Македонија
Трајанов: Разрешувањето на Беким Сали власта го поврзуваше со плати и лекови, а немаат пратеници за да го разрешат

Едноставно, не ве бидува, само демагогија, криминал и провизии, не може да се соберете ни да гласате, немаше пратеници од власта да гласаат за министерот Беким Сали, сега среде бел ден немате пратеници повторно. Иако разрешувањето го поврзавте со платите, со набавка за лекови, вам друг ви е проблемот. Проблемот е што нема пари буџетот, нема ликвидност, се закочи еврообврзницата и сега купувате време, изјави на денешната собраниска седница пратеникот Здравко Трајанов.
Трајанов истакна дека власта со сѐ се занимава, освен со основниот проблем – решавање криминал и корупција за што имаме критики, дури и од САД.
Не сакате да го менаџирате ни основниот проблем – криминал и корупција, тоа ви го кажаа и САД, јавно ве критикуваат. Со реконструкција на Владата можеше да се разрешат и други министри наместо да се најдат структурите на МВР, кои немаат разрешен ниту еден случај за висока корупција во овие 6 години, ниту еден функционер од СДСМ не е обвинет, да не се лажеме, Рашковски е на слобода и така ќе заврши, рече Трајанов.
Тој додаде дека во моментот имаме разрешен министер за правда и разрешен заменик, целосна парализа на министерство, а има услов за враќање судски случаи.
„Има ли поголемо дно од ова што се случува. Од Правда е блокирана и еврообврзницата и во најмала рака дел од тие пари требаше да оди за отплата на кредити и дополнително ќе плаќаме камати, посочи тој.
Трајанов додаде дека денеска е точка на разрешување министер за информатичко општество и администрација со многубројни проблеми, без дигитализација, нефункционално министерство, каде што секоја година се менува министер.
„Не сакам да ги коментирам секојдневните паѓања на системите и дојавите за бомби, дигитализацијата стои во место, на една година ги менувате министрите. Во пракса нема поврзување на институциите и затоа и немаше електронски попис. Не ви одговара тоа, вам ви одговара попис во кафеана, каде што ќе договорите проценти. Нема функционална здравствена електронска картичка, каква е таа дигитализација? Администрацијата е партизирана и уценета“, изјави Трајанов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Без вода дел од скопски Карпош

ЈП Водовод и Канализација известуваат дека денеска ( четврток) поради изведување на водоводен приклучок од ф – 100 мм на ул. Осло бр. 15б, во периодот од 09.00 часот па се до завршување на работата, без вода ќе останат корисниците од ул. Осло. ( општина Карпош )
Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.