Фирмата „Бетон“ во 2013 година ја опремила салата за вежбање во Собранието. Од законодавниот дом појаснуваат дека таа е во функција од 2014 година и дека оттогаш не е одржувана и дека на 29 март е објавена првата јавна набавка за нејзино сервисирање и одржување.

„Собранието ја информира јавноста дека на 25 септември 2013 година, Собранието и Друштвото за градежништво ‘Бетон’ АД Скопје склучиле договор, со кој набавувачот (‘Бетон’) треба да набави мебел и друга опрема за новоизградените и реконструираните простории. Под останата опрема ‘Бетон’ набавил и опремил сала за вежбање во Собранието со вкупна вредност од 1.096.383 денари. Поставени се лента за трчање, орбитрек, степер, статичен велосипед, машина за веслање, крос-машина, пек дек машина, лег курл машина, хип хоп машина, пул ап дип машина, абдоминална клупа, универзална клупа, скотова клупа, долги олимписки шипки, сталак за плочи, тегови смит машина, плочи и лет машина. Салата за вежбање е во функција од 10 јули 2014 година и има едногодишна гаранција, според договорот. Оттогаш не е одржувана и тендерот од 29.3.2019 е прва јавна набавка за сервисирање и одржување“, велат од собраниската прес-служба.

Од таму појаснуваат дека Собранието е должно, бидејќи се работи за опрема, која веќе претходно е набавена, да не дозволи да пропадне за што е неопходно одржување и сервисирање. Јавната набавка е во годишниот план и е во висина до 300.000 денари.

Договорот што ќе се склучи е сукцесивен и вклучува по потреба подмачкување на апаратите и доколку се расипат, замена на резервните делови. Ова значи дека 300.000 е максималната сума, но доколку нема потреба од замена на делови, сите пари нема да бидат потрошени.

Фитнес-салата може да ја користат пратениците секој ден и вработените во Службата на Собранието, во вторник, четврток и во петок, од 16.30 часот, по завршување на работното време, до 19.30 часот. Во деновите кога се одржуваат пленарни седници фитнес-салата се користи по завршување на седницата.