Македонија
Стојаноски: Економскиот тим на Владата да си поднесе оставка, за 7 години немаат ниту еден капитален проект, а граѓаните едвај преживуваат

„Економијата е онаа платформа на која граѓаните гледаат дали нивниот квалитет на живот е подобар, полош и тоа врз основа на нивната економска состојба ги носат и другите сериозни животни одлуки. Капиталните инвестиции во секој еден Буџет се оние средства кои се одвојуваат за капитални проекти, односно за нови училишта, болници, автопати, патишта, експресни патишта и сето она коешто е како објект, а којшто треба да го зголеми квалитетот на животот на граѓаните“, истакна пратеникот од редовите на ВМРО-ДПМНЕ Бојан Стојаноски на денешната Дебата за Македонија – Економски политики за достоинствен живот и ЕУ интеграција во Неготино во рамки на акцијата „Важно е! Од тебе зависта промените!“.
Тој посочи дека власта на СДСМ и ДУИ изминатите 7 години не заковала ниту една шајка.
„Апсолутно се согласувам со квалификацијата дека една шајка не заковаа, бидејќи ова може најмногу да се види преку оној мерлив критериум дали во изминатите 7 години додека ДУИ и СДСМ се на власт можете да се сетите на некаков голем проект, дали тоа е нов изграден клинички центар, можеби нов стадион, нова сала, некое ново игралиште, ново започнат нов автопат, експресен пат, магистрален пат, за тоа колку локални патишта се изградиле итн., а замислете се потрошија преку 22-23 милијарди евра ако ги соберете сите оние средства кои биле планирани за оваа намена“, рече Стојаноски.
Стојаноски додаде дека власта секогаш кога ќе почне годината вели дека тоа ќе била рекордна година во која се предвидени средства за капитални инвестиции, но средствата секогаш се крадат.
„Секогаш кога ќе започне годината ни велат оваа година ќе биде рекордна година во која се предвидени средства за капитални инвестиции, таква требаше да биде 2023-та година каде овие “Махери за економија” како што ги видовме на овој клип каде не знаат како се донесени одредени одлуки предвиделе 800-тини милиони евра за да ги реализираат во оваа намена и секогаш се случуваат две или три работи кои особено се интересни. На 9-ти месец, заклучно да го земеме и 10 ти месец да го земеме како што сега сме во моментов нема реализација поголема од 55-56% на таа сума и сега невозможно е од 10-ти до 12-ти месец да се реализираат овие средства кои се останати и што се случува? Наместо да изградиме ние тоа некој голем проект кој ќе остане за граѓаните, тие средства се прави одредена злоупотреба преку тоа што се префрлаат кон ЕЛЕМ, Пошти, Македонски железници за да може тие претпријатија да бидат ликвидни, е сега замислете од 2021-та година заклучно со денешниов датум 380 милиони евра се префрлени кон ЕЛЕМ за набавка на електрична енергија и за исплаќање на плати нешто што додека Гордана Димитриеска Кочоска беше во тоа претпријатие или гордо можам да кажам додека ВМРО-ДПМНЕ управуваше со институциите таа компанија беше една од најдобро ликвидните и беше една од најпрофитабилните државни институции. Понатаму може да видите дека тие средства секогаш се крадат или се пренаменуваат во средства кон македонската банка за развој, па се даваат брзи кредити за стопанството и на тој начин се крева процентот на реализација на капиталните проекти“, рече Стојаноски.
Тој истакна дека треба да се погледне и тоа што изградила власта како капитални проекти.
„Кога ќе видиме малку по аналитички дали се имаат изградени капитални проекти еве ќе ве потсетам само на еден проект а тоа е автопатот Кичево – Охрид. Тоа е еден споменик на неспособноста на СДСМ кој замислете го оставивме ние како Влада кога ги напуштавме институциите на 50 проценти реализација, па прво беше трасата искривена, па потоа немало клучки за да ден денес иако кажаа дека рокот е 2023-та година јас ве уверувам тука дека сеуште трасата не е пробиена. Се сеќавате на автопатите Миладиновци – Штип каде не можеа да го завршат безмалку една година или Демир Капија – Смоквица каде само чочек удрија и единствено нешто што направија е што го прекрстија автопатот „Пријателство“„, истакна Стојаноски.
