Членката на Извршниот одбор на СДСМ, Лолита Ристова, на прес-конференција изјави дека партијата спровела контрола на цените низ маркетите и констатирала дека нема намалување, туку напротив, нови поскапувања на основните прехранбени производи.

„Јајцата се повторно покачени и достигнуваат до 140 денари за пакување, јогуртот со 3,2% масленост чини 72 денари, млекото е од 70 до 80 денари, а сирењето се продава од 440 до 650 денари. Кашкавалот стана луксуз за граѓаните, со цена над 600 денари. Поскапени се и шеќерот, грашокот, гравот, леќата – сè што е неопходно за домаќинствата“, изјави Ристова.

Таа оцени дека владините мерки за замрзнување на маржите немаат ефект, а најавените контроли се само „празни ветувања“ на премиерот Христијан Мицкоски.

„Владата не презема ништо за да ги спречи овие поскапувања, но затоа без проблем набавува луксузни намирници за своите функционери. Народот нема за леб, а тие јадат аспарагус, манго, папаја, октоподи, лигни и ракчиња. Апсурдноста е уште поголема ако се знае дека Владата одби предлог за минимална плата од 500 евра, а истовремено троши огромни суми на егзотични производи“, истакна Ристова.

Според неа, оваа ситуација е резултат на „неспособноста и негрижата“ на власта, која наместо да работи за доброто на граѓаните, „одработува за интересите на големите трговци“.

Коалиција ВЛЕН претпладнево преку соопштение до медиумите вети дека здравството повеќе нема да биде жртва на лошо управување и злоупотреба и ги истакна достигнувањата на Арбен Таравари, кој на функцијата министер дојде од коалицијата ВЛЕН.

„Клиниката за инфективни болести, по повеќедецениско запоставување, е реконструирана и опремена со најсовремена технологија. Со инвестиција од 1,5 милиони евра првиот кат е претворен во достоен простор за пациентите и медицинскиот персонал.

Главните иновации кои до вчера ги немаше а денес се можни на оваа Клиника. Автоматски молекуларен дијагностички анализатор – единствен во регионот за PCR, CRP и HPV. Апарат за аспирација – целосно автоматизиран, прв од ваков вид во земјата. Дополнителна опрема: ЕХО, ултразвучна еластографија, гастроскоп, бронхоскоп, генератор.

Потсетуваме дека Клиниката за инфективни болести е пример за успешно и ефикасно управување. Затоа, истото темпо на работа и посветеност ќе се применува и во другите Клиники со единствена цел на нашите граѓани да им обезбедиме најквалитетни здравствени услуги.

Здравството во нашата земја е разбудено од “клиничката смрт“ откако ВЛЕН стана дел од владата и го предводи Министерството за здравство. Но, сепак треба да продолжи да се подложува на тежок третман за целосно да се регулира овој систем.

Почетокот на спроведувањето на долгоочекуваните реформи донесе надеж. Напорот за подобрување влијаеше на пациентите, лекарите и целиот медицински персонал, како и администраторите. Здравството во текот на изминатите години ја изгуби не само својата репутација и доверба, туку и квалитетот на услугите кои се најпогодни за пациентите.

Здравството, како најважна алка во функционирањето на една држава кај нас, долго време беше осакатено. Бидејќи воопшто немаше инвестиција, се создаде систем кој лошо функционираше, каде здравството беше оставено во мизерија, а политичарите се лекуваа во странство. Оваа практика ќе заврши со новата влада, Владата на ВЛЕН, бидејќи ние сме посветени на подобрување на целиот здравствен систем.

Јавните здравствени установи ќе добијат поголем буџет од 100 милиони евра. Тоа значи дека годинава буџетот за јавните здравствени установи ќе биде околу 540 милиони евра. Но, тоа не е се. Потсетуваме дека по долги години позитивната листа на лекови е подобрена со 9 нови лекови. И, за прв пат во историјата на Северна Македонија, ќе бидат ангажирани 1.200 нови специјалисти со решенија со кои ќе се надополни медицинскиот персонал за граѓаните да добијат најквалитетни здравствени услуги“, стои во соопштениео од ВЛЕН.

Пратеникот на ВМРО-ДПМНЕ, Антонијо Милошоски го обвини поранешниот претседател Стево Пендаровски за неодржување доследност во своите ставови, особено во врска со промените на македонскиот Устав и неговите последни изјави за САД и нивниот новоизбран претседател.

Милошоски истакна дека Пендаровски во 2020 година тврдеше дека било „ван памет“ да се разговара за промена на Уставот, но подоцна стана главен промотор на промени, што според него, го доведува во прашање неговото кредибилитет.

„Пендаровски во 2020 година го отфрлаше барањето за промена на Уставот, но потоа, како што обично прави, наведна глава пред политичките интереси и се приклучи на промена на Уставот под притисок на други фактори. Таквите непринципиелни ставови се контрадикторни и ги поткопуваат неговите претходни изјави“, изјави Милошоски.

Тој исто така го критикуваше Пендаровски за неговите јавни изјави во кои го оспорува американскиот демократски легитимитет. Милошоски тврди дека Пендаровски нема право да ја оспорува волјата на американските граѓани, а особено не смее да ги напаѓа демократски избраните лидери на САД.

„Пендаровски, ако не може или не сака да помогне на Македонија на меѓународен план, тогаш барем нека не ѝ одмага. Не му треба да ја руши позицијата на земјата. Ако беше искрен во своите обврски, ќе се фокусираше на македонскиот интерес, а не на политички амбиции и споделување ставови со луѓе блиски до Сорос“, додаде Милошоски.

ВМРО-ДПМНЕ и Милошоски ја потсетуваат јавноста на важноста од одржување на стратешкиот партнерски однос со САД, кој според нив, треба да биде над партиските разлики и смените на владите и претседателите во двете земји.