Македонија
Сугарески: Два милиони евра за општина Велес за капитални проекти

За општина Велес со новиот проект за локални патишта имаме предвидено 1,2 милиони евра, дополнително работиме на подобрување на комуналната инфраструктура низ градот со преку 600 илјади евра, истакна министерот за транспорт и врски, Горан Сугарески, при денешната посета на општина Велес.
Министерот Сугарески заедно со градоначалникот на општина Велес, Аце Коцевски, денеска извршија увид во реконструкција на водоводини и канализациски линии во градот.
„Годинава ја започнуваме со проекти таму каде што е најпотребно, а тоа е подобрување на комуналната инфраструктура во општините. Во моментов работиме на преку триесетина проекти за изградба и реконструкција на водоводи и канализации низ општините, преку 10 милиони евра ќе инвестираме само оваа година или во подготовка сме на нови 40 проекти што ќе ги работиме оваа низ различни општини. Конкретно за Велес, инвестираме преку 620 илјади евра за овој проект каде ќе се реконструираат водоводи и канализации на преку десетина улици низ градот или реконструција на водоводна мрежа со вкупна должина од околу 4 км и канализациска мрежа во должина од околу 300 метри“, изјави министерот за транспорт и врски, Горан Сугарески.
Тој додаде дека во рамките на проектот за локални патишта, општина Велес има на располагање 1 милиони и 200 илјади евра така да во рамките на овие средства ќе можат да се реализираат проекти за подобрување на урбаното живеење. Исто така, министерот Сугарески упати апел до сите градоначалници што поскоро да достават готови проекти до Министерството, за да може што побрзо да ги користат средствата што се на располагање за подобрување на условите за живеење по општините.
Градоначалникот на општина Велес, Аце Коцевски, истака дека ова е многу корисен проект за велешани бидејќи се работи на реконструкција на стари водоводни линии.
„Се работи за стари азбестни линии кои создаваа многу проблеми на граѓаните во водноснабдувањето и често имаше дефекти. Со овој проект ќе се подобри протокот на вода, а од друга страна ќе се деблокира асфалтирањето на улиците каде се прави реконструкцијата. Ова ќе биде убедливо најуспешната година на инвестициски план на општина Велес со што ќе го подобриме квалитетот на живеење. Доколку ни дозволат временските услови, континуирано ќе работиме улица по улица за што поскоро да го завршиме овој проект“, изјави градоначалникот на општина Велес, Аце Коцевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре сончево и топло време со мала локална облачност

Времето утре ќе биде сончево и топло со мала локална облачност. Ќе дува умерен, наместа повремено засилен ветер од јужен правец. Минималната температура ќе биде во интервал од 11 до 19, а максималната ќе достигне од 30 до 37 степени, информира УХМР.
Во Скопје, сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 17, а максималната ќе достигне до 36 степени.
Во петок и сабота во западните и северните делови ќе има услови за повремен локален дожд и појава на ретки грмежи. Во петок ќе дува засилен повремено силен ветер од западен и југозападен правец.
За време на викендот ветерот ќе го смени правецот во северен со умерен, долж Повардарието повремено засилен интензитет, а температурите ќе бидат во опаѓање.
Македонија
ДОМ: Новиот нацрт-закон за Рударство е директна закана за здравјето на луѓето

Зелената партија ДОМ категорично го отфрла новиот нацрт-закон за Рударство предложен од Министерството за енергетика, рударство и минерални суровини. Наместо да поставува линии за стратешки развој, според ДОМ, овој закон е директна закана за животната средина, здравјето на граѓаните и демократските принципи на одлучување.
ДОМ цени дека ова законско решение силно ја централизира моќта во Владата, дозволувајќи ѝ да прогласува минерали за „стратешки“ без јавна дебата и учество на граѓаните и граѓанките.
„Спорна е и можноста за дозволување на концесии до 60 години, како и овозможување на експропријација на приватно земјиште, што ќе претставува правна основа за удар врз имотните права. Со предложените одредби ќе се врши и привилегирање на државни и странски компании, без спроведување на јавен повик. Особено загрижува воведување на можност за користење на опасни технологии во постојните рудници, како и признавањето на загадување, но не и понуда на механизми за превенција. ДОМ оценува дека моделот на „управување со ризик“, не преставува правен механизам за заштита на животната средина и здравјето на граѓаните и граѓанките“, велат од ДОМ.
Според партијата, ова законско решение не е во јавен интерес, туку истото е насочено и дизајнирано за задоволување на корпоративни структури и финансиски интереси, притоа создавајќи остри ризици за здравјето на идните генерации, распродавајќи ја земјата и претворајќи го природното богатство во профит за малкумина.
ДОМ порачува дека Македонија не е ничија лична сопственост и апелира до граѓаните и граѓанките активно да се вклучат во јавната расправа за која преостануваат уште девет дена.
Македонија
Мицкоски за акцијата за намалување на училишниот прибор: Трговците треба да обезбедат попуст меѓу 10 и 15 проценти, ДПИ е на терен

Државниот пазарен инспекторат е на терен и гледа дали се почитува, засега немаме објективни нарушувања на веќе договореното, изјави премиерот Христијан Мицкоски одговарајќи на новинарско прашање како е задоволен од акцијата за намалување на училишниот прибор.
„Владата на седница донесе одлука со која заедно со трговците и со снабдувачите на училишниот прибор обезбеди попуст помеѓу 10 и 15 % на маржата во зависност дали е на големо или на мало, а репер е цената од 1 јуни 2025 година. Задача е на трговците да означат која била цената на 1 јуни 2025 година и врз база на тоа да обезбедат попуст помеѓу 10 и 15 % и да истакнат на влезот од продавницата натпис на кој има ‘Помалку трошоци, повеќе за граѓаните’. ДПИ е на терен и гледа дали се почитува, засега немаме објективни нарушувања на веќе договореното“, потенцира премиерот Мицкоски.