Македонија
Трајко Вељаноски: Нема економска оправданост и причина Собранието да има пет потпретседатели

Нема економска оправданост и причина Собранието да има пет потпретседатели, смета поранешниот претседател на Собранието, Трајко Вељаноски.
„Во врска со закажаната седница за бројот на потпретседатели во Собранието, сакам да ја информирам јавноста како било за време на претходната власт, а како е сега. Во време на претходната власт од 2006 до 2008 година имаше тројца потпретседатели, од 2008 до 2011 година – 3 потпретседатели, од 2011 до 2014 година – 3 потпретседатели и од 2014 до 2016 година – тројца потпретседатели.
„За време на сегашнава власт од 2016 до 2020 година имаше 5 потпретседатели, како и од 2020 до 2024 година“, вели Вељаноски.
Тој во соопштение до јавноста наведува примери во други држави:
„Во САД има 435 пратеници и еден потпретседател, во Велика Британија има 650 пратеници – 3 потпретседатели, во Словенија има 90 пратеници и тројца потпретседатели, во Италија има 630 пратеници и 4 потпретседатели и во Германија има 709 пратеници и 5 потпретседатели“, вели Вељаноски.
„Демократијата е скапа играчка, но изгледа само во Македонија важи правилото – што поскапо, тоа е поголема демократија. Нема економска оправданост и причина за толкав број потпретседатели на Собранието“, наведува Трајко Вељаноски, поранешен претседател на Собранието.
За денеска во 11 часот е закажана собраниска седница за предлог-одлуката за утврдување на бројот на потпретседатели на Собранието. Во предлог-одлуката потпишана од собранискиот спикер Талат Џафери се наведува дека Собранието на Република Северна Македонија има пет потпретседатели.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Борче Стамов и д-р Ирфан Ахмети ќе ја примат државната награда „Мајка Тереза“

Борче Стамов од „Донирај компјутери“ и доц. д-р Ирфан Ахмети од Универзитетската клиника за ендокринологија, денеска во Собранието ќе ја примат државната награда „Мајка Тереза“.
„На 26 август 2025 година (вторник), во Кристалната сала на Собранието на Република Северна Македонија, во 11:00 часот, Одборот за доделување на државната награда „Мајка Тереза“ ќе ја додели државната награда „Мајка Тереза“ за 2025 година за особено значајни остварувања од интерес на државата во областа на хуманоста и човечката солидарност и за потикнување, унапредување на меѓусебното разбирање и развој на соработката, како меѓу народите, така и меѓу припадниците на различните заедници, култури и вери“, соопштија од Собранието.
Македонија
Без струја делови од Центар и Карпош

Без струја денеска ќе останат делови од Центар и Карпош, извести Регионалниот центар за управување со кризи на Град Скопје.
Поради технички зафати во електродистрибутивната мрежа на ден 26.08.2025 година (вторник), без електрична енергија ќе останат:
· од 08:00 до 15:00 часот, корисниците на бул. Партизански Одреди бр. 15, односно стамбените објекти околу објектот – Луна Бизнис Центар. (Општина Центар )
· од 11.00 до 15.00 часот, корисниците од дел од ул. Козле крак -22. (Општина Карпош)
Македонија
Патот Македонски Брод – Скопје сѐ уште е затворен за сообраќај

Поради пожар во националниот Парк Јасен, регионалниот пат Р1106 Македонски Брод – Скопје сѐ уште е затворен за секаков вид на возила, информира АМСМ.
Сообраќајот на останатите државни патишта се одвива непречено, по суви коловози.
Интензитетот на сообраќај на патните правци надвор од градските средини поради летните одмори е зголемен меѓутоа на граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.