Македонија
Тренчевска: Социјалниот дијалог е силна основа за градење општество во кое владее социјалната правда

Министерката за труд и социјална политика, Јованка Тренчевска, денеска учествуваше на конференцијата „Социјални предизвици“, организирана од Амбасадата на Република Франција, Францускиот институт во Скопје и Француската алијанса во Битола во рамките на француското претседателство со Советот на ЕУ. Целта на конференцијата беше да се даде осврт на главните социјални предизвици со кои се соочуваат граѓаните на земјите членки на ЕУ, како и на земјите кандидати.
Министерката Тренчевска обраќајќи се пред присутните учесници на конференцијата, меѓу кои амбасадорот на Република Франција, г. Сирил Бомгартнер, пред сè, ја истакната улогата на социјалниот дијалог во едно општество, кој, како што рече таа, само преку социјалениот дијалог може да се подобри квалитетот на одлуките и политиките на една земја.
Таа истакна и дека телата и процесите за социјален дијалог се моќно оружје за решавање важни економски и социјални прашања, за справување со кризи, за поттикнување добро владеење и социјална правда, за намалување на нееднаквоста, закрепнување на економијата и за промовирање економски раст.
„Искуствата од минатото ни покажуваат дека едностраното дејствување на владите води кон тешкотии во справувањето со последиците од кризите, обезбедувањето социјална стабилност и заздравување на економијата. Социјалниот дијалог води кон меѓусебно разбирање помеѓу општествените групи кои застапуваат разни интереси, со цел да се постигне решение за проблемите од заемен интерес,“ рече Тренчевска.
Таа посочи дека еден од клучните принципи на партиципативното управување е дека оние што би можеле да бидат засегнати од некоја одлука мора да бидат вклучени во нејзиното креирање и спроведување.
„Улогата на економско-социјалниот совет како трипартитно тело на национално ниво е навистина значајна. Советот дејствува како форум, кој е редовно консултиран за најважните предлог-закони, политики и мерки во областа на трудот. Токму низ економско-социјалниот совет се дискутирани и произлегоа решенија и мерки што беа одговор на последиците предизвикани од пандемијата, а сега и од енергетската криза, со цел да му се помогне на стопанството, но и на работниците и на ранливите категории граѓани. Предлозите што доаѓаат од страните, поради природата на позициите, често се дијаметрално спротивни. Но, она што е битно е дека суштински не се разликуваат бидејќи целите некаде на крајот се исти – развиена економија и социјален мир“, рече Тренчевска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски – Кос: реформите поврзани со евроинтеграциите остануваат високо на домашната политичка агенда

Во рамки на дводневната работна посета на Брисел, министерот за надворешни работи и надворешна трговија, Тимчо Муцунски, денеска оствари средба со еврокомесарката за проширување на Европската Унија, Марта Кос.
Соговорниците ја нагласија силната поддршка за проширувањето на Унијата, и од страна на земјите членки и од страна на граѓаните на Северна Македонија – што го потврдуваат и наодите од последниот „Евробарометар“.
На средбата беше поздравен реформскиот пристап на Владата, особено исполнувањето на обврските од реформскиот процес и имплементацијата на Планот за раст. Муцунски нагласи дека реформите поврзани со евроинтеграциите остануваат високо на домашната политичка агенда, со силен фокус на владеењето на правото и борбата против корупцијата.
Изрази благодарност за личниот ангажман на еврокомесарката Кос во пристапниот процес, особено во контекст на нејзиното учество и поддршка на Самитот за Планот за раст, што неодамна се одржа во Скопје.
Соговорниците разменија мислења и за неодамнешното приклучување на државата кон СЕПА, како и за иницијативата за постепено укинување на роаминг трошоците помеѓу земјите од Западен Балкан и Европската Унија. Одлуката за оваа иницијатива се очекува на почетокот на 2026 година, како дел од бенефитите на постепената интеграција во Унијата.
На средбата се дискутираше и за актуелните регионални и глобални случувања, при што беше потврдена заедничката поддршка за Украина и заложбата за што побрзо постигнување на праведен и одржлив мир.
Македонија
Meџити: Мајка Тереза е една од најсветлите личности на човештвото

Првиот заменик-претседател на Владата и министер за животна средина и просторно планирање, Изет Меџити, заедно со делегации од Владата, Собранието и општините положи венец со свежо цвеќе на спомен-плочата во центарот на Скопје, посветена на албанската нобеловка Гонџе Бојаџиу – Мајка Тереза, по повод 115-годишнината од нејзиното раѓање.
По церемонијата, Меџити изјави дека на 115-годишнината од раѓањето на Мајка Тереза – Гонџе Бојаџиу, родена во Скопје, се сеќаваме на една од најсветлите фигури на човештвото – мисионерката на љубовта и добитничка на Нобеловата награда за мир.
„Таа нѐ научи дека величината не се мери со функции и моќ, туку со служење, посветеност и љубов кон другиот. Нејзината порака останува водилка за нашата политика и општество, да работиме за мир, правда и солидарност, без да заборавиме никого. Мајка Тереза ни остави света порака дека љубовта се мери преку делата што ги правиме“, изјави Меџити.
Тој вети дека се гради иднина во која Скопје повторно ќе биде препознаено во светски рамки како центар на висока култура, развиено образование, наука и технологија, со перспектива за младите и хуманизам.
Македонија
ДОМ: Самоуништување на природата, Дошница жртва на владината неодговорност

Зелената партија ДОМ остро реагира на одлуката на Министерството за животна средина да не ја стави реката Дошница под привремена заштита, иако врз нејзиниот слив се планира изградба на две мали хидроцентрали кои ќе ја доведат клисурата до еколошки колапс.
ДОМ ја оценува оваа институционална пасивност како политичка одлука за самоуништување на природните богатства и суров удар врз иднината на нашите граѓани и граѓанки.
„Министерството ги прикрива своите намери зад изговори дека „предлогот не е формално доставен“. Ова е безобразно игнорирање на алармот што дојде од експерти, биолози и невладини организации уште пред еден месец, кога побараа мораториум се’ додека не се заврши Студијата за валоризација на природните вредности. Сезонското пресушување на реката Дошница и најавеното дополнително исушување се директна последица од оваа неодговорност.
Веднаш да се воведе мораториум на сите активности поврзани со концесијата, да се затвори пристапот до локациите и да се прогласи привремена заштита на текот и околниот предел, во корист на идното заштитено подрачје „Демиркаписка клисура“. Без тоа, ендемичните видови, македонските риби и планинските инсекти се на пат кон неповратна деградација“.
Бараат итна изработка и усвојување на елаборат за мониторинг на биолошката разновидност и еколошкиот проток во Дошница, со јавни дебати и независни експерти.
Министерството, како што додаваат, да испрати јасна порака до концесионерот: без зелено светло за заштита, нема ни нови брани.
„Зелената партија ДОМ нема да молчи пред ова политичко насилство над природата. Ако не прекине оваа тенденциозна институционална воздржаност, ќе покренеме граѓански и правни активности за да ја спасиме Дошница од катастрофа. Природата не чека, ниту ние ќе го дозволиме нејзиното уништување.