Македонија
Тренчевска: Обезбедувањето можности за вработување и создавање перспектива за сите граѓани е обврска на Владата

Министерката за труд и социјална политика денеска заедно со австриското аташе за Република Северна Македонија, Харалд Фугер, и директорот на Агенцијата за вработување на Република Северна Македонија, Беким Мурати, присуствуваа на последната работилница од билатералниот проект за поддршка за сервиси за вработување за младите во Република Северна Македонија.
Министерката во воведот на своето обраќање истакна дека обезбедувањето можности за вработување и создавање перспектива за сите граѓани е обврска на Владата и дека одговорноста е уште поголема кога се во прашање младите.
„Кога станува збор за младите луѓе и нивниот статус на пазарот на трудот, во последните години забележано е видно подобрување на состојбите со вработувањето на младите. Во 2021 година околу 94 илјади млади луѓе во Република Северна Македонија не беа вработени, не беа вклучени во образование или обука, што одговара на четвртина од вкупното младо население. Овој удел, иако сè уште е голем, е во тренд на опаѓање во однос на 2016 година, кога 136 илјади млади луѓе биле во NEET категоријата“, рече Тренчевска.
Таа посочи дека како Министерство и Влада имаат системски пристап во решавањето на проблемите со кои се соочуваат младите, преку имплементација на политики за вработување и носење посебни закони како што е Законот за практикантство, Законот за младински додаток и Законот за младинско учество и младински политики.
Во своето излагање таа се осврна и на новата Национална стратегија за вработување.
„Новата Национална стратегија за вработување предвидува продолжување на Гаранцијата за млади. Имено, оваа година подготвуваме нов план за Гаранција на млади за следните четири години, кој ќе биде усвоен од Владата до крајот на годината. Во новиот план, особено посветуваме внимание на зајакнување на т.н. теренските активности, кои се клучни во идентификување и мобилизирање на неактивните млади лица“, изјави Тренчевска.
На крајот од своето обраќање Министерката упати благодарност до Министерството за социјална политика, здравство, нега и заштита на потрошувачи на Република Австрија, како и за поддршката што ја обезбедуваат на Република Северна Македонија за патот кој Европската Унија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Професорот Горан Марковски ќе се кандидира за градоначалник на Скопје

Професорот Горан Марковски, декан на Градежниот факултет, ќе биде независен кандидат за градоначалник на град Скопје, соопшти граѓанската платформа „Независни заедно“.
„Заедно да му дадеме шанса на градот, шанса да го водат стручни лица со храбро лидерство и визија за поубав град по мерка на човекот“, велат од платформата.
Кандидатурата на професорот е поддржана од граѓанската платформа „Независни“ заедно, составена од „Шанса за Центар“, „Зелените за Гази Баба“ и „Групација 389“.
Македонија
ДУИ нуди ветинг со меѓународен мониторинг: Нека се истражи имотот на секој политичар и на секоја политичка партија

ВМРО-ДПМНЕ е последната партија која има право да држи лекции за борбата против корупцијата, криминалот и политичките влијанија, затоа што денес, од позиција на власт, јасно демонстрира дека има само една цел: целосно да ја зароби државата, особено правосудството, велат од ДУИ.
Според нив, под водство на оваа влада, политиката отворено се меша во Обвинителството, Републичкиот судски совет и Советот на јавни обвинители, со класични политички сценарија за ставање на правдата под контрола.
ДУИ, додаваат од таму, не се плаши од независно правосудство ниту од транспарентност.
„Напротив, ние нудиме конкретно решение: ветинг со меѓународен мониторинг, за целосно чистење на политичката и јавната сцена од секое коруптивно влијание. Нека се истражи имотот на секој политичар и на секоја политичка партија. Нека се истражи најголемиот корупциски процес во државата – приватизацијата, која создаде недопирливи олигарси со монополи во клучни економски сектори, кои денес прават сè за да го блокираат европското интегрирање, од страв од фер конкуренција“.
ДУИ бара истрагата да се прошири и на институциите на државната безбедност и нивните вработени од 1945 година до денес, затоа што, како што велат, само така може да се затвори едно темно поглавје од минатото и да се изгради држава каде никој не е над законот.
„Тие што немаат што да кријат – го прифаќаат ветингот.
Времето на моноетнички проекти и етничка супериорност е завршено. Северна Македонија може да се гради само заедно, во духот на мултиетничноста и еднаквоста, а не под плаштот на „борба против корупцијата“ да се реализираат агенди кои ја поткопуваат државата и ја заробуваат за да спроведат моноетнички цели.
ДУИ останува цврсто определена да ја води државата напред кон европската интеграција, со чисти институции, со независно правосудство и со општество кое става крај на бескрајниот транзициски период“, истакнуваат од партијата на Ахмети.
Македонија
Во текот на изминатото деноноќие изгаснати 20 пожари во Македонија

Во текот на изминатото деноноќие, на ден 25/26.08.2025 година, на територијата на Македонија имаше вкупно 23 пожари на отворен простор, од кои еден е активен, два се под контрола, а изгаснати се 20 пожари, информира Центарот за управување со кризи.
Активен е пожарот во Општина Долнени во село Долгаец каде гори мешана шума.
Под контрола се пожарите во Јасен, каде гори мешана шума, и во Гевгелија, на планината Кожуф каде гори висока шума.
ИЗГАСНАТИ: 20
1. Општина Штип: с. Судик (стрниште);
2. Општина Дебар: с. Елевци (ниска вегетација);
3. Општина Куманово 1: нас. Гоце Делчев (ниска вегетација);
4. Општина Куманово 2: с. Бедиње (ниска вегетација);
5. Општина Теарце: с. Пршовце (ниска вегетација);
6. Општина Гостивар: с. Симница (ниска вегетација и ѓубре);
7. Општина Крушево: влезот на Крушево (депонија);
8. Општина Долнени: с. Гостиражни (ниска вегетација);
9. Општина Кривогаштани: с. Пашино Руфци (стрништа, ролни со слама);
10. Општина Охрид: ул. Железничка (ниска вегетација);
11. Општина Гази Баба: с. Идризово (ниска вегетација и стрниште);
12. Општина Битола: с. Велушина (сува трева и сено);
13. Општина Свети Николе: с. Бориловци (ниска вегетација);
14. Општина Кочани: с. Оризари (сува трева и гранки);
15. Општина Врапчиште: с. Топлица (ниска вегетација и ѓубре);
16. Општина Струга: с. Враништа (стрниште);
17. Општина Василево: с. Доброшинци (запалена депонија);
18. Општина Кочани: с. Оризари (стрниште);
19. Општина Чучер-Сандево: с. Горно Блаце (сува трева);
20. Општина Липково: с. Отља (сува трева).