Претседателот на Владата на Република Северна Македонија, Христијан Мицкоски, денеска одговараше на новинарско прашање дали оваа година се планираат директни исплаќања на земјоделците и колкава ќе биде поддршката од Владата кон нив

„Да апсолутно, сакам да потсетам дека откако сме Влада, само во текот на минатата година кога бевме избрани како Влада од 24 јуни, па до крајот на 2024 година, се префрлени повеќе од 70 милиони евра за земјоделците. Со што се вратени оние долгувања од минатото и сега веќе имаме тековни исплати, што е добро. А, за следната година повеќе од 7,2 милијарди денари нешто над 120 милиони евра, се предвидени за директни плаќања за земјоделците, од централниот Буџет. Земјоделците се нашиот приоритет. Знаете изминатава година имавме навистина добри резултати и кај лозарите и кај јаболкарите.

Се сеќавате при крајот на годината со онаа рекордна висока цена кај тутунарите поддршка добија и оние коишто произведуваат раноградинарски производи сливарите. Потоа се обезбеди на пазар и за оризопроизводителите, пченицата, јачменот итн. Континуирано се помагаат земјоделците, така ќе продолжиме и во оваа година“, информираше премиерот Мицкоски.

Неуспешен обид за интерпелација на петмина функционери во Собранието очекува премиерот Христијан Мицкоски. Собранието в петок почнува со работа, а на првата седница се интерпелациите за вицепремиерот и министер за животна средина – Изет Меџити, за министерот за внатрешни работи – Панче Тошковски и за неговиот заменик – Астрит Исеини, за министерот за односи меѓу заедниците – Иван Стоилковиќ и за Илире Даути – претседателка на Комисијата за социјала политика, демографија и млади.

„Очекувам од опозицијата напади што ќе поларизираат. Очекувам да поттикнат чувства на меѓуетничка нетолеранција, но мислам дека тоа ќе биде јалово и неуспешно и овој обид ќе заврши како неуспешен. Очекувам критики, кои се неосновани, и критики што немаат никаква врска со реалноста. Но, добро, таква ни е опозицијата во овој момент. Се надевам дека е извлечат поука, многу бргу програмски ќе се реструктуираат, но и кадровски ќе се освежат, бидејќи навистина таму гледаме некредибилни луѓе, ние имаме институционална меморија и знаеме што сѐ правеа во минатото“, рече денес премиерот Мицкоски одговарајќи на новинарски прашања по пуштањето во употреба спортска балон-сала во штипската населба Три Чешми.

Интерпелациите за Меџити, Тошковски, Стоилковиќ и за Исеини на 3 декември минатата година ги поднесе пратеничката група на „Европскиот фронт“ по апсењата за инцидентите при одбележувањето на Денот на албанското знаме.

Интерпелацијата, пак, за Илире Даути ја поднесе партијата Левица на крајот на ноември оти во рок од 24 часа не го ставила на дневен ред на собраниска комисија законот за бранители.

Претседателот на Собранието, Африм Гаши, пред две недели најави дека интерпелациите ќе бидат ставени на дневен ред на првата собраниска седница во јануари. Седницата ќе почне во 11 часот.

Премиерот Христијан Мицкоски во Штип денеска најави три проекти значајни за квалитетот на живот на штипјани.

„На овој начин сакам да се заблагодарам на поканата на градоначалникот, а воедно да изразам и благодарност до членовите на Владата коишто се денеска тука со мене, но и на пратениците и на сите останати коишто денеска даваат поддршка на овие проекти, бидејќи на овој начин само ќе го направиме животот на штипјани поквалитетен“, рече Мицкоски.

„Како што кажа и градоначалникот, тука не застануваме, продолжуваме и понатаму. Веќе, ако не се лажам, следната недела ќе започне проектот којшто беше дел од оној прв повик на Владата, тоа е обиколницата, проект вреден околу 2 милиона евра и понатаму веќе од втората половина на овој месец јануари ќе го објавиме новиот повик за проекти коишто ќе бидат финансирани од Владата.

Овде во Штип се планирани проекти да се финансираат во вредност од 6 и половина милиони евра за следната година и така продолжуваме и во иднина. Ја развиваме Македонија насекаде. Знаеме дека на тој начин само ќе го подобриме квалитетот на живот на граѓаните.

Уште еднаш, голема благодарност до градоначалникот, до штипјани, до советниците, до администрацијата, пратениците, членовите на Владата, коишто учествуваат во сите овие проекти коишто значат подобар живот за граѓаните, што претставува и наша цел и задача, но и она коешто сме го ветиле пред граѓаните“, додаде премиерот.