Македонија
Филипче: Направивме реорганизација на здравствениот систем каква што не се случила во историјата

Во првите 100 дена од мандатот на новата Влада целосно сме насочени кон поуспешно справување од здравствената криза предизвикана од Ковид-19. Направивме реорганизација на здравствниот систем каква што не се случила во историјата за одговор на пандемијата и успешно го амортизиравме силниот есенски бран. Ова го напиша на Фејсбук министерот за здравство, Венко Филипче.
Во првите 100 дена од мандатот на новата Влада, целосно сме насочени кон поуспешно справување од здравствената криза…
Posted by Венко Филипче on Monday, December 14, 2020
„Ги активиравме и направивме ротација на сите здравствени работници, план кој беше подготвен уште во летото. Ги ставивме сите ресурси во заштитата на здравјето на граѓаните. Донесовме одлука да ги наградиме сите здравствени работници кои се вклучени во третманот на пациентите заболени од коронавирусот. Го зголемивме и бројот на тестирања од Ковид-19 и го подигнавме на речиси 3.000 дневно. Покрај тоа, отворивме уште едно приемно одделение во Институтот за јавно здравје и ја забрзавме процедурата за земање на тестови. Набавивме брзи тестови за здравствените установи.
Ги пуштивме во употреба амбулантите на Клиниката за пулмологија и алергологија и клиниките ги пренаменивме во ковид центри, со цел секој пациент кој има потреба од хоспитализација истиот да ја добие потребната здравствена заштита. Забрзано работиме и на проектот за поставување модуларни болници со 16 општини во државата. Се бориме со вирусот и заштита на што е можно повеќе човечки животи.
Обезбедивме 833 000 вакцини за Ковид-19 преку КОВАКС-системот и работиме на тековната подготовка за нови набавки.
Покрај справувањето со овој вирус, реализиравме и неколку капитални инвестиции:
➡ Целосно го реновиравме Центарот за дијабетес при Клиниката за ендокринологија;
➡ По 30 години надвор од употреба, го пуштивме во работа целосно реновираниот интерен оддел за женски болести во болницата во Кавадарци;
➡ Новиот крак од струмичката болница се пренамени како ковид-центар;
➡ Целосно е реновиран третиот кат во старата градска болница, а Општата болница во Гостивар го реновираше хируршкото одделение со што ги зголеми болничките капацитети.
Оваа година докажавме дека јавното здравство може да се бори со светска пандемија. Покажавме дека со вистинска грижа, труд, организираност и мотивираност можеме да издржиме на долг рок.
Се заблагодарувам за дадената доверба. Во перидот којшто е пред нас заеднички продолжуваме во унапредувањето на јавното здравство“, напиша министерот на социјалните мрежи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Даниела Димовска избрана за претседателка на скопскиот кривичен суд

Судијката Даниела Димовска е избрана за претседател на Основниот кривичен суд Скопје на денешната седница на Судскиот совет откако претходниот претседател Иван Џолев беше избран за судија во Апелациониот суд. Димовска ќе ја извршува функцијата од 6 јули до завршување на постапката за избор на нов претседател.
Кандидатурата на Димовска ја предложи координаторката Данка Ристова, а предлогот беше поддржан со мнозинство гласови.
На истата седница Судскиот совет назначи вршители на должноста претседатели и во другите судови: Елјеса Алији за Основен суд Гостивар, Мерсим Марку за Основен суд Дебар и Валентина Буревска за Основен суд Свети Николе.
Советот разреши дел од судиите поротници во судовите во Свети Николе, Основниот кривичен суд Скопје и Основниот граѓански суд Скопје поради истек на мандатот. Исто така, беше изгласана одлука за формирање комисии за увид и оценка на пријавите по огласот за избор на претседатели на судовите во Дебар, Гостивар и во Свети Николе.
Дополнително, судијата Драган Јаковлески од Основниот суд Битола е делегиран во Основниот суд Прилеп на една година со цел подобрување на функционирањето на судот.
Македонија
Коцевски побара повеќе пари од буџетот за Обвинителството

Јавниот обвинител Љупчо Коцевски, денеска, пред Комисијата за финансирање и буџет на Собранието упати апел за зголемување на буџетските средства на Јавното обвинителство нагласувајќи дека сегашниот износ е недоволен за исполнување на основните функции и на реформските обврски.
Обвинителот истакна дека минималниот законски предвиден износ од 0,4 отсто од вкупниот државен буџет не е целосно доделен и дека средствата за 2025 година изнесуваат речиси половина од оваа сума. Дополнително, нагласи дека недостигот на финансии го отежнува функционирањето на институцијата, особено во делот на вештачењата, кадровскиот капацитет и дигитализацијата.
Јавниот обвинител посочи дека поради зголемените трошоци за вештачења, како и поради недостиг на стручни кадри, Обвинителството се соочува со сериозни предизвици, особено во сложени предмети, како „Онкологија“ и трагедијата во Кочани.
„Сите сте свесни дека трошоците на Обвинителството по основ на вештачења минатата година значително се зголемија. За предметот ‘Онкологија’ беа изработени две обемни и скапи вештачења во странство. Трагедијата во Кочани, сите трошоци за анализа на обемниот доказен материјал, за обдукции, за истражни дејства, за сложени мултиинституционални вештачења – сѐ ова падна на товар на Обвинителството. Во најава се уште неколку предмети во кои, поради недостиг на стручни лица од соодветна област во нашата земја, вештачењата ќе треба да се бараат во странство, а странските институции веќе бараат претходни гаранции дека сработеното навремено ќе им биде исплатено“, рече Коцевски.
Истовремено, ја потенцира потребата за продолжување на лиценците на донираните софтвери и кофинансирање на проектот за дигитализација.
Од кадровски аспект, Обвинителството укажа дека поради забрана за нови вработувања веќе трета година, како и одбиен годишен план за вработување за 2025 година, екипираноста сериозно е нарушена.
Во обраќањето беа дадени и примери од регионот, каде што Обвинителствата добиваат значително поголема финансиска поддршка, како во Албанија и во Црна Гора.
Јавниот обвинител ги повика пратениците да интервенираат и да обезбедат дополнителни средства нагласувајќи дека вложувањето во правдата е вложување во стабилноста и владеење на правото.
Македонија
Тoшковски: Вложуваме во луѓето, нивната подготвеност и едукација

Министерот за внатрешни работи Панче Тошковски денес во Центарот за обука во Идризово, заедно со министерот за спорт Борко Ристовски присуствуваа на предавање на донација од спортски душеци – татами и кимона наменети за опремување на џудо салата наменета за обука на полициските кадети и полициските службеници.
Министерот Тошковски подвлече дека оваа соработка произлегува од неодамна потпишаниот Меморандум за соработка помеѓу министерствата за внатрешни работи и министерството за спорт и Меморандумот за разбирање помеѓу Националната џудо федерација и Европската џудо федерација кој беше потпишан на Европското првенство во џудо за кадети кое се одржа во Скопје претходната недела.
„Вложуваме во луѓето, во нивната подготвеност и едукација. Градиме силна и подготвена полиција која ќе одговори на безбедносните предизвици на денешнината и успешно ќе се бори со криминалот. За тоа е потребно и постојана физичка подготвеност која ја обезбедуваме преку унапредување на сите спортски капацитети тука во Центарот за обука така и другите капацитети на МВР. Денес со помош на министерството за спорт и Европската џудо федерација ја опремуваме џудо салата каде кадетите и полициските службеници ќе ја одржуваат својата физичка кондиција и ќе унапредуваат своите вештини потребни за успешно извршување на работата.“, истакна министерот Тошковски.
Тошковски образложи дека преку оваа соработка планирани се програми за физичка обука базирани на џудо за полициски службеници во насока на подобрување на самоодбраната и целокупната физичка подготвеност и соработка во многу други активности кои го промовираат спортот, дисциплината и здравото живеење.