Македонија
Финансиската упадна во градежна фирма од Охрид поради затајување данок – буџетот оштетен за 4 милиони денари
																								
												
												
											Финансиската полиција до Основното јавно обвинителство Охрид поднесе кривична пријава против градежна фирма и нејзиниот сопственик за даночно затајување.
„Првопријавениот во својство на сопственик, управител и овластено лице на банкарските сметки на второпријавениот правен субјект Друштво за градежништво, проектирање, консалтинг и надзор Е КОНСТУКЦИОН ЕМ ДООЕЛ увоз-извоз Охрид, во периодот 2019-2020 година, со намера да се стекне со противправна имотна корист за себе и правниот субјект, во поднесениот даночен биланс за даночење добивка за 2019 година не пријавил приход во износ од 21.962.859 денари и не пријавил остварена добивка во износ од 20.310.211 денари“, објави Финансиската полиција.
Со тоа, како што се наведува, тој одбегнал да плати данок на добивка по пресметковна стапка од 10 % во износ од 2.031.032 денара и дополнително, со намера да стекне противправна имотна корист од банкарските сметки на правното лице, извршил пренос на парични средства во вкупен износ од 22.085.000 денари на свои лични банкарски сметки. За тоа, како што велат од Финансиската полиција ,немал економска оправданост, ниту обезбедил соодветна документација со која би се оправдале префрлените парични средства во сметководството на фирмата. Парите истиот или наредниот ден по префрлањето ги подигал во готово, односно противправно ги присвоил лично за себе и не пресметал и не уплатил персонален данок од доход по пресметковна стапка од 11,11 % во износ од 2.453.643 денари.
На тој начин пријавените предизвикале штета на буџетот во вкупен износ од 4.484.675 денари по основ на данок на добивка и персонален данок на доход, се наведува во соопштението на Финансиската полиција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
																	
																															Македонија
Утре променливо облачно време, од четврток до понеделник дожд, најавува УХМР
														Времето утре ќе биде променливо облачно со сончеви периоди. Ќе дува слаб до умерен ветер од северен правец. Минималната температура ќе биде во интервал од 5 до 8, а максималната ќе достигне од 12 до 17 степени.
Во Скопје, променливо облачно претпладне со повремен слаб дожд. Ќе дува умерен, северен ветер. Минималната температура ќе се спушти до 7, а максималната ќе достигне до 15 степени.
Во среда и четврток во утринските часови има услови за појава на магла. Под влијание на влажна воздушна маса, од четврток од вечерните часови па се до понеделник, следува период на променливо облачно време со повремени локални врнежи од дожд, наместа пообилни.
Македонија
Герасимовски на средба со противкандидатките Ивановска и Среброва, споделени предлози и идеи за поквалитетен Центар
														Градоначалникот на Општина Центар, Горан Герасимовски, денеска одржа средба со противкандидатките од локалните избори, Билјана Ивановска од „Независни заедно“ и Марија Среброва од „Левица“. Поради работни обврски, на средбата не присуствуваше кандидатот Мирослав Лабудовиќ од „Знам“.
На состанокот, на кој присуствуваа и раководителите на секторите во општината, се дискутираше на повеќе теми од интерес на граѓаните: урбанизам, зеленило, нови паркинг-зони, планираното затворање на сообраќајот во Дебар Маало и друго.
„Високо ги ценам и почитувам моите противници во изборниот процес. Уште на предизборните дебати јавно потенцирав дека секој нивен предлог и иницијатива ќе бидат добредојдени. Нивните искуства со кои влегоа во трката, Среброва како советник во Советот на Општина Центар и Ивановска како поранешна претседателка на ДКСК, го кренаа нивото и квалитетот на целиот изборен процес. Се надевам дека ќе продолжиме со блиска соработка и во иднина,“ рече Герасимовски.
На средбата беше договорено ваквите состаноци да продолжат и понатаму, со цел развивање на заеднички иницијативи во интерес на жителите на Центар.
Македонија
Ќе работиме со транспарентност: Меџити го презеде мандатот како градоначалник на Чаир
														Денес, новоизбраниот градоначалник на општина Чаир, Изет Меџити, и официјално го презеде својот мандат.
Во своето обраќање по повод преземањето на функцијата, Меџити истакна дека ова враќање за него претставува чувство на чест и длабока одговорност кон граѓаните на Чаир кои му укажаа доверба со неспорна изборна победа на последните локални избори.
„Од денес се враќам во моето место, меѓу моите луѓе, со чест, со скромност и со длабока благодарност. Чаир секогаш ме поддржувал, а овој пат ми даде силен мандат, доверба што ќе ја претворам во чесна работа, конкретни резултати и управување што го познава само јавниот интерес,“ истакна Меџити.
Тој додаде дека Чаир е дел од неговиот идентитет, дел од неговата лична историја и јавна мисија, нагласувајќи дека секој успех што ќе следи ќе го носи печатот на граѓаните кои никогаш не се откажаа.
„Пред нас стои ново поглавје. Ќе работиме со јасен план, со транспарентност и со храброст за да направиме големи промени. Имам доверба во луѓето на Чаир, во нивната енергија, талент и љубов кон ова место. Од денес започнува работата за општина Чаир што ја сакаме, од денес започнува нашето време!“, додаде Меџити.

