Полициски службеници од повеќе организациски единици од секторите за внатрешни работи Битола, Велес, Штип и Струмица во текот на вчерашниот ден реализираа превентивни активности на разни теми, претежно посветени на најмладите по повод Детската недела, како и од областа на сообраќајната безбедност, заштитата од имотни деликти, превенцијата од пожари и бесправната сеча на шуми.

Така, на подрачјата на секторите за внатрешни работи Струмица и Штип, односно во Радовиш и Берово, по повод Детската недела, полициските службеници од ОВР Радовиш беа домаќини на дечиња од детската градинка „Ацо Караманов“, објект „Цветови“ од Радовиш, а во посета на ОВР Берово беа децата од градинката „23 Август“ од Берово.

Децата имаа можност да се запознаат со професијата полициски службеник, со дел од полициските овластувања и работни задачи, особено за улогата на сообраќајниот полицаец и полицаецот позорникар, а дополнително им беа презентирани и дел од материјално-техничките средства и опремата што ја користат полициските службеници и полициските возила.

Во Битола, пак, односно во основните училишта „Тодор Ангелевски“, „Ѓорѓи Сугарев“ и „Трифун Пановски“ за првачињата беа организирани едукативни презентации на кои тие беа запознаени со сообраќајните правила и прописи важни за нив како пешаци или велосипедисти. Во Демир Хисар и во Ресен, исто така на подрачјето на СВР Битола, беа спроведени превентивни активности од областа на заштитата од пожари и од незаконска сеча на огревно дрво, како и од областа на превенција од имотни деликти во стопански објекти – кражби, разбојништва и измами.

И на подрачјето на СВР Велес, односно во Кавадарци, беше реализирана активност од проектот „Безбедна заедница – мирна заедница“ насочена кон превенција и самозаштита од кражби и измами, пред сè, кај повозрасните категории граѓани.