Македонија
Стојаноски: Во ревизорскиот извештај за Клиниката за онкологија се наоѓа потврда за системскиот криминал

Денес, на Комисијата за финансирање и буџет, ќе се разгледува конечниот извештај за извршена ревизија на финансиските извештаи и ревизија на усогласеноста за 2021 година на јавна здравствена установа Универзитетска клиника за радиотерапија и онкологија – Скопје.
„Ова е првпат во историјата на Собранието на Република Македонија да биде разгледуван поединечен ревизорски извештај. Од извештајот гледаме дека Државниот завод за ревизија изразил неповолно мислење во однос на вистинитоста и објективноста на финансиските извештаи, како и за усогласеноста на финансиските трансакции со релевантната законска регулатива за 2021 година.
Од ревизорскиот извештај можеме да констатираме огромни пропусти во работењето на раководството на клиниката. Одговорни лица на клиниката во 2021 година се д-р Никола Васев, кој е в.д. медицински директор од јуни 2017 година, и Нехат Нухи, кој е организациски директор од јуни 2021 година“, вели Бојан Стојаноски, пратеник од пратеничката група на ВМРО-ДПМНЕ.
„Не може да се амнестираат ниту министрите за здравство во тие периоди бидејќи и тие имаат клучна одговорност во дизајнирање на систем на функционирање помеѓу Министерството, Фондот и јавните здравствени установи.
Нивна е одговорноста за дизајнирање, имплементирање и одржување на интерната контрола, како и спроведување активности, финансиски трансакции и информации во согласност со релевантната законска регулатива, упатства и воспоставени политики.
Во овој ревизорски извештај се наоѓа потврда за системскиот криминал на Клиниката за радиотерапија и онкологија и затоа ќе ви прочитам еден извадок од ревизорскиот извештај.
„Клиниката нема донесено пишана процедура за процесот на прием, издавање, трошење и евидентирање на резервата лекови и медицински потрошен материјал во рамките на аптеката и секоја организациска единица одделно. Работењето во оваа област се одвива во согласност со воспоставена пракса, а месечните извештаи врз основа на кои се евидентира потрошувачката на резервите не се соодветно архивирани, потпишани и одобрени од страна на одговорните лица на организациските единици“.
Дополнително, сакаме да потенцираме дека во текот на 2016 година Министерството за здравство набавило линеарен акцелератор во вредност од 1,7 милион евра, кој до денес не е ставен во употреба. Како резултат на неговото некористење, истечен е гарантниот рок и не може да се даде понуда колку би чинело негово инсталирање и пуштање во употреба“, изјави Стојаноски.
„За крај, само сакам да истакнам дека раководството на Клиниката за радиотерапија и онкологија воопшто немало коментари и забелешки на овој ревизорски извештај, што укажува на можна политичка заштита од врвот на извршната власт.
Состојбите на Клиниката за радиотерапија и онкологија се алармантни и повеќе од загрижувачки. Овој извештај преставува крунски доказ за случувањата во клиниката.
На денешната седница на Комисијата за финансирање и буџет повикан е и државниот јавен обвинител Љубомир Јовески, кој ќе треба да одговори како е можно да има толку големи прекршувања, а тие сè уште да немаат поведено обвиненија. До нас има информации дека Државниот завод за ревизија го има пратено ревизорскиот извештај и до Јавното обвинителство уште во март оваа година. Дали доколку медиумите не објавеа дека биолошка терапија е продавана во Косово, Јавното обвинителство ќе почнеше истрага за работењето на Клиниката?
Пратеничката група на ВМРО-ДПМНЕ и коалицијата „Обнова на Македонија“ во текот на наредните неколку денови ќе го прашува државниот ревизор подетаљно да ни ги опише случувањата во Клиниката за радиотерапија и онкологија со цел добивање дополнителни информации, кои ќе бидат искористени од анкетната комисија со цел побрзо расветлување на овој грозоморен чин.
На крајот, ќе предложиме заклучоци за брзо надминување на пропустите, а од државниот обвинител ќе побараме истрагата да се интензивира и во најбрз можен рок да се поведе обвинение за овие грозоморни случувања“, додаде Бојан Стојаноски, пратеник од пратеничката група на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.
Македонија
Тошковски – Поклукар: Одлична соработка на полето на безбедноста, Словенија ја дава својата поддршка во секој чекор

Денеска во Охрид, министерот за внатрешни работи Панче Тошковски, оствари работна средба со делегација на Министерството за внатрешни работи на Словенија, предводена од министерот Боштјан Поклукар.
На средбата фокусот беше ставен на унапредувањето на меѓусебната соработка и продлабочување на одличните пријателските врски меѓу двете министерства и полиции во борбата против организираниот криминал, ситуацијата со илегалната миграција, внатрешната контрола и соработката помеѓу центрите за обука на полициските службеници. Македонската делегација на средбата предложи потпишување на Меморандум за разбирање помеѓу Центарот за обука на МВР и словенечката полициска академија за зајакнување на соработката во областа на образованието и заедничките обуки на кадетите и полициските службеници од двете полиции.
Тошковски се заблагодари на министерот Поклукар за целата поддршка што Словенија и словенечкото министерство за внатрешни работи постојано ни ја даваат како министерство и држава, како во справување со пожарите минатата и оваа година така и целата поддршка што ни ја дадоа во справување со последиците од трагедијата која се случи во Кочани оваа година.
„Република Словенија и нивното министерство се едни од клучните партнери и поддржувачи во реформите кои ги правиме, преку користење на нивното знаење и искуство, како за новите закони за полиција и внатрешни работи. Отпочнуваме соработка и во нашата иницијатива за отворање на Регионална асоцијација на полициски академии, обуки за полициските службеници со цел професионализација, доедукација со цел креирање на ефикасна европска полиција“, образложи Тошковски.
ТПотенцираше дека преку министерот Поклукар, пријателската Словенија уште еднаш ја потврдува својата поддршка како еден од нашите најголеми поддржувачи во процесот на евроинтеграции, со тоа што се вложи со целиот негов тим да бидат на располагање на македонските полициски службеници и МВР во однос на исполнување на сите услови и критериуми зададени од Европската унија.
Словенечкиот министер за внатрешни работи Боштјан Поклукар го потенцираше пријателството и соработката што меѓу нашите народи и држави се пренесува и на министерствата за внатрешни работи и потенцираше дека и во иднина можеме да сметаме на нивната целосна поддршка како во искуство и знаење така и на конкретни проекти и ситуации со цел да придонесуваме кон поголема безбезбедност на регионот, нашите држави и нашите народи.
„Наша оценка е дека министерството за внатрешни работи и македонската полиција прават одлична работа и тоа секогаш сум го истакнувал и во Европа како член на советот на министри за внатрешни работи на Европа. Одличната идеја за Регионална асоцијација на полициски академии ќе ја поддржиме и учествуваме во неа за да креираме професионални полиции на Балканот за побезбеден регион за сите. Ние сме веќе сојузници заедно во НАТО и нашата поддршка ќе продолжи во секој ваш чекор кон приклучување во нашето европско друштво на нации каде е и вашето место“, потенцираше словенечкиот министер Поклукар.
Поклукар истакна дека Словенија целосно ја поддржува Македонија на интегративниот пат кон Европската Унија и ја изрази спремноста за помош на европскиот пат кој на крај носи огромни бенефити за граѓаните и функционирањето на институциите и изрази надеж дека заслуженото место на Македонија во ЕУ ќе дојде што поскоро.