Македонскиот полициски синдикат во годините наназад се етаблираше како реална синдикална сила која што претставува кредибилен партнер во сите наши напори за квалитетно и ефикасно функционирање и реформирање на Mинистерството за внатрешни работи, рече министерот Оливер Спасовски во обраќањето на централниот совет на Македонскиот полициски синдикат што се одржува во Охрид.

„Реализираните активности за набавка на униформи за полициските службеници, проектот за санација и реконструкција на објектите во кои што тие работат и ги извршуваат своите работни задачи, кој што патем речено ќе продолжи и во наредната 2019-та година, зголемувањето на платите на униформираните полициски службници, ние ги разбираме само како дел од базичните предуслови кои што треба да не донесат до посакуваната цел – професионална, функционална и ефикасна полиција како сервис на граѓаните“, рече Спасовски.

Тој додаде дека за наредната 2019 година предвидени нови 70 милиони денари за реновирање на полициските станици, а за набавка на нови униформи нови околу 200 милиони денари. Во новата година предвидено е и зголемување на платите за пет проценти.

„Пред нас се уште многу активности, пред се во поглед на натамошна стандардизација и надградување на полициското работење и полициската професија. И во поглед на професионалниот интегритет, на професионалната стручност и знаења, на целосно операционализирање на законитоста и законите како алфа и омега на полициското работење. Значи, се стремиме кон цели што треба повторно да и ја вратат улогата и местото на полицијата во едно модерно, демократско и слободно општество, да го вратат нејзиното реноме и достоинство. Уште еднаш ќе ја искористам оваа прилика и ќе го повторам нашиот јасен став дека јас и актуелното раководство на министерството остануваме отворени и недвосмислено заинтересирани за тесна и искрена соработка со вас, убеден дека споделуваме заедничка цел – професионална и подготвена институција во која што ќе работат задоволни, стручни и амбициозни професионалци“, рече Спасовски.

Се разбира, додаде тој, пред Министерството за внатрешни работи како и пред македонскиот полициски синдикат и натаму стојат крупни и сериозни предизвици со кои треба и мора во наредниот период да се соочиме.