Фондот за деца при Обединетите нации – УНИЦЕФ демантира дека стои зад информацијата оти со гаргара со топла вода и сол се уништува коронавирусот.

„Иако многу луѓе споделуваат информации за вирусот и за тоа како да се заштитиме од него, само некои од тие информации се корисни и проверени. Вчера видовме информација која широко се распространи преку социјалните медиуми, во која УНИЦЕФ беше наведен како извор. Информацијата почнува со давање совет за користење маски и завршува со препорака да се прави гаргара со топла вода и сол за да се уништи вирусот во грлото. Тоа не е вистина. УНИЦЕФ не е извор на оваа информација“, велат од таму.

Во соопштението се наведува дека сите информации што УНИЦЕФ ги споделува се објавуваат на локалната веб-страница unicef.mk, на глобалната веб-страна unicef.org и преку социјалните медиуми „Твитер“, „Фејсбук“, „Инстаграм“ и „Јутјуб“.

„Ги поттикнуваме оние што веќе ја споделиле оваа информација да ги поправат своите објави така што ќе ја избришат информацијата и ќе ги известат своите мрежи дека информацијата не е точна и не доаѓа од УНИЦЕФ“, се наведува во соопштението.

УНИЦЕФ ги охрабрува сите да бидат претпазливи и одговорни кога станува збор за споделување информации со тоа што секогаш ќе проверат дали таа доаѓа од проверен извор, како што се Министерството за здравство, Институтот за јавно здравје, Светската здравствена организација и УНИЦЕФ.

„Одговорноста да се заштитиме себеси и другите вклучува и одговорност да провериме дали споделуваме информација од сигурен извор. Ширењето дезинформации во време на здравствена криза ги прави луѓето незаштитени и поподложни на болеста, дополнително ширејќи параноја, страв и стигматизација“, велат од УНИЦЕФ.