На денешната средба со членовите на работната група при Советот на ЕУ, која е надлежна за земјите што преговараат за пристапување и членство во ЕУ, претседателот на Собранието на Република Северна Македонија, Талат Џафери, посакувајќи им добредојде на гостите, меѓу другото, го потенцира и своето задоволство што, конечно, со почетокот на оваа соработка се потврдува и нашиот почеток на пристапните преговори со ЕУ.

Во тоа име се заблагодари за досегашниот ангажман на работната груба (COWEB), која досега беше надлежна за земјите од Западен Балкан. Тој исто така изрази задоволство поради отворањето на првата меѓувладина конференција меѓу ЕУ и Република Северна Македонија во јули оваа година, што претставуваше и официјален почеток на преговорите со Европската Унија.

Претседателот Џафери пред членовите на оваа работна група ги потенцира исто така и долгите преговори и консултации во врска со преговарачката рамка, кои резултираа со заклучоците што ги донесе Собранието. Со нив ја задолжи Владата во текот на преговорите доследно да се придржува кон определбата за безусловно почитување на идентитетските, јазичните, културните и историските особености на македонскиот народ.

Џафери изрази надеж дека ќе следува успешна и плодна соработка, како и успешно завршување на преговорите, што ќе води кон полноправно членство на Република Северна Македонија во ЕУ.

Во име на присутните гости од Советот на ЕУ благодарност до претседателот Џафери упати и шефот на делегацијата на ЕУ во Република Северна Македонија, амбасадорот Дејвид Гир, кој го потенцира историскиот момент што се случи во јули оваа година со почнувањето на преговорите со Европската Унија, а оваа средба во Собранието ја нарече симболичен почеток и симболична промена, која ќе резултира со пристапување кон институциите на ЕУ.