Македонија
Филипче: Жените жртви на насилство не се сами, преку институциите ја имаат нашата најголема поддршка
Министерот за здравство, Венко Филипче, денеска се обрати на настан по повод 25 ноември, Меѓународниот ден за борба против насилството врз жените. Тој истакна дека ситуацијата со Ковид-19 значајно ги погоди здравствените системи кај нас, во околината и секаде во светот. Криза за која ниту еден здравствен систем не беше димензиониран и се презедоа активности на реструктурирање и реорганизација на целокупниот здравствен систем.
„Бевме сведоци дека оваа криза не само што ни дава еден таков предизвик за третман на пациентите со Ковид-19, дава и некои други специфики, кои сè повеќе и повеќе излегуваат на виделина. Имено, очигледно е дека стресот го прави своето, дека ова што треба да сме на некој начин на физичка дистанца, што е сосем спротивно на тоа што е еволуцијата на човештвото, нè учи, а тоа е заедништвото. Изолацијата за време на долгите карантини, сепак и според резултатите од Клиниката за психијатрија, резултираа со зголемен број семејно насилство. Разговарав со директорот на психијатриската клиника, секојдневно се регистрираат вакви случаи. Нивната онлајн-амбуланта е преоптоварена со повици и тоа трае од почетокот на кризата од месец. Колегите се силно посветени на ова прашање, ги решаваат проблемите и ги зголемуваат тимовите кои им излегуваат во пресрет на жртвите на насилство“, потенцира Филипче и додаде дека некаде околу 30 % е зголемувањето во однос на истиот период во 2019 година.
Филипче информира дека и претходно, пред Ковид-19, во инклузивен процес, во соработка со сите институции и сите граѓанските организации се отворија три центри за третман на жртви на насилство во гинеколошко-акушерската клиника, во болницата во Тетово и болницата во Куманово.
„Тоа се центри што се целосно опремени од медицински аспект. Работат тимови од гинеколози, психолози, социјални работници, кои се на повик 24 часа, и експерти од областа на судската медицина. Еден од најголемите предизвици со кои здравствените работници се соочуваат е жените што се јавуваат на преглед практично да го признаат тоа. И треба многу вештина во пристапот, во разговорот, во отвореноста, затоа што во огромен број случаи сè уште, за жал, постои страв. Ова е процес што планираме да го продолжиме. Оваа криза одложи проекти, планови, меѓутоа секако планираме такви центри да има особено во големите болници во државата. Жените знаат каде може да се обратат, сигурни се дека може да добијат соодветна стручна помош, а ние сите заедно да работиме на подигнување на свеста, заедно институциите, медиумите, граѓанските организации, сè со цел вакви случаи да има сè помалку“, изјави Филипче.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВМРО-ДПМНЕ веќе има 35 градоначалници, рече Мицкоски по повлекувањето на опонентите од Могила и Македонски Брод, очекува 59
Премиерот Христијан Мицкоски од денешниот митинг во Неготино изрази увереност дека кандидатката од ВМРО-ДПМНЕ која има предност пред нејзиниот опонент од СДСМ, ќе биде следниот градоначалник на општината.
Мицкоски нагласи дека граѓаните јасно ја изразиле својата волја и доверба кон ВМРО-ДПМНЕ и Коалицијата, која во првиот круг освоила 33 градоначалници, наспроти тројца од СДСМ, а во вториот круг влегла во 26 општини.
„Веќе во две општини противниците на нашите кандидати се откажаа – Македонски Брод и Могила – така што во овој момент коалицијата има 35 градоначалници и уште во 24 општини е во втор круг. Тоа се 59 потенцијални градоначалници“, рече Мицкоски, додавајќи дека тоа ќе биде историски најголем триумф на македонската политичка сцена.
Тој посочи дека ВМРО-ДПМНЕ е апсолутен победник на овие избори, имајќи мнозинство и во 58 општински совети, а го истакна и водството на кандидатот за градоначалник на Град Скопје, со предност од над три спрема еден во однос на противкандидатот.
Мицкоски ги повика граѓаните масовно да излезат на гласање на 2 ноември и да го заокружат бројот 9, за, како што рече, да се потврди „најголемата победа во историјата на Македонија“.
Македонија
Бесплатно патување за пензионерите, финансиска поддршка за првачиња и новороденчиња, најави кандидатката за градоначалничка на Неготино, Марија Нацева
Кандидатката за градоначалничка на општина Неготино од редовите на ВМРО-ДПМНЕ, Марија Нацева, на денешниот настан во рамки на кампањата за вториот круг од локалните избори, изјави дека нејзината програма нуди конкретни проекти за подобра иднина и развој на општината.
Нацева нагласи дека акцентот е ставен на развојот на патната и комуналната инфраструктура, со најави за реконструкција на градскиот плоштад, изградба на концертна сала, како и кружни текови на влезот и излезот од градот.
„Во програмата што ја нуди ВМРО-ДПМНЕ има голем број капитални проекти – реконструкција на градски плоштад, изградба на концертна сала, кружни текови на влезот и излезот од Неготино, реконструкција на старата социјална зграда и спортскиот комплекс околу салата ‘Младост’“, изјави Нацева.
Таа додаде дека ќе се инвестира и во образованието, преку реконструкција на училишта, доделување стипендии, финансиска поддршка за првачињата и новороденчињата, како и воведување на бесплатно патување за пензионерите и промоција на локалниот туризам.
Нацева посочи дека дел од плановите опфаќаат и урбанизација и развој на нови зони за инвеститори, што ќе придонесе за нови вработувања и задржување на младите во градот. Таа најави и активности за зелена и енергетски ефикасна општина.
Нацева во Неготино ќе се соочи со Петар Мантев од СДСМ. Првиот круг заврши со 656 гласа во корист на Нацева. Вториот круг од локалните избори ќе се одржи на 2 ноември.
Македонија
Наталија е патриот и инспирира со својата работа, рече Мицкоски за кандидатката за градоначалничка на Демир Капија пред вториот круг
Претседателот на ВМРО-ДПМНЕ, Христијан Мицкоски, на денешниот настан во Демир Капија во рамки на кампањата за вториот круг од локалните избори, изјави дека кандидатката за градоначалничка, Наталија Димитриева ќе оствари убедлива победа на 2 ноември.
„Наталија направи исклучително добар резултат во првиот круг и со поддршката од граѓаните Демир Капија ќе ја добие својата жена за градоначалник. Таа е голем патриот, борец за својата Демир Капија и инспирира со својата работа“, рече Мицкоски.
Тој ги повика граѓаните масовно да излезат на 2 ноември и да го заокружат бројот 9, нагласувајќи дека изминатите 16 месеци Владата испорачала повеќе проекти и реформи по седум години стагнација.
Во вториот изборен круг Димитриева ќе се соочи со кандидатот на СДСМ, Лазар Петров. Во првиот таа освои 1.006 гласови, а Петров 974.

