Не запира самоволието на власта и злоупотребите на функциите и парите од граѓаните, обвини денеска портпаролот на ВМРО-ДПМНЕ, Наум Стоилковски, кој конкретно зборуваше за Ташко Дојчинов и кумулацијата на две државни функции од негова страна.

„Дојчинов е избран претседател на Советот на Општина Гевгелија, претседава со Советот на оваа општина од октомври 2017 година, а од октомври 2018 година, една година подоцна, истовремено додека е функционер во Гевгелија, од Собранието на Република Македонија е именуван и за член на Државна комисија за одлучување во управна постапка и постапка од работен однос во втор степен“, нагласи Стоилковски.

Како што рече портпаролот, станува збор за кумулација на две функции, од кои едната е избрана, а втората е именувана, што е спротивно на законот.

„За жал, иако темата постоеше во јавноста, антикорупциската комисија не реагираше. Но, не реагираше ниту Дојчинов, којшто е свесен дека согласно членот 44 од Законот за спречување на корупцијата не смеел да биде именуван на втора функција. Тоа претпоставува негова умисла за тоа што во периодот од октомври лани до мај годинава противправно се стекнал со околу 900 илјади денари. Овие се пари коишто ги добивал по основ на бруто-плата, но и закупнина за стан и трошоци во Скопје. Со тоа постојат услови за кривична одговорност и можност за враќање на парите во државниот буџет“, истакна портпаролот на опозициската партија.

Стоилковски напомена дека со оглед на тоа што во овој случај ДКСК сама не постапила по допрен глас, сега имаат претставка од ВМРО-ДПМНЕ со која партијата бара да се утврди недозволена кумулација на функции.