Градоначалникот на Општина Центар, Горан Герасимовски, одржа работен состанок со тимот на УНИЦЕФ предводен од Лесли Милер, претставничка на организацијата во државата.

На состанокот се дискутираше на тема општокорисна работа и превенција на вандализмот кај малолетните лица.

Беа разгледани насоки за склучување меморандум за меѓународна соработка и отпочнување пилот-проект во општинските училишта, со вклучување на учениците, наставниците и родителите, со цел да се изнајдат решенија и спроведат координирани активности за превенција на девијантни појави кај малолетниците.

Експертите на УНИЦЕФ споделија искуства од регионот и светот, нагласувајќи дека проблемите поврзани со децата можат да се надминат само преку обуки, едукација и активно учество на целата заедница.

Се разговараше и за потребата од дополнителна регулација во областа на правата на децата и малолетничката деликвенција, преку подзаконска рамка и унифицирање на постапувањето на сите надлежни институции на државно ниво.

Општина Центар прва ја покрена иницијативата, која потоа ја поддржа и ЗЕЛС, за меѓуинституционална соработка и воведување општокорисна работа како воспитна мерка за малолетни сторители на вандализам.

„Вандализмот е сериозен проблем што бара итна и координирана реакција. Малолетните сторители мора да се соочат со одговорност, заедно со нивните родители“, порача градоначалникот Герасимовски.

Иницијативата предвидува измени на Законот за прекршочна постапка, Законот за пробација и Законот за правда за децата, со цел општокорисната работа да стане системска мерка која ќе придонесе за превенција и ресоцијализација.

Дополнително, побарани се измени во Законот за семејство и Законот за извршување санкции, со кои би се вовела и одговорност на родителите преку заедничко учество во општокорисната работа.

Интензивно се одвиваат градежните активности на автопатот Гостивар – Букојчани, кој е дел од Коридорот 8 на релацијата Скопје – Струга – Охрид, објави вицепремиерот и министер за транспорт и врски Александар Николоски на „Фејсбук“.

Тој сподели и видео-материјал од теренот, наведувајќи дека досега се пробиени 17 километри од трасата, со што се заобиколува популарната планинска делница „Стража“.

Во објавата Николоски порача: „Ја градиме Македонија!“.

Автопатската делница Гостивар – Букојчани е дел од големиот инфраструктурен пакет на Коридор 8, кој треба да ја подобри поврзаноста меѓу Скопје, западниот регион и Охридско-струшкиот крај.

Самостојниот синдикат на вработените во универзитетските клиники, центри, клинички болници и други јавни здравствени установи (ССКЦ) предупредува дека предложената внатрешна реорганизација на Министерството за здравство, која предвидува ребалансирање и можност за прераспределба на медицинскиот кадар – меѓу другото и од кампусот „Мајка Тереза“ кон други градови – може дополнително да ја наруши стабилноста на здравствениот систем, особено во најоптоварениот кампус „Мајка Тереза“, се наведува во соопштениетo.

Од ССКЦ потсетуваат дека во програмата на Владата е најавена реформа на здравствената мрежа, обединување на клиничкиот центар и регионалните болници, модернизација на инфраструктурата, спојување на различни здравствени установи и создавање поефикасна и подостапна здравствена мрежа. Според синдикатот, секое кадровско распоредување и реорганизација мора да се темели врз реални потреби, систематизации и долгорочна национална стратегија за развој на здравствениот систем, но дури по интеграција на клиниките од кампусот „Мајка Тереза“, а потоа, согласно потребите и систематизираните работни места, да се прават кадровските распоредувања.

ССКЦ ја нагласува и потребата од заштита на јавниот здравствен систем и укажува дека не смее да се дозволи приватното здравство да го „откупува“ професионалниот здравствен кадар, во чија едукација и обука државата значајно вложува. Превземањето на стручни лица од приватните болници, според синдикатот, ја загрозува стабилноста и квалитетот на јавното здравство и создава непотребна криза во системот. ССКЦ се залага за ефикасни мерки кои ќе спречат вакви злоупотреби, за заштита на јавниот кадар и одржување на високите стандарди на здравствените услуги во јавните установи.

Самостојниот синдикат на клинички центар ја изразува својата сериозна загриженост и поради, како што се наведува, долгогодишното и неоправдано одложување на потпишувањето на Анекс-договорот за јавните здравствени установи – универзитетски клиники, завод и Ургентен центар Скопје (ЈУЗР).

Иако преговорите за Анекс-договорот траат подолг период, а документот, како што наведува ССКЦ, е од суштинско значење за подобрување на статусот, мотивацијата и правната сигурност на вработените, неговото конечно усвојување и натаму се пролонгира, без конкретно образложение и без преземање институционална одговорност.

Според ССКЦ, ваквото одлагање создава правна и економска несигурност, демотивација и нарушување на професионалната стабилност на вработените во ЈУЗР, кои секојдневно обезбедуваат квалитетна и есенцијална поддршка и услуги за сите здравствени установи, често во отежнати услови. Затоа, синдикатот смета дека тие заслужуваат навремено, фер и транспарентно постапување од надлежните институции.

Синдикатот јавно ги повикува Министерството за здравство, Министерството за финансии и Генералниот секретаријат на Владата итно да го деблокираат процесот и да дадат согласност за потпишување на Анекс-договорот, со цел да се обезбеди статусна, правна и финансиска сигурност за сите вработени опфатени со овој процес.

ССКЦ наведува дека останува отворен за конструктивен дијалог и соработка, но дека нема да прифати понатамошно одложување или занемарување на законските права на вработените. Доколку институциите продолжат да ги игнорираат своите обврски, синдикатот најавува дека ќе биде принуден да ги активира сите законски дозволени форми на синдикални активности.

Во соопштението се посочува дека ССКЦ останува доследен на својата мисија да ги заштити правата, достоинството и професионалниот интегритет на сите вработени во здравствениот систем и дека ќе продолжи да се бори за достоинствени услови, стабилност и заслужено вреднување на трудот во здравството.