Македонија
Средба на Гаши со Тајани: Благодарност до Италија за поддршката за пристапувањето во ЕУ

Претседателот на Собранието Африм Гаши се сретна со потпретседателот на италијанската Влада и министер за надворешни работи и меѓународна соработка, Антонио Тајани, кој допатува во посета на Северна Македонија.
На средбата присуствуваа и пратеници од Собранието, членови на Пратеничката група за соработка со Парламентот на Италија.
Претседателот Гаши се заблагодари за значајната поддршка од Италија во процесот за пристапување во Европската Унија. Тој нагласи дека двете држави неодамна одбележаа 30 години од воспоставувањето на дипломатските односи и дека нашите релации се традиционално добри и пријателски, со активен политички дијалог и динамична секторска соработка.
Тајани изрази силна поддршка од Италија за полноправното членство на нашата земја, како и на другите држави од Западен Балкан, во Европската Унија, откако ќе се затворат сите поглавја. Тој рече оти очекува тој процес да заврши што е можно побрзо, нагласувајќи ја притоа важната улога на парламентите.
Вие како парламентарци, рече шефот на италијанската дипломатија, може да почнете многу иницијативи и да ја искористите својата позиција за вашиот глас да се слушне во другите национални парламенти и пред се во Европскиот парламент, каде што со посебна важност се третира прашањето на проширувањето, како и интеграцијата на земјите од регионот.
Гаши истакна дека Северна Македонија и регионот во целина географскии припаѓа на Европа и дека се надева оти многу брзо и политички ќе стане дел од Европската Унија. Притоа, претседателот на Собранието нагласи дека Северна Македонија, на патот кон остварувањето на своите стратешки цели, покажа голем капацитет за дијалог и за компромиси, што треба да биде пример за другите аспиранти за членство како се надминуваат отворените прашања и как се градат добри меѓусоседски односи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.