Македонија
Средствата од заемот од Велика Британија ќе се враќаат по реализација на проектите

Средствата од заемот од Велика Британија ќе се враќаат по реализација на проектите. Министерот за транспорт, Александар Николоски, изјави дека условите за враќање и каматните стапки ќе бидат подобри од било што Македонија што позајмила претходно.
„Македонија добива најголем обем на средства досега за капитални проекти и со најдобри можни услови што може да се обезбедат во овој момент. Финансирањето ќе биде врзано со проектот, односно средствата ќе се враќаат откако проектот ќе се реализира и ќе почне да ја враќа инвестицијата“, објасни Николоски.
Прв бран на проекти што ќе се реализираат со договорот Влада со Влада со Обединетото Кралство се изградбата на брзата пруга од Табановце до Гевгелија, изградбата на клиничка болница во Штип, изградба на нов медицински факултет во Штип и студенски дом со 200 легла во Штип, понатаму реконструкција на клиничката болница во Тетово и изградба на болница со здравствен дом во Кичево, истакна вицепремиерот Николоски.
„Од четирите чекори, првиот веќе го имаме тоа се проектите. Сега одиме на прaвната рамка која што ќе ја завршиме во четврток и потоа набрзо да го ратификуваме Договорот во Собрание. И врз основа на тоа потоа одиме на финансирање. Нема да се работи за фиксно финансирање туку тоа ќе биде врзано со проектот. Кај некој проекти рочноста ќе биде пократка кај некои подолга, тоа ќе зависи од кондицијата на македонската економија и буџетот, од самиот проект итн. Тоа е прво, второ е тоа што се водевме од интересите на државата и во таа насока две работи се сигурни. Едно што волку средства ниту една друга меѓународна финансиска институција не е во можност воопшто да и ги понуди на Македонија, без ралика на каматна стапка, роковите за враќање итн. Второ е дека условите за враќање и каматните стапки ќе бидат подобри од било што Македонија што позајмила претходно. На наше инсистирање, средствата ќе ги враќаме откако ќе ги реализираме проектите, односно, грејс периодот да го врземе со периодот на завршување на проектите со цел проектот да носи пари а во здравството да носи бенефит во здравствената заштита”, изјави вицепремиерот Николоски.
Тој додаде дека ова е поттик за останатите државни институции да креираат проекти кои ќе бидат подготвени за финансирање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Османи: Влегов во оваа трка не за да заменам една личност со друга, туку за да го скршам менталитетот на „не можам“

Кандидатот за градоначалник на Општина Чаир, Бујар Османи, на денешната прес-конференција ја истакна својата решеност да ја промени дводецениската матрица на управување со општината со изговорот „не можеме“, кога станува збор за реализирање на крупни проекти во интерес на граѓаните. Тој порача дека неговата кандидатура не е борба против личности, туку против менталитетот на „не можам“, кој, како што рече, го кочи развојот на Чаир веќе 20 години.
Тој потсети дека повеќе од 20 години, од основањето на општината, Чаир се води без план, без идеја и без храброст, а граѓаните се навикнати на изговори и поразителното „не може“.
„Имало многу ветувања, во секоја изборна кампања. Но секогаш по нив следело: ‘Не може’. Повеќе од 20 години една клика ни инсталираше начин на размислување дека ‘ние не можеме’, дека ‘ова ни е судбина’. Јас влегов во оваа трка не за да заменам една личност со друга, туку за да го скршам тој начин на размислување“, нагласи Османи.
Тој истакна дека промената што ја предлага не е само инфраструктурна, туку ментална и политичка трансформација, со јасна визија за иднината на Чаир.
„Во секоја институција каде што сум работел, сум го предизвикувал менталитетот дека ‘не може’. И кога влегов во преговорите за името, за НАТО, за официјализирањето на албанскиот јазик, сите велеа ‘не може’. Но јас секогаш сум влегувал со уверување дека треба да се предизвика, затоа што храброста е таа што ги реализира промените, не само идеите“, рече Османи.
Тој ја поврза оваа порака со најзначајниот проект во неговата програма, реализација на „Плоштад Лирија“ и подземна сообраќајница, кој треба да го реши најголемиот инфраструктурен проблем во општината и да ја трансформира во модерен и функционален центар.
„Идеи можеме да имаме многу, но мора да имаме храброст да преземеме одговорност за големите идеи“, порача Османи.
Тој подвлече дека реализацијата на проектот „Плоштад Лирија“ и подземна сообраќајница веќе започнала со подготвителната фаза, со планирање на средства од Европската Унија, Владата, Град Скопје и сопствените општински фондови, со цел да се обезбеди стабилно финансирање.
„Овој проект ќе го скрши менталитетот на ‘не може’. Храброста е таа што ги решава големите животни и општествени предизвици“, заклучи Османи.
Македонија
Почина Панчо Минов, поранешен пратеник и градоначалник на Кавадарци

На 67-годишна возраст денеска почина Панчо Минов, поранешен градоначалник на Кавадарци и поранешен пратеник во Собранието.
Панчо Минов беше дипломиран правник и политичка фигура со повеќедецениско искуство. Тој два пати беше избран за градоначалник на Општина Кавадарци – прво како кандидат на Либералната партија (2000–2005), а потоа како независен кандидат (2005–2009).
Минов имаше и пратеничка кариера, учествувајќи во повеќе состави на Собранието.
Првпат беше избран во првиот повеќепартиски состав (1990–1998), а подоцна повторно стана пратеник преку ГРОМ (2016–2020) и СДСМ (2020–2024).
Македонија
Уште колку луѓе треба да настрадаат за Панче Тошковски да почувствува одговорност, прашуваат од СДСМ

Министерот Панче Тошковски без око да му трепне јавно соопшти дека не чувствува никаква одговороност за колапсот на безбедносниот систем и фактот што на улиците се пука како да сме Див Запад, велат од СДСМ.
Според нив, последиците од партизацијата на полицијата и претоварењето во партиски сервис на ДПМНЕ скапо ги чини граѓаните.
„До кога мисли Тошковски да се криe зад политички реторики додека улиците стануваат небезбедни за граѓаните?
Не е само последното пукање во Куманово, непрекинатиот раст на вооружените и насилни инциденти во различни градови е сигнал за целосно системско потфрлање на безбедниот апарат, нема ниту превенција ниту соодветна реакција.
За тоа мора да има одговорност“, додаваат од оваа партија.