Заменик министерот за социјална политика, демографија и млади Ѓоко Велковски ја водеше втората седница на Советот за следење на имплементацијата на Проектот за администрирање на социјалното осигурување – СИАП.

Пред присутните, Велковски накратко се осврна на СИАП проектот за чие имплементирање и координирање надлежно е Министерството за социјална политика, демографија и млади, како и на Советот за следење на неговата имплементација и на улогата на Советот.

Основна цел на Проектот е подобрување на квалитетот на услугите во администрирањето на социјалното осигурување и унапредување на законската рамка која ги уредува прашањата кои се однесуваат на вработувањето и работното оспособување на лицата со попреченост и ревидирањето на листата на работните места со стаж на осигурување со зголемено траење (бенефициран стаж).

„Според активностите на проектот, може да се заклучи дека станува збор за прилично комплексен и обемен проект од аспект што неговата реализација ги вклучува речиси сите институции на задолжителното социјално осигурување, па и повеќе. Поради тоа, формиран е Совет кој има за задача да го следи спроведувањето на активностите во рамки на институциите надлежни за имплементација на СИАП проектот и роковите за нивно спроведување и да носи заклучоци за прашања поврзани со спроведувањето на активностите од Проектот“, рече Велковски.

На денешната седница на Советот, беше разгледана информацијата за активностите во СИАП проектот и нивниот тековен статус на имплементација, а фокусот беше ставен на воспоставувањето на единствениот регистар на задолжително социјално осигурување.

Денес одбележуваме важен јубилеј, одбележуваме 80 години од ослободувањето на нашето Скопје – момент кој значи не само ослободување од тешкото бреме на војната, туку и почеток на самостојност, независност и непрекината борба за подобро утре, се истакнува во соопштението од Град Скопје по повод денот на ослободувањето на Скопје.

„Овој историски ден е симбол на победата на духот, на решителноста и храброста на генерациите што со својата пожртвуваност ја донесоа слободата за сите нас. Тие херои, со неуморната борба за правда и достоинство, ни оставија аманет да го негуваме и почитуваме она што тие го постигнаа – да го градиме Скопје како град на успеси и перспективи.

80 години подоцна, ние сме сведоци на независна и суверена Македонија, и Скопје како нејзин центар на културата, напредокот и единството. Оваа годишнина е момент да се обврземе и да ги вложиме нашиот труд и посветеност за нови победи и постигнувања во иднината.

Со гордост и почит да се однесуваме кон споменот на нашите предци и нивните дела, и обединети во напорите да го направиме нашиот град поубав, поуспешен и посветол за идните генерации“, е нагласено во информацијата од градоначалничката на Скопје, Данела Арсовска.

Општина Центар и Здружението на пензионери на општината, со хуманитарниот „Фестивал на симит и погача во срцето на Скопје“, го прославија големиот јубилеј – 80 години слободно Скопје.

Во чест на 13 Ноември, пред муралот на Горан Стефановски беше организиран добротворен базар со автентичните скопски специјалитети, а настанот го збогатија учениците од ООУ „Коле Неделковски“ со рецитации и песни за својот град.

На фестивалот присуствуваа гости од пензионерските здруженија на другите општини, претставници на Сојузот на здруженијата на пензионери на Македонија и Сојузот на борци на Македонија.

Градоначалникот Герасимовски честитајќи го Денот на ослободување на Скопје, потсети на херојските подвизи на партизаните.

„Токму овде, во Дебар Маало кај некогашната учителска школа, се водеа најжестоките битки за слободата во која денес живееме. Да се поклониме пред храброста на нашите борци и да ги поттикнеме младите достојно да го чуваат наследеното и да го негуваат слободарскиот карактер на нашето Скопје“, порача Герасимовски.

Во духот на заедништвото и почитување меѓу генерациите, пензионерките на штандовите понудија домашно подготвени печива, внесувајќи чувство на носталгија и семејна топлина. Со свои производи се приклучија и локалните пекари и слаткарници, создавајќи вистинско гастрономско уживање за сите присутни.

Собраните средства од базарот ќе бидат наменети за Универзитетската клиника за детски болести, а храната што не е продадена ќе биде донирана на „Ретвитни оброк“, иницијатива за поддршка на бездомниците и социјално загрозените лица.

Овој фестивал е дел од проектот во рамките на програмата за култура на Општина Центар: „Возрасните за младите, младите за возрасните“, кој ги обединува сите генерации во прославата на нашата традиција и иднина.