Стојаноски рече дека она што ќе остане како наследство од СДСМ е тоа што државата и граѓаните ќе плаќаат пенали за нереализираните капитални проекти.
„Од она кое треба да се нотира и што ќе остане како наследство на СДСМ е тоа што сите ние тука ќе платиме пенали за нереализирани капитални инвестиции покрај тоа што се обезбедени средства и изработени се проекти и само требаше да ги продолжат. Такви беа зградите на ФИНКИ и ФФК, таква беше ситуацијата и со клиничкиот центар во Скопје. Се сеќавате дека тогаш за 170-тина милиони евра требаше да отпочне изградбата на нов наместо на тоа што го предвиде Венко Филипче и овие кои се економистиве во владава за половина милијарда евра за кој нормално ние не дадовме дозвола да се изгради затоа што ќе беше нова плачка на векот како што сега е оваа со Коридориве на Артан Груби. Тој не само што не го отпочнаа тука ние заедно што седиме ќе треба да плаќаме пенали во износ од 18 милиони евра. Исто така оваа година сите ние заедно тука плативме 18 милиони евра за пенали заради тоа што еден потпис фалел за да се издаде еврообврзница“, вели Стојаноски.
Стојаноски е дециден дека во однос на пенали државата треба да плати 36 милиони евра.
„Ако ги собереме само овие средства во однос на пенали што оваа држава треба да ги исплати тоа се 36 милиони евра, а 36 милиони евра се 36 нови градинки, што значи оваа година ние нема да имаме новоизградена градинка никаде во државава, нема да се изгради ново основно училиште, нема да се градат средни училишта и факултети, нема да се изгради клиничката болница во Штип, Скопје, Кичево, нема да започнеме нов автопат но ќе платиме 36 градинки, 36 милиони евра во однос на пеналите“, потенцираше Стојаноски.
Според Стојаноски економистите од Владава и економскиот тим треба да си поднесат оставка.
„Она што треба да го направат овие економистиве од Владава и економскиот тим е тоа веднаш и без исклучок да си поднесат оставка бидејќи да имате вие ситуација до државата каде 7 години нема да отпочнете ниту 2-3 метри, не зборувам за километри бидејќи километри се научна фантастика за овие луѓе, почнати патишта или некаков капитален проект и да имате ситуација каде ќе гледате видео клипови секојдневно на сите на ТВ станици во државата во националните дневници како луѓе плачат за да не можат да си обезбедат еден леб дома или да си го протуркаат месецот најдоброто нешто што можете да го направите да си поднесете оставка“, заклучи Стојаноски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Одбележана 24-годишнината од загинувањето на десеттемина армиски припадници кај месноста Карпалак

Делегација од Министерството за одбрана и Генералштабот на Армијата предводена од државниот секретар Елизабета Чуповска Ристова и Директорот на Генералштабот, бригаден генерал Орце Јордев, денеска положија венец со свежо цвеќе на спомен – обележјето на македонските бранителите кои своите животи ги загубија кај месноста Карпалак во 2001 година.
Десетмината прилепски бранители, Сашо Китаноски, Нане Наумоски, Бранко Секулоски, Марко Деспотоски, Ердован Шабаноски, Љубе Грујоски, Дарко Вељаноски, Веби Рушитоски, Горан Миноски и Пеце Секулоски ги положија своите животи за зачувување на независноста, суверенитетот и територијалниот интегритет на татковината.
Во спомен на бранителите на спомен – обележјето, свежо цвеќе положија и делегации од Владата предводена од заменик претседателот на владата за политички систем Љупчо Димовски, од кабинетот на Претседателката и врховен командант на Армијата, претставници од семејствата на загинатите припадници на Армијата, од здруженија на граѓани и од политички партии.
Венци со свежо цвеќе ќе бидат положени и пред спомен-обележјето на македонските херои во центарот на Прилеп.
Македонија
Семејна заштеда и помал притисок за родителите: Дурмиши за поевтинувањето на училишниот прибор

Министерот за економија и труд, Бесар Дурмиши, денеска ја промовираше новата владина мерка „Училишна кошничка“, насочена кон намалување на трошоците за училишен прибор и заштита на семејниот буџет пред почетокот на новата учебна година.
„Веруваме дека образованието треба да биде еднакво достапно за сите – без оглед на семејниот приход. Затоа, заедно со Владата, преземаме мерки што овозможуваат секое дете да започне со училишните обврски под еднакви услови, а родителите да почувствуваат конкретно олеснување,“ изјави министерот Дурмиши.
Согласно членот 29 од Законот за трговија, Владата на Република Северна Македонија вчера усвои Одлука за утврдување на највисоки цени за продажба на училишен прибор во малопродажба и големопродажба, која ќе важи од 15 август до 15 септември 2025 година.
Според одлуката се предвидува намалување на цените на училишен прибор најмалку за 10% во трговијата на големо и 15% во трговијата на мало.
Мерката, според соопштеното, важи за сите видови продавници кои продаваат училишен прибор – од книжарници, преку супермаркети, до спортски продавници.
„Ќе биде опфатен широк спектар на производи: тетратки, ранци, моливи, боици, фломастери, калкулатори, ножици, лепак, папки и други основни материјали.
Секој производ што ќе биде опфатен со оваа мерка ќе биде јасно означен со натписот „Помалку трошоци, повеќе за тебе“, а во сите продавници ќе биде поставен плакат со информации за мерката, со цел потрошувачите да имаат целосна и транспарентна слика.
Цените ќе се споредуваат со референтната цена од 1 јуни 2025 година или со набавните документи за поново внесени производи. Тоа значи дека намалувањето е реално, проверливо и фер – и за потрошувачите и за трговците,“ појасни министерот.
Оваа мерка, како што потенцираше Дурмиши е дел од поширок системски пристап на Владата да интервенира таму каде што трошоците се највисоки, а потребите најголеми.
„Минатогодишната „Училишна кошничка“ беше исклучително успешна – заштедите по ученик изнесуваа од 750 до 2.000 денари. Секоја семејна заштеда значеше повеќе можности за децата, а помал притисок за родителите,“ изјави Дурмиши.
Министерот подвлече дека целта останува иста, да им се овозможи на сите ученици еднаков и достоинствен почеток на учебната година, без финансиски бариери.
„Продолжуваме со следење на состојбите на терен, анализи и дискусии за нови мерки – секогаш водени од интересот на граѓаните. Образованието треба да почне со насмевка – а ние сме тука да помогнеме тоа навистина да се случи,“ вели Дурмиши.
Македонија
(Видео) СДСМ: Инфлација од 4,8 отсто, властите да ги прифатат нашите предлози за укинување ДДВ на храната

Заменик-претседателката на Форумот на жени при СДСМ, Ема Нешковска, на денешната прес-конференција изјави дека инфлацијата од 4,8 проценти на годишно ниво ја доведува економијата во сериозен пад и ја турка населението во сиромаштија. Според неа, ова е резултат на промашените економски политики на владата предводена од Христијан Мицкоски.
Нешковска истакна дека најмногу поскапување има кај храната и основните производи, што го прави животот потежок за граѓаните кои се приморани да прават тешки избори помеѓу плаќање сметки и купување намирници.
Таа ги повика властите да ги прифатат предлозите на СДСМ за укинување на ДДВ за храна, зголемување на минималната плата и покачување на платите во другите сектори како начин за намалување на трошоците и заштита на стандардот на граѓаните.
„Времето на владина незаинтересираност и арчење на парите на граѓаните мора да заврши. Сметката ја плаќаат граѓаните“, порача Нешковска.