Во Агенцијата за разузнавање денеска се одржа свечено доделување на сертификатите од првата универзитетска програма за стручно и професионално усовршување за разузнавање и анализа, а воедно и прв курс од ваков тип на Факултетот за безбедност – Скопје и Агенцијата за разузнавање.

Како што информираат од Факултетот за безбедност, на свеченото завршување на оваа прва универзитетска обука за дел од разузнавачите свое обраќање имале директорот на Агенцијата за разузнавање, Зоран Иванов, деканот на Факултетот за безбедност, Никола Дујовски, и продеканот за наука и развој на Факултетот за безбедност, Марјан Ѓуровски.

Со реализацијата на првата програма на овој проект се отвора нов процес на едукација и професионализација на вработените во Агенцијата за разузнавање.

Програмата за разузнавање и анализа претставува напреден универзитетски курс за стручно и професионално усовршување во разузнавањето. Програмата се реализира врз основа на Законот за високото образование и Законот за Агенцијата за разузнавање.

Во своето излагање на денешната свеченост продеканот за наука и развој на Факултетот за безбедност, Марјан Ѓуровски, нагласи дека универзитетскиот курс се одржува во период кога се спроведуваат длабоки реформи на безбедносната и разузнавачката заедница и преку овој заеднички проект се придонесува кон департизација на разузнавачката заедница.

Директорот на Агенцијата за разузнавање, Зоран Иванов, нагласи дека преку остваувањето на овој проект се помогна во напредното образование и едукација за разузнавање на вработените во Агенцијата за кое, според анализите што се направени, се увидела потребата од таков вид подготовка на разузнавачите.

Деканот на Факултетот за безбедност, Никола Дујовски, истакна дека Факултетот ја остварува својата цел да им се излезе во пресрет на институциите што имаат обврски да реализираат реформи што произлегуваат од процесот за членство во НАТО и ЕУ.

Општата задача што се постигна со универзитетската програма на Факултетот за безбедност и Агенцијата за разузнавање, според деканот Дујовски, е што овластени службени лица добиле унифицирани знаења од разузнавањето, оперативното окружување и современите трендови.

Предавачи на курсот беа професори од Факултетот за безбедност и вработените од Агенцијата за разузнавање и други безбедносни институции. Наставно-образовниот процес се реализира низ предавања, анализи, вежби и практично-применети форми на настава со над 150 часа во изминатите неколку месеци.