Македонија
Студија: Депресивни се 53 отсто од девојчињата и 19 од момчињата на возраст на 15 години

Асоцијацијата за здравствена едукација и истражување – ХЕРА ги информира граѓаните од општина Центар и основните учлиштата дека услугите поврзани со психосоцијална поддршка, превенција од дроги, професионални советувања за ментално здравје, како и превенција и заштита од насилство, се достапни бесплатно во согласност со договорот кој е потпишан со Општина Центар.
Услугите се достапни секој работен ден, од понеделник до петок, во однапред закажан термин, за сите граѓани, вклучително и младите, учениците, наставниците и родителите, кои се соочуваат со предизвиците на секојдневието.
Како симболичен гест и во име на одбележувањето на 25-годишнината на ХЕРА се изработи мурал од уметникот Ненад Тонкин. Муралот претставува симбол на охрабрување, поддршка и солидарност против врсничкото и семејното насилство, а воедно поттикнува на дијалог и активно дејствување за создавање безбедна и поддржувачка училишна средина.
„Врсничкото насилство остава длабоки последици врз менталното здравје на младите. Сè почесто се соочуваме со случаи на анксиозност, депресија и изолираност кај деца и адолесценти, предизвикани од навреди, исклучување или насилство од врсниците како во училиште така и онлајн. 53 % од девојчињата и 19 % од момчињата на возраст на 15 години имаат депресивно расположение, покажуваат податоците од студијата ХБСЦ. Потребна е заедничка акција од родителите, училиштата и од институциите за да се создаде безбедна и поддржувачка средина, каде што младите ќе се чувствуваат прифатено и ќе добијат навремена психосоцијална поддршка. Менталното здравје не е луксуз, туку право на секое дете. Апел до младите: молкот не е одговор, сподели и побарај поддршка кога ти е потребно!“
„Стручните служби во училиштата континуирано работат со ученици и родители во согласност со внатрешните процедури, но кога е потребна терапевтска интервенција, постојните ресурси не секогаш се доволни. Со вклучување на советувалиштата на ХЕРА, кои се дел од системот на социјална заштита, училиштата добиваат дополнителна поддршка за случаи кога учениците, семејствата или старателите имаат зголемени потреби“, истакна Ана Попризова, психотерапевтка и училиштен психолог.
„Нашата цел е да создадеме амбиент на сигурност за целосен развој на нашите деца за да може да ги реализираат своите потенцијали во вистинска насока – тоа се радост, среќа, љубов, разбирање и поддршка. Со оваа порака создаваме визуелна и модерна комуникација, достапна за сите на кои им е потребна. Приказната што ја презентираме е мотив да се помогне и отворено да се говори за ситуации и случувања на кои секојдневно работи и тимот на стручната служба во воспитно-образовниот процес“, изјави Гордана Јаневска, директорка на ООУ „Кочо Рацин“.
ХЕРА продолжува со својата мисија за унапредување на менталното здравје и борба против родово базираното насилство преку соработка со локалните самоуправи, училиштата и заедницата.
За повеќе информации и закажување термини граѓаните може да се обратат во советувалиштата на ХЕРА:
1. Прв семеен центар 🕘 отворен: понеделник, среда и петок (9 – 16 ч); вторник и четврток (12 – 19 ч) 📞телефон: 02/3200 007, +389 70 249 596 📧 е-пошта: [email protected];
2. Центар за поддршка и советување момчиња и мажи – ММ-центар 🕘 отворен: од вторник до четврток (10 – 17 ч) 📞телефон: +389 70 299 026;
3. Советувалиште за превенција од употреба на алкохол и дроги во Младинскиот центар „Сакам да знам“ – Водно 📞телефон: +389 2 3176 950.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Делови од Ѓорче Петров и Сопиште денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 09:00 до 13:00 часот, дел од корисниците на улицата Мице Козар, општина Ѓорче Петров;
– во периодот од 10:00 до 12:00 часот, корисниците од ул.4 во Горно Соње, општина Сопиште.
Македонија
Променливо облачно со сончеви периоди, максималната температура до 24 степени

Времето денеска ќе биде променливо облачно со сончеви периоди. Ќе дува слаб до умерен ветер од северен правец. Минималната температура ќе биде во интервал од 5 до 14, а максималната ќе достигне од 17 до 24 степени.
Во Скопје, променливо облачно со сончеви периоди. Ќе дува слаб ветер од северен правец. Минималната температура ќе се спушти до 12, а максималната ќе достигне до 22 степена.
Времето во наредните деново
Од среда попладне до петок под влијание на нов влажен бран ќе има врнежи од дожд, локално пообилни (над 30 l/m²). Поради продор на постудена воздушна маса од север и засилен северен ветер во четврток и петок на повисоките планини ќе има услови врнежите од дожд да преминуваат во повремен снег. Температурата значително ќе опадне. Во деновите од викендот ќе има стабилизирање на времето и постепен пораст на дневната температура.
Македонија
Мицкоски: Левица е на услуга на ДУИ, сега си направиле пазар од кој ќе профитира или ќе се обиде да профитира ДУИ

Претседателот на ВМРО-ДПМНЕ, Христијан Мицкоски, имаше свое обраќање на денешниот митинг, со кој се започна кампањата за претстојните локални избори, и кој се одржа во Скопје во Спортскиот центар ,,Јане Сандански“ на кој се осврна и на коалицијата ДУИ и Левица, односно на Али Ахмети и Димитар Апасиев.
Мицкоски објасни дека сега јасно се гледа дека Левица игра во корист на ДУИ, како што претходно играла во корист на СЈО и Зоран Заев.
„Постојат две коалиции, две коалиции надвор од видливото. Првата е онаа меѓу Али и Димче, помеѓу ДУИ и Левица. Левица само го покажа своето вистинско лице кое што сите ние го знаеме. Тие се на отворен пазар, на услуга на Али и ДУИ. Сетете се, да не заборавиме, прво го помагаа СЈО за добри хонорари, потоа самиот Заев отворено кажа дека правеле тајни коалиции за наводно да ја спаселе Македонија од ВМРО-ДПМНЕ и од Христијан. А сега си направиле пазар од кој ќе профитира или ќе се обиде да профитира ДУИ. А тие пак од ДУИ, со истите трикови се децении наназад. Како стара закачица, провоцираат и едвај чекаат да им одговорам“, кажа Мицкоски.
Мицкоски укажа „сигурно пресметале дека ќе им вратам, па така ќе им го подобрам уништениот рејтинг“.
„Таа нивна игра мора и Албанците и Македонците и сите останати да ја знаат и разберат. Така ДУИ си го крева рејтингот. А тезите им се стари и излитени – те. „крвови“, те „јастреби, те орлите, те зајаци“, истото тоа, истиот фолклор го споменуваат 20 години, тоа со години е истиот филм. Албанците му се иселија. Парам-парчe направија од крадење Албанците – дури и од неговото Зајас – се иселија; исто како во Дебар, Струга, Тетово, Гостивар, Кичево и насекаде што живеат.. Дваесет години беа на власт. Видовме се што можат, но и што не можат. И тие метафори на митинзите повеќе не им поминуваат – добри се, ако одлучиле да се занимаваат и да глумат хумористични филмови за да може да насмеат некого. Но, не и да влеат надеж каква им е потребна на сите граѓани во Македонија“, посочи Мицкоски.