Македонија
Стојаноски до Бојмацалиев: Дали со законот за откуп на станови што го предлагате и вие ќе стекнете такво право

Пратеникот од ВМРО-ДПМНЕ, Бојан Стојаноски, го праша дополнителен заменик министер за внатрешни работи, Митко Бојмацалиев, дали со законот за откуп на станови кој го предлага, и тој ќе се стекне со такво право и уште 30-ина лица.
Стојаноски вели дека Бојмацалиев наместо да работи и да размислува за решение на проблемот со пасошите или со организирање на фер и демократски избори, се занимава со Закон за кој што, како што вели, тој и свитата околу Оливер Спасовски има личен интерес.
„Ова е само уште еден Ваш очајнички обид во заминување со кој што покажувате дека примарна цел и приоритет Ви е лична корист, а не решавање на реалните проблеми на сите припадници на МВР.
Како и за многу работи досега, криејќи се зад чесните полициски службеници кои навистина заслужуваат да им биде решен статусот е вашиот личен интерес и интересот на малкумина на кои изминатите години лично Спасовски како министер без никаков услов им доделил службени станови.
Господине Бојмацалиев, неколку прашања до Вас на кои се надевам дека ќе имате доблест да одговорите:
Во МВР има 12.000 вработени. Со Вашиот Предлог на Закон ќе се решат околу 30-мина од нив.
– Може ли да ги објавите имињата на тие кои со овој Закон ќе добијат можност да ги откупат становите?
– Колкумина од овие ‘’повластени добитници’’ се полициски функционери кои извршувале високи полициски функции во времето на Оливер Спасовски?
– Дали и Вие како некој што поседува решение за користење на службен стан со овој Закон ќе се стекнете со законска можност истиот да го откупите?
Овој закон е директен приказ и огледало на Вашите карактери. Менаџирањето на ова прашање во изминатите скоро 9 години додека управувавте со Министерството, го водевте исто како и пасошите и личните документи.
За среќа, Министерот за внатрешни работи Панче Тошковски и неговиот кабинет работат на издржано законско решение со кое што на полициските службеници кои навистина заслужуваат и им е потребно решавање на нивните проблеми од ваков карактер, ќе им биде овозможено надминување на истиот.
Ама на вистинските заслужни полициски службеници, не на партиските послушници на Спасовски и на Бојмацалиев кои се вдомиле во државните станови притоа неисполнувајќи ниту еден услов“, рече Стојаноски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Милевски: Виница 4 години назадува, катастрофално владеење на Петков и ВМРО-ДПМНЕ

Така наречениот отчет на градоначалникот Миле Петков и ДПМНЕ е најдобар доказ за четири години катастрофално и досега невидено лошо владеење на една локална власт во Виница, изјави кандидатот на СДСМ за градоначалник на Виница, Гоце Милевски.
Наместо вистински отчет, додаде тој, видовме обид за замачкување на очите на јавноста и бегање од одговорност за неисполнетите ветувања.
„Затоа таканаречениот отчет беше во скап хотел а не на улиците, во градот и селата во Виница. Затоа што реалноста е разочарувачка. Ниту еден од капиталните проекти од програмата на Петков и ДПМНЕ за Виница не се реализирани“, рече Милевски.
Според Милевски, Петков се фалел со наследени проекти од претходната власт на СДСМ и неколку асфалтирани улици.
„Но фактите говорат: сегашната власт нема реализирано ниту 20 километри улици, наспроти 45 километри изградени во времето на СДСМ. Виница денес изгледа како мала депонија од не собереното ѓубре и смет, собирен центар за кучиња скитници, со небезбедни кратери од вода и хаос од неправилно паркираните возила, со запуштени зелени површини и ниту едно ново засадено дрво. Тоа сликата за Виница после 4 години неспособна локална власт на ВМРО-ДПМНЕ. Да не дозволиме оваа казна да продолжи уште четири години! Локалните избори се шанса за промени во Виница“, рече Милевски.
Македонија
Голема акција на Финансиската полиција: уапсени седум лица за даночни измами и перење пари, го оштетиле буџетот за 430 милиони денари

По двегодишна опсежна предистражна постапка, во текот на денешниот ден Управата за финансиска полиција спроведе акција во која беа извршени претреси на повеќе локации на подрачјето на општина Липково, Куманово и Желино.
Се работи за сложена предистрага, која опфаќа повеќе правни и физички лица, а целта е целосно разоткривање на криминална група, која дејстувала подолг временски период и имала цел вршење на кривичните дела злосторничко здружување, даночно затајување, даночна измама и перење пари и други приноси од казниво дело, со намера организаторите и припадниците на групата да стекнат противправна имотна корист во висина од над четиристотини триесет милиони денари, со што е предизвикана огромна штета на буџетот на Република Македонија.
По налог на јавен обвинител од Основно јавно обвинителство за гонење организиран криминал и корупција, во акцијата со асистенција на САЕ „Тигар“ од слобода се лишени седум лица и тие се изведени пред судија на претходна постапка при Основниот кривичен суд, а едно лице не е достапно на органите на прогонот.
Македонија
Утре сончево време, со температура до 34 степени

Времето утре ќе биде сончево со мала до умерена облачност. Попладне во источните делови ќе има услови за локален краткотраен дожд. Ќе дува слаб до умерен ветер претежно од јужен правец, информира УХМР.
Минималната температура ќе биде во интервал од 9 до 18, а максималната ќе достигне од 27 до 34 степени.
Во Скопје сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 14, а максималната ќе достигне до 32 степена.
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец.
За време на викендот времето ќе биде променливо облачно и нестабилно со локален пороен дожд и грмежи. В сабота ќе дува умерен до засилен југозападен, а в недела ветерот ќе го смени правецот во северен.