Министерот за внатрешни работи, Оливер Спасовски, денеска изјави дека годинава Западен Балкан има неповторлива шанса во однос на својата европска перспектива, а берлинскиот процес има голем удел во реализирањето на таа цел. Спасовски говореше на отворањето на подготвителниот состанок за самитот во Лондон, кој денеска и утре се одржува во Струга. Инаку, во Лондон треба да се потпише меморандум за разбирање за размена на информации на земјите од Западен Балкан во рамките на берлинскиот процес.

„Градењето модерни европски демократии, пред сè, е во интерес на нашите граѓани, во интерес на нашите земји и од интерес на ЕУ. Стабилна, економски просперитетна и успешна Република Македонија подразбира стабилен и просперитетен регион. Република Македонија пред речиси точно една година има ново лице, како држава на можности, а не на кризи, Македонија интегрирана во Европската Унија и во НАТО преку исполнување на сите критериуми што се очекуваат од нас“, рече министерот.

Целта на годинашниот самит во Лондон за разлика од претходните во Берлин, Париз, Виена и во Трст е зајакнување на регионалната безбедносна соработка во насока на справување со заедничките закани, меѓу кои и корупцијата, сериозниот и организиран криминал, трговијата со луѓе, дрога, оружје, борбата против тероризмот и насилниот екстремизам.

„Процесот на интеграција во ЕУ не е цел, туку механизам за да нè направи нас – земјите од Западен Балкан – поподготвени да можеме да станеме дел од европското семејство на нации. Со други зборови, рамката е дадена и зацртана. Перспективата е јасна. Треба да се завршат домашните задачи“, рече Спасовски.

Амбасадорот на Велика Британија, Чарлс Гарет, ја потенцира важноста од одржувањето на овој состанок во Струга.

„Одржувањето на овој настан е од исклучително значење за граѓаните од целиот регион затоа што, на крајот на краиштата, тие најмногу страдаат од ефектите на криминалот и корупцијата. Токму криминалот и корупцијата ја поткопуваат безбедноста на граѓаните од нашите држави, а безбедноста е една од трите главни теми за кои ќе се дискутира на претстојниот самит, кој ќе се одржи на 9 и 10 јули во Лондон. На тој самит ќе се посвети внимание на начините на кои би можеле да ја зацврстиме нашата соработка и, секако, се радуваме на присуството на министерот Спасовски на тој настан“, рече Гарет.