Македонија
Спасовски на средба со раководството на Регионалниот центар Запад, СВР Охрид и ОВР Струга

Министерот за внатрешни работи, Оливер Спасовски, во рамките на проектот „Безбедно лето 2023“, оствари средба со раководствата на Регионалниот центар за гранични работи Запад, Секторот за внатрешни работи Охрид и Одделението за внатрешни работи Струга.
Како што известува МВР, министерот Спасовски беше запознаен со безбедносната состојба на подрачјето на РЦ Запад, СВР Охрид и ОВР Струга, за состојбите со криминалитетот, како и за активностите што се преземаат во насока на намалување на стапката на криминалитет во приоритетните области, одржување поволен јавен ред и мир, безбеден патен сообраќај и превенција. Во согласност со презентираните показатели, безбедносната состојба на подрачјето во надлежност на овие организациони единици на МВР е стабилна, без индиции таа да биде нарушена, што е особено важно за граѓаните од овој дел, но и во рамките на генералната безбедносна оценка за државата.
Бројот на туристи пред самиот ек на туристичката сезона е зголемен 40 % – престој на странци до 3 месеци, годинава таа бројка изнесува 50.817 лица странци во споредба со истиот период минатата година кога таа бројка изнесуваше 36.843. Протокот на патници на граничните премини, кои спаѓаат во склоп на РЦ Запад, во споредба со истиот период од минатата година, 2023/2022 бележи зголемување од 16 %, односно регистрирано е влез/излез 1.527.153 во споредба со минатата година кога бројката беше 1.320.304 патници, велат од МВР.
Во делот на илегалната миграција се бележи намалување на илегални преминување на нашата граница како резултата на мерките и активностите што се преземаат на терен и добрата поставеност на нашите служби, откриени се 36 лица при обид за незаконско преминување на државната граница, од кои 4 – Мароко, 3 – Сирија, 2 – Палестина, 2 – Холандија и 25 лица од Албанија.
Вкупниот криминал на подрачјето на СВР Охрид во изминатите пет месеци од 2023 година, во споредба со истиот период претходната година, бележи намалување од 22 %. Во делот на тешките кражби, во текот на 2023 година бележиме намалување на овој вид пријавени кривични дела за 38 % во споредба со истиот период лани, информираат од МВР.
Класичниот криминал на територија на СВР Охрид во првите пет месеци од 2023 година бележи намалување од 20 % во споредба со истиот период 2022 година.
Исто така, бележиме намалување и во делот на економскиот криминал, каде што годинава во споредба со првите пет месеци од минатата имаме намалување од цели 38 % на територијата на СВР Охрид. Позитивен тренд се бележи и во областа на сообраќајот, каде што имаме намалување на бројот на сообраќајни незгоди.
Од страна на СВР Охрид во првите пет месеци во текот на 2023 година реализирани се 52 настани за превенција. На подрачјето на ОВР Струга во првите пет месеци од 2023 година компаративно со истиот период лани бележиме намалување за 28 % на вкупниот број регистрирани кривични дела. Во областа на класичниот криминалитет, пак, оваа година имаме намалување од 31 % во споредба со минатата година, се наведува во соопштението на МВР.
На крајот од средбата, министерот Спасовски изрази уверување дека колегите од РЦ Запад, СВР Охрид и ОВР Струга и во наредниот период ќе продолжат со зголемен интензитет при реализацијата како на превентивните активности така и на репресивните мерки, а со единствена цел – подигнување на безбедноста и заштита на граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Постои сомнеж дека пожарот во Дрисла е подметнат

Скопската противпожарна бригада со сити сили се обидува да го локализира пожарот во депонијата Дрисла. Направен е противпожарен појас за да не се дозволи на огнот да тргне кон блиската трева, грмушки и шума од горната страна на депонијата., информира директорот на Дирекцијата за заштита и спасување, Стојанче Ангелов.
Како што додаде, постојат сомненија дека пожарот бил предизвикан намерно.
„Ќе потсетам само дека летово имавме рекордно високи температури но Дрисла не се самозапали“, рече Ангелов.
Противпожарните возила и дополнителните цистерни од „Комунална хигиена“ интервенираат на терен, а пожарот сè уште не е целосно локализиран.
Командантот на Територијалната противпожарна бригада на Град Скопје, Звонко Томевски посочи дека станува збор за посериозен пожар од поголеми размери, при што постоела опасност огнот да се прошири.
Македонија
Филипче од Париз: Потребен е проактивен пристап и политички консензус за напредок кон ЕУ

Претседателот на Социјалдемократскиот сојуз на Македонија, Венко Филипче, во рамки на еднодневната работна посета оствари повеќе средби со високи француски политички претставници, на кои во фокусот на разговорите беа реформската агенда и предлог Резолуцијата на СДСМ, како гаранција за заштита на националните интереси и решение за деблокирање на преговите со ЕУ.
Филипче одржа работна средба со пратеничката и потпретседателка на групата за пријателство Франција – Северна Македонија во француското Собрание, Лилиана Танги, со шефот на Канцеларијата за соседство, проширување и одбрана при Генералниот секретаријат за европски прашања, Жозеф Жустиниани, како и со директорот за Континентална Европа при Министерството за Европа и надворешни работи, Брис Рокфеј и со специјалниот претставник за Балканот, Рене Троказ.
На состаноците беше истакната поддршката од Франција во процесот на евроинтеграција, но и потребата од брзи резултати во исполнување на обврските и работа на реформите.
Филипче ги презентираше позициите на СДСМ и истакна дека партијата има проактивен пристап и работи на решенија за деблокирање на евроинтеграцискиот процес. Тој нагласи дека во завршна фаза е подготовката на Резолуцијата, со која ќе се потврдат националните црвени линии – македонскиот јазик, култура и идентитет, како и механизми за справување со евентуални непринципиелни барања што излегуваат надвор од Преговарачката рамка.
Во разговорите беше потенцирано дека во Европската Унија постои јасен консензус за проширувањето, и дека тоа е можност која Македонија мора да ја искористи. Француските претставници пренесоа очекувања дека нашата земја треба да направи напредок во евроинтеграцискиот процес, како што тоа веќе го прават државите од регионот, особено Албанија и Црна Гора.
Македонија
Пожар на депонијата Дрисла, Ангелов смирува дека не е алармантно, но е сложено поради хемиските процеси

Пожар избувна на депонијата Дрисла.
Директорот на Дирекцијата за заштита и спасување, Стојанче Ангелов, рече дека пожарот не е алармантен, а скопската противпожарна бригада работи на негово гаснење.
Сепак, како што објаснува Ангелов, гаснењето на било која депонија е сложен процес поради хемиските и биолошките процеси кои се одвиваат во внатрешноста на депонијата како резултат на кои се создаваат запаливи гасови.
(Фото: илустрација, архива)