Македонија
ФИТР: Нови 4 алатки за дигитализација на општините – поефикасен и поотворен јавен сектор
![](https://makfax.com.mk/wp-content/uploads/2020/03/E-Learning.jpg)
Фондот за иновации и технолошки развој и УНДП успешно реализираа јавен повик за дигитализација на општините – пилот, чија цел е полесен пристап и поквалитетни услуги на локално ниво преку развој на дигитални алатки и решенија.
Избраното решение на компанијата Ентер од Охрид – Е-платформа LUCA E-LSG PLATFORM – ќе ги опфати алатките за Воспоставување електронски систем за наплата на давачките кон општината; Воспоставување систем за електронско плаќање сