Македонија
Списание „Чувари на мудроста“ за секојдневие исполнето со убавина и мудрост

Предлози за прошетки, екскурзии, патувања, книги за читање, крстозбор, вкусни рецепти и многу други содржини се најдоа во списанието „Чувари на мудроста“ чие прво издание излезе деновиве. Списанието е дел од поголемата кампања на Халкбанк АД Скопје „Чувари на мудроста“, посветена на повозрасната популација, но и на кревање на свесноста за важноста на луѓето кои нè пораснале и од кои многу сме научиле.
На списанието внимателно работеше професионална новинарска екипа со цел да обезбеди содржини во кои повозрасната публика ќе може да најде убавина и релаксација и содржина со која со радост ќе го исполни своето секојдневие. Меѓу убавините на Македонија, ги потсетивме на пештерата Пешна, на најмалиот етнолошки музеј на светот во Џепчиште, Музејот на тутунот во Прилеп, Музејот на виното во Демир Капија, но и убавините на туристичката дестинација Анталија, во Турција. Исто така, за вредните домаќинки и домаќини предложивме неколку интересни рецепти.
Со тиражот од 2000 примероци списанието ќе биде дистрибуирано до сите повозрасни граѓани кои што ја користат услугата на Халкбанк – Пензија до дома, преку АД Пошта, а ќе биде достапно и во филијалите на банката.
-Списанијата некогаш биле наше секојдневие, денес сè поретко се тоа. Во Халкбанк имавме желба носталгично да се потсетиме на оваа убава навика, да прочитаме весник, да нурнеме во богатите содржини и да испиеме топол чај или кафе. Подготвивме содржини кои на нашата повозрасна публика ќе им понудат четива корисни за нивното слободно време. Како да го поминат викендот, што да прочитаат, каде да прошетаат. Ветуваме уште многу вакви изданија, во кои нашата публика ќе ужива – вели Маја Наумовска-Савеска од Халкбанк.
Во списанието се опфатени и моменти од дружбите реализирани изминатите месеци, како што беа спомените создадени со внуците за време на проекциите на филмови во Скопје и Битола, како и неколкуте игранки низ Македонија, на кои пензионерите се дружеа со пејачката Блага Петреска.
Оваа платформа ќе нуди уште многу изненадувања и програми, за кои повеќе информации може да проследите на веб-страницата www.cuvarinamudrosta.mk
ПР-Текст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Стојаноска: Да бидеме вистински пријатели на Кочани, Владата има план како да се помогне, да внимаваме да не се политизира трагедијата

Дафина Стојаноска, пратеничка од ВМРО-ДПМНЕ, на денешната Комисија за финансирање и буџет во Собранието повика на воздржаност. Таа нагласи дека Владата предводена од ВМРО-ДПМНЕ спроведува координирана акција за помош и има јасен план за долгорочна поддршка на повредените и семејствата на загинатите од трагедијата во Кочани.
,,Денес, а и многу пати наназад после несреќата, премиерот соопшти дека Кочани е приоритет за Владата, дека здравјето на повредените е пред се. Дека психолошката состојба на сите истрауматизирани е под постојана опсервација и контрола. Дека ќе се помогне на секој можен начин дека ќе се изнајдат многу повеќе средства за Кочани“, рече Стојаноска.
Таа повика на воздржаност и да и се дозволи на актуелната власт да ги преземе сите надлежности.
,,Како пратеници треба да внимаваме да не повредиме уште некоја душа, да не споменуваме работи и имиња кои не се за споменување и да оставиме на сегашната актуелна власт да ги преземе сите надлежности и механизми “, кажа Стојаноска и додаде:
,,Времето е премногу скоро после трагедијата за да се расправаме ние тука кој повеќе се грижи за семејствата. Немојте да не ја запазуваме суштината. Голема е пораката и значењето да бидеме вистински пријатели на Кочани и да помогнеме а не да одмогнеме“.
Стојаноска нагласи дека Владата предводена од ВМРО-ДПМНЕ презеде брза и координирана акција по трагедијата, и води грижа за повредените и нивната рехабилитација, и дека семејствата на загинатите и повредените ќе добијат помош.
,,Владата на ВМРО-ДПМНЕ и коалицијата во чие време се случи оваа страшна трагедија презеде најкомплексна и координирана акција после пожарот. Веќе немаме повредени чии животи се во опасност. Во тек е рехабилитација на повредените, во тек се сите можни проекции и планови за Кочани и за семејствата на починатите и на повредените. Ќе им се помогне на секој можен начин во текот на целиот нивен живот и не само финансиски“ истакна Стојаноска.
Таа додаде дека Владата има јасен план за поддршка на настраданите и нивните семејства.
,,Нека им е вечна славата никогаш да не ги заборавиме и никогаш повеќе да не дозволиме било што слично на Кочани да ни се случи. Како што се обединивме околу гласањето на Законот за пиротехнички средства чинам, ама за жал откако се случи таа несреќа така и сега порачувам да се обединеме и да не фрламе сол врз свежите рани. Владата на ВМРО-ДПМНЕ и коалицијата има план како да се помогне“, вели Стојаноска.
Македонија
Градоначалникот на Кочани: Аплициравме за мерката за пожарите, формуларот уредно е испратен

ВМРО-ДПМНЕ го обвинува кочанскиот гадоначалник, Венко Крстевски, за опасна незаинтересираност и загрозување на јавната безбедност, по објавата на Владата дека оваа општина не аплицирала за новата мерка во борбата со пожарите, преку ангажирање на 400 лица во општините за гаснење, кои ќе добиваат месечни примања.
Претходно денес, владината портпаролка, Марија Митева, изјави дека мерката опфаќа 14 општини, односно сите општини во кои има противпожарни единици, со исклучок на Кочани и Струмица, кои не се пријавиле.
„Наместо да обезбеди повеќе опрема, човечки ресурси и сигурност за граѓаните, в.д. – то Венко свесно работи против сопствената Територијална противпожарна единица. Граѓаните со право прашуваат: кому му служи – на народот на Аки Акиов или на сопствените инаети и интереси? Да потсетиме: истиот овој в.д. градоначалник беше против и отворањето на државниот Центар за рехабилитација на Пониква, сега повторно кочничар – но овојпат на сметка на јавната безбедност и заштитата од пожари!“, велат од ВМРО-ДПМНЕ.
Крстевски, сепак, тврди поинаку – аплицирале на повикот и ја поздравуваат мерката.
„Формуларот е уредно испратен“, соопшти в. д. градоначалникот на Општина Кочани Венко Крстевски.
Тој ја поздрави мерката и изрази очекување дека Владата ќе одобри ангажман на 23 лица за превенција од пожари на територијата на Општина Кочани. Ја истакна и реалната потреба од вработување на нови 15 професионални пожарникари во Територијалната противпожарна единица – Кочани.
Во прилог, потсети и дека Општина Кочани веќе пет месеци чека Министерството за финансии да даде согласност за нови вработувања во новата детската градинка „Детелинки“, за коишто се планирани финансии во буџетот. Ја повика Владата час поскоро да ја реши неизвесноста на над 200 родители чии деца се на листата на чекање за згрижување во новата кочанска градинка.
Македонија
Земјотрес почувствуван во Валандово и во Струмица

Сеизмолошката опсерваторија, денес, во 13.35 часот регистрира земјотрес, чиј епицентар потекнува од епицентралното подрачје Валандово.
Земјотресот е со јачина од 2,9 степена според Рихтеровата скала.
Според досегашните податоци со кои располага Опсерваторијата, земјотресот е почувствуван во Валандово, Струмица и во блиската околина со интензитет од III степени според Европската макросеизмичка скала.