Македонија
Стоилковски: Ковачевски се повикува на непостојни изјави од Софија дека „немало нови услови“, а нема осуда за пораките за 2 Август од Бугарија

Јавноста и денеска е покуса за информацијата каде летува Димитар Ковачевски и од кога е заминат во странство, имајќи предвид дека е објавено интервју со него кое што не кореспондира со реалноста и актуелните случувања. Да бевме малициозни ќе прашавме дали интервјуто е резултат на изложеност на сонце или место Ковачевски одговарал Артан Груби, вели Наум Стоилковски, портпарол на ВМРО-ДПМНЕ.
„Пораките на Ковачевски во последното интервју се несериозни и не може да се врзат со реалноста. Ковачевски се повикува на непостоечки изјави од Софија дека, како вели, нема нови услови. Истовремено, нема осуда за пораките за 2-ри Август од Софија.
Имено и бугарскиот претседател Радев и бугарскиот премиерот Денков, Илинденското востание го декларираа како бугарско, чија крајна цел била присоединување на Македонија кон Бугарија. Ова е историска невистина, претставува директно негирање на македонскиот идентитет и темелот на македонската државност, но и патоказ за бугарското делување во иднина“, вели Стоилковски.
„Ковачевски ова го премолчи во интервјуто и нема ниту збор за него. Јасно е дека Бугарија е подготвена преку протоколите и преговарањето за заедничката историја да го смени целосно наративот на македонската историја и државност и истото да го претвори во услов за нашето напредување кон Европа. Ковачевски ова го прифати, па сега бара национален консензус.
Што значи, со други зборови, други да ја споделат со него одговорноста за катастрофалната политика и дипломатија.
Националното единство Ковачевски со неговата ароганција и игноранција пропушти да го направи пред точно една година“, изјави Наум Стоилковски.
Портпаролот на ВМРО-ДПМНЕ порача дека промена на Уставот под бугарски диктат нема да има.
„И тогаш и сега велиме: потребни се институционални гаранции од ЕУ за многувековниот идентитет на македонскиот народ, но и гаранции дека процесот на преговори нема да се претвори во подвижна цел во која ќе следат нови и нови условувања до целосна асимилација на Македонија и македонскиот народ. Промената на Уставот под бугарски диктат не е решение, туку само ги отвора апетитите на негаторските кругови во Бугарија. За ова прашање, Ковачевски нема национален консензус со над 85% од јавноста. Единствениот консензус којшто е можен и неопходен е консензус за итни предвремени избори. Изборите имаат за цел суверенот на Македонија, народот, да каже каква политика ќе се води по ова прашање. Борбата за интересите на Македонија е долга и нема предавање и доведување пред свршен чин“, изјави Стоилковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Движењето ЗНАМ со панел-дискусии одбележа една година дел од Владата

Во полна сала, со силна енергија и инспиративни пораки, Движењето ЗНАМ –за наша Македонија, одржа панел дискусија под мотото „Посветеност –Отчетност – Резултати“. Во фокусот на настанот беше една година учество на Движењето ЗНАМ – за наша Македонија во Владата и што е направено досега.
Настанот беше поделен во два тематски панели, кои отворија прашања за реформите во јавната администрација, енергетиката, животната средина, правосудството, дигитализацијата, пензискиот систем, односите со верските заедници и здравството.
Во рамки на првиот панел „Јавната администрација и зелената иднина“,
каде панелисти беа министерот за јавна администрација Горан Минчев,
заменик-министерот за енергетика, рударство и минерална суровина
Мирослав Лабудовиќ, државниот секретар во министерството за
земјоделство, шумарство и водостопанство Борче Серафимовски,
директорите на Државниот инспекторат за животна средина Ивана Гиновска и Институтот за Акредитација Нико Берберу. Се говореше за реформските закони, енергетиката, земјоделието, животната средина и европската акредитација. Во него беше потенцирано дека реформите во државната служба се движат кон поефикасен, инклузивен и модерен јавен сектор кој е во служба на граѓаните. Истакнати беа стратешките вложувања во енергетиката и поддршката за земјоделците, особено младите, со фокус на дигитализација,
задругарство и климатска отпорност.
Дополнително, беа презентирани политики за заштита на животната средина засновани на превенција и одговорност на сите општествени чинители, како и значењето на европската акредитација за конкурентноста на македонската економија.
Низ вториот панел „Силни институции – стабилно општество“, министерот за правда Игор Филков, заменик министерот за дигитална трансформација Радослав Настасијевиќ Варџиски, директорот на Фондот за ПИОМ Никола Мемов, претседателката Комисијата за односи верските заедници и директорот на Клиниката за физикална медицина Злате Мехмедовиќ.
Во дискусиите панелистите истакнаа дека реформата започнува со
транспарентна комуникација, дигитална достапност, правна сигурност и
социјална инклузивност.
Вториот панел ја нагласи клучната улога на транспарентноста и реформите во правосудството, при што беа презентирани системски закони насочени кон зајакнување на интегритетот, професионалноста и независноста на судството, како и целосно нов Закон за Судски совет.
Панелистите дискутираа и за стабилизацијата на пензискиот систем,
дигиталната трансформација на институциите, унапредувањето на
здравството и важноста од градење на општество засновано на меѓусебна почит и верски дијалог.
Движењето ЗНАМ уште еднаш покажа дека со интегритет, стручност и
посветеност, Македонија може да чекори напред – обединета, сигурна и достојна, со најава дека настани од ваков тип ќе следат низ целата
држава.
Македонија
Директорот на БЈБ на планинарски марш од пет километри во тетовско: Службата не е само униформа – таа е братство

Директорот на Бирото за јавна безбедност во Министесрвтвото за внатрешни работи (МВР), Александар Јанев, денеска учествуваше на планинарски марш со полициски службеници од СВР Тетово, извести МВР. Досега вакви маршови се пдржаа во Велес, Струмица и Битола.
„Во духот на соработката, заедништвото и искрената комуникација, заедно го градиме оној полициски идентитет кој значи блискост со граѓаните, одговорност кон задачата и сила која извира од заедничките вредности. Надвор од канцелариите и рутините, утрово низ заедничка активност со пешачење од околу 5 км низ тетовскиот регион имавме можност да го јакнеме тимскиот дух, но и – што е најважно – подлабоко да се дозапознаеме, да зборуваме отворено за предизвиците на теренот, за реалните проблеми со кои се соочуваме, и за начинот како уште повеќе да се доближиме до граѓаните од Тетовскиот регион. Полицијата не се мери само со акции и бројки. Таа се мери со довербата што ја има кај народот. А таа доверба се гради со постојано присуство, искрен дијалог и подготвеност да се биде со граѓаните – и кога е тешко, и кога е мирно.“, кажа на маршот директорот Јанев.
Директорот Јанев потенцираше дека градиме полиција која не се плаши да ги погледне проблемите во очи и што чекори напред со дигната глава – за стабилноста на државата, за безбедноста на граѓаните, и за достоинството на полициската професија.
„Македонија има полиција што се движи напред – тим по тим, регион по регион – со срце за народот и со сила за предизвиците. Градиме тимови што се потпираат еден на друг – мотивирани, дисциплинирани и посветени на заштита на секој граѓанин. Затоа што секоја лична победа е колективна сила, а секој ден е нова можност да станеме подобри – за себе, за колегите, и за Македонија.“, истакна на крај Јанев.
Македонија
Средба Филипче-Клингбајл во Берлин: Македонија мора да продолжи по европскиот пат

Претседателот на Социјалдемократскиот сојуз на Македонија, Венко Филипче, денеска во Берлин, Сојузна Република Германија, во рамки на Конгресот на германската Социјалдемократска партија (СПД), се сретна со актуелниот вицеканцелар на Германија и сојузен министер за финансии, Ларс Клингбајл, кој воедно е и ко-претседател на СПД.
Од СДСМ известија дека на средбата, претседателот Филипче изразил благодарност до вицеканцеларот Клингбајл, за континуираната и силна поддршката на СПД за евроинтеграцискиот процес на Македонија, посочувајќи дека како сестрински партии, ја споделуваат истата визија за праведна, обединета и солидарна Европа.
„Филипче и Клингбајл разговараа за забрзувањето на евроинтеграцискиот процес на Македонија, како и на земјите од регионот и Западен Балкан, оценувајќи го како клучен процес за стабилизација, развој и напредок на државите-кандидатки за членство во Европската Унија. Беше посочено дека само со вистинска интеграција во ЕУ може да се обезбеди одржлив напредок – и економски и институционален, особено во однос на владеењето на правото и борбата против корупцијата.
Заеднички беше ставот дека Македонија мора да продолжи по европскиот пат, како единствена алтернатива за напредок и подобра иднина на државата“, извести СДСМ за средбата на лидерот во Берлин.
Филипче го потсетил Клингбајл дека во периодот на Владата предводена од СДСМ беа реализирани клучните стратешки цели – Македонија стана членка на НАТО и ги отпочна преговорите за членство во ЕУ.
Обајцата на средбата ја нагласиле потребата од натамошно унапредување на меѓупартиската соработка и размена на искуства меѓу СДСМ и СПД, како сестрински партии кои делат заеднички социјалдемократски вредности, базирани на солидарност, еднаквост, владеење на правото и социјална сигурност.