Министерката за труд и социјална политика, Јована Тренчевска, денеска се сретна со австрискиот аташе за интернационални и билатерални односи и прашања од социјалната политика, Харалд Фугер.

На состанокот беше разговарано за проекти и активности на полето на социјалната заштита. Беа разменети и искуствата за услугата за поддржано вработување на ранливата категорија граѓани, за младите во ризик и нивно враќање во образовниот и работниот процес, за заштита од семејно насилство, за измените во Законот за работните односи во делот на родителско отсуство и за мажите.

Министерката Тренчевска посочи дека Република Австрија како пријателска земја е силен поддржувач на социјалните реформи и на интеграцијата во ЕУ и дека со потпишаниот меморандум за соработка активно се продолжува соработка меѓу двете земји. Таа рече дека Законот за работните односи се усогласува со европските директиви.

„Со новиот предлог-закон за работни односи ќе воведеме родителското отсуство, со кое и таткото ќе може да се грижи за детето. Во моментот таткото има право да земе отсуство заради раѓање на детето, но тоа многу малку се користи. Со новиот ЗРО ова право останува и дополнително се предлага да има денови што задолжително ќе му следуваат на таткото“, рече Тренчевска.

Австрискиот аташе Фугер информира дека набргу ќе почне да се имплементира проект со кој мажите ќе бидат вклучени во негувателската професија.

„Пилотираме услуги на поддржано вработување во пет региони во Македонија. Овие проекти веќе се при крај и набргу ќе почнат да се имплементираат. Со проектот ‘Втора шанса’ на младите луѓе што се надвор од образовниот и работниот процес ќе им се помогне да се вратат назад во системот. Тие ќе добијат поддршка за стручно образование и вработување. Работиме и на проектот за борба против домашното насилство и за жртвите и за сторителите“, рече Фугер.

Министерката Тренечевска нагласи дека МТСП и центрите за социјална работа активно работат на овој предизвик и на мултиинституционалнит пристап за справување со родово базирано насилство, насилство врз жените и семејното насилство.

Таа посочи дека во текот на оваа година во согласност со Истанбулската конвенција ќе се воспостават пет специјализирани сервиси за жени жртви на родово базирано насилство и семејно насилство и дека се работи на воспоставување електронски систем со кој сите информации за жртвата, од пријавувањето, па сѐ до судската пресуда, ќе бидат на едно место.