криминалитет, пак, оваа година имаме намалување од 31 % во споредба со минатата година, се наведува во соопштението на МВР.
На крајот од средбата, министерот Спасовски изрази уверување дека колегите од РЦ Запад, СВР Охрид и ОВР Струга и во наредниот период ќе продолжат со зголемен интензитет при реализацијата како на превентивните активности така и на репресивните мерки, а со единствена цел – подигнување на безбедноста и заштита на граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) ДЗС: Пронајдена артилериска граната од 65 mm од Првата светска војна во Ресенско

Вчера во 18.50 часот од крај брегот на Преспанското езеро на плажата „Сливница“ во општина Ресен, од страна на Дирекцијата за заштита и спасување (ДЗС) е интервенирано за отстранување неексплодирано убојно средство (НУС) од минатите војни, а по пријава на 112 во ЦУК.
Конкретно, била пронајдена артилериска граната од 65 mm од Првата светска војна. Се работи за граната којашто била истрелана и веќе поминала низ топовска цевка што се препознава по нејзиниот ребраст прстен, но поради непознати причини после истрелувањето не ја завршила целта, не експлодирала. Истата е ризична за поместување, а нејзината запалка е опасна, бидејќи при удар е можно да дојде до нејзино активирање, извести ДЗС.
По претходно внимателно испитување на нејзината состојба, таа е безбедно подигната, и од пиротехничарот од Дирекцијата за заштита и спасување (ДЗС) Битола, Ѓорги Стефанов, е отстранета и пренесена безбедно до соодветен магацин за НУС.
ДЗС апелира до граѓаните кога ќе пронајдат неексплодирани убојни средства да не ги фаќаат и поместуваат, туку едноставно да се јават на Единствениот повикувачки број за итни случаи 112, по што надлежните институции и служби ќе се погрижат безбедно да бидат отстранети или неутрализирани.
Македонија
Влада: Tелефонската линија за сите повредени и нивните семејства во трагедијата во Кочани е во функција, Пониква станува центар за рехабилитација

Од денес телефонската линија за сите повредени и нивните семејства во трагедијата во Кочани е во функција, извести Владата.
„Преку директна комуникација секој од повредените лица и семејствата ќе може да се јават, да ги искажат своите барања кои ги имаат, како и да понудат предлози и конкретни потреби.
Телефонскиот број 070/355-526 на кој ќе можат да се јават повредените и семејствата е јавно достапен, и е директна комуникација управувана од Канцеларијата на претседателот на Владата“, соопшти Владата.
„Никој нема да биде заборавен. Наш приоритет е повредените од кочанската трагедија да добијат соодветна медицинска нега и целосна рехабилитација, за да можат да продолжат со животот понатаму.
Токму поради тоа, на владина седница ќе се донесе одлука со која одморалиштето Пониква кое е во сопственост на Министерството за внатрешни работи ќе се отстапи за потребите на Министерството за здравство, односно за пациентите кои веќе се во стабилна состојба, но имаат потреба од понатамошен третман.
Одморалиштето Пониква располага со 27 соби и 56 легла, а ќе биде обезбеден и дополнителен медицински кадар кој ќе пружи целосна медицинска нега на пациентите.
Ова значи дека повредените лица на кои им е потребна дополнителна здравствена заштита ќе можат да ги користат овие услуги.
Како Влада сме целосно посветени да обезбедиме здравствена заштита на повредените од трагедијата во Кочани.
Дополнително, ги замолуваме политичките партии да се воздржат од некрофилија и да дозволат случајот целосно да го водат институциите.
Напомнавме дека секој што е инволвиран во овој случај, мора и ќе одговара. Без разлика на неговиот статус во општеството или припадност на политичка партија“, се додава во соопштението на Владата.
Македонија
Истрага против уште едно лице за пожарот во кочански „Пулс“

Со истражната постапка за пожарот во кочанската дискотека „Пулс“ е опфатено уште едно лице за кое е поведена истрага за – Тешки дела против општата сигурност од член 292 во врска со член 288 од Кривичниот законик.
Во текот на досегашната постапка се обезбедија докази согласно кои за сега осомничениот се утврди дека е одговорно лице – реален сопственик на осомниченото правно лице – агенција за обезбедување на имот и лица од Скопје, извести Обвинителството.
Согласно доказите, тој раководел со деловниот потфат и целокупното работење на агенцијата, заедно со претходно осомничениот управител и со овластеното лице на подружницата во Кочани.
Тие без да имаат склучено договор со корисникот на услугата Кабаре ПУЛС Кочани, во текот на 2025 година вршеле обезбедување на имот и лица за клубот. Новиот осомничен во континуитет активно раководел со планот и начинот за давање на услугата обезбедување преку правното лице. Заедно со осомничените кои биле ангажирани како обезбедување, спротивно на повеќе членови од Законот за приватно обезбедување, без каква било претходна безбедносна проценка и план за обезбедување, како и без проверка на условите за противпожарна заштита и опасност од пожари, без да извршат проверка по однос на сигурносните услови во кабарето од аспект на имот и лица, особено по опасност и можност за евакуација, во текот на вечерта кога настанал пожарот не контролирале и овозможиле влез на деца во објектот, не воделе грижа за преполнетоста на капацитетот за посетители во објектот, не спречиле внес и користење на експлозивни материи – пиротехнички средства од членовите на музичката група, со кои бил предизвикан пожарот, поради што настапила смрт кај 62 лица, со тешки телесни повреди се здобиле 157 лица, а со телесни повреди се здобиле 54 лица.
Врз основа на судска наредба вчера беше извршен претрес на две локации во Скопје и во Пробиштип, како и во автомобилот на осомничениот, при што беше одземена обемна документација поврзана со правното лице и електронски уреди. Лицето е лишено од слобода и со оглед на сите околности и законски основи, јавниот обвинител денеска до судијата на претходна постапка од Основниот кривичен суд Кочани ќе достави предлог за определување мерка притвор.