Потпретседателката на СДСМ, Ана Чупеска, денеска на вонредна прес конференција побара темелна и независна истрага за целиот случај. Апелираше до Обвинителството и сите истражни органи оваа трагедија да ја истражат до крај и граѓаните да ја добијат вистината а одговорните да одговараат.

Постави и неколку прашања до министерот за внатрешни, Панче Тошковски.

„Министре Тошковски, нели е срамно да не поднесете одговорност и оставка вие и сите во институциите во услови кога цела година дискотеката работела без лиценца? Чија, ако не ваша била одговорноста тоа да го провери тоа? Чија ако не ваша и на сите инспекторати кои ги водите била одговорноста да провери цела година дали има неправилности во работењето?

Понатаму одговорете, како тоа полицијата била таму, како што самиот го кажавте, и не ја затворила дискотеката која очигледно работела надвор од сите пропишани стандарди? Како дискотека која никогаш порано, па дури и со старите лиценци, не смееле да работи после 1 часот работела до 3 по полноќ?

Таму се организираат настани секој викенд, дали вие воопшто не мислите дека некој досега требал да провери?

Понатаму, Дирекцијата за заштита и спасување треба еднаш годишно да ги прави проверките за безбедносни стандарди на сите објекти? Дали било направено и како се дозволило да оваа дискотека работи?

Понатаму, како што се гледа од снимките, пожарот е настанат од пиротехнички материјали. Зошто молчите дека токму МВР ги издава и контролира овие компании и поединци кои управуваат со овие средства? Дали и кој е приведен и против кој ќе има постапка во МВР што во дискотека без активна дозвола се палеле пиротехнички материјали. Тука одговорноста е целосно во МВР, зошто молчите за ова?

Дали е точно, дека ова лето оваа дискотека била реновирана и пуштена во употреба? Кој дал согласност за тоа, вие бевте на власт и на централно и на локално ниво?! Кој дозволил да се реновира објект без дозвола и да се пушти во употреба? Дали тука и за што е тука одговорна општината за која велите дека нема никаква одговорност?“, рече Чупеска.

Прес конференцијата започна со минута молк.

Сите пациенти што се згрижени во болниците во државата се стабилни и во добра состојба. Од тие 20 критични и средно-критични некои се испратени надвор од државата, извести министерот за здравство, Арбен Таравари.

„На Кличички центар се 25 пациенти сите надвор од животна опасност, градска болница 24, сите надвор од животна опасност, и во „8 Септември“, сите се во добра состојба. Во Штип се 29 пациенти, во Кочани само 13 пациенти. И во двете болници пациентите се во стабилна и добра состојба. Вкупно се 115 пациенти што се лекуваат во нашите болници. Во Солун се тројца пациенти, во Бугарија 14 пациенти, од кои во Софија се осум, во Пловдив се три и во Варна се тројца пациенти. Во Белград е еден пациент, во Ниш еден, во Истанбул тројца пациенти веќе се отидени и вечер со авион ќе одат уште шест. Вкупно 28 пациенти. Вечерва ќе патуваат 4 пациенти за Хрватска и 15 пациенти за Белград. Вкупно 47 ќе бидат на лекување надвор од државата“, изјави министерот.

Таравари најави дека утре на помош доаѓаат специјалисти за изгореници и интензивна нега, од Израел, Белград и Прага.

Тој кажа дека неколку пациенти имаат потреба од кислород, но според него се надвор од животна опасност.

Со солзи во очите и растреперен глас вечерва на македонските граѓани се обрати претседателката Гордана Сиљановска-Давкова за пожарот во Кочани со 59 загинати и 155 повредени. Кажа дека ги посетила повредените во болниците и повика да ги здружиме силите околу преживеаните. Почара дека никој не смее да избегне одговорност.

„Почитувани и сакани граѓани, ве молам водени од хуманоста и емпатијата да се сплотиме во болката свесни дека смртта и болеста подеднакво не допираат сите без оглед на каква било припадност. Не е време за делби и конфронтации, особено кога се во прашање млади луѓе чиј живот за миг згасна заради самоволие, импровизација и манипулација. Без стандарди и правила не смее да функционира ниту една дејност и активност. Ниту еден одговорен овојпат не смее да ги избегне правото, правдата и казната. Да не ја сквернавиме невината жртва на загинатите. Да ги здружиме силите околу преживеаните. Да не дозволиме никој повеќе да ги загрозува животите на невините луѓе. Никогаш повеќе да не ги жртвуваме стандардите и сигурноста на луѓето за профитото и богатството на поединците. Ништо не е повредно од човечкиот, а особено од младешкиот живот“, рече претседателката Сиљановска-Давкова.

И таа, како и многумина политичари денес, рече дека не знае со кои зборови да им изрази сочувство на родителите и најблиските на загинатите.

„Вашата неизмерна болка е и моја. Утринава ги посетив болниците. Пред нив ме дочекаа родителите на повредените со надеж и доверба во медицинскиот персонал. И јас, како нив, верувам дека ќе го сторат не само можното туку неможното за да им помогнат на нивните сакани“, рече претседателката Сиљановска-Давкова.

И во оваа трагедија претседателката нагласи дека не сме сами оти за помош веднаш се огласија не само соседните туку и подалечните држави и кажа дека најтешко повредените се транспортираат на специјализираните клиники во Бугарија, Србија, Грција и Турција заради добивање врвна медицинска помош и интервенција.

„Добрите луѓе од целиот регион, Европа и светот се со нас. Никогаш нема да го заборавиме овој добродетелски чин. Вечно ќе им бидеме благодарни“, рече претседателката на крајот од обраќањето.