Самостојниот синдикат на новинарите и медиумските работници – ССНМ изразува најостра осуда и протест поради директните закани кон новинарката Снежана Лупевска-Созен и телевизијата „Телма“ искажани вчера за време на интервјуто на „Топ-тема“ од страна на сопственикот на „ИГМ трејд“, Илија Гечев.

„Јавната закана дека Лупевска ќе биде повеќекратно тужена, со ангажирање најдобри и скапи адвокати, не е многу поинаква од закана за физичка пресметка. Методите можеби се разликуваат во зависност од позицијата, воспитувањето и економската моќ на заканувачот, но целта е иста – да се замолчи новинарот и да се обесхрабри раководството на медиумот да протежира истражување прашање од јавен интерес“, велат од ССНМ.

Од таму додаваат дека користењето тужби како закана и притисок врз новинарите и медиумите во кои тие работат е постојано посочувано како проблем од страна на новинарската заедница, а сега јавноста имаше можност во живо да се увери на каков третман се изложени новинарските екипи кога истражуваат случаи во кои се инволвирани лица што се доживуваат, а и де факто имаат третман на моќници.

„ССНМ јавно бара од Стопанската комора на Македонија да организира обуки на своите членки каде што тие ќе бидат дополнително едуцирани за слободата на изразување, општествената одговорност и јавниот интерес. Затоа што се покажува дека чувството за јавен интерес и општествената одговорност се правопропорционални со моќта. Само на тој начин новинарите ќе може без притисоци и закани да си ја извршуваат својата работа, а компаниите да го задржат својот интегритет и да научат да се справуваат со општествената одговорност“, велат од ССНМ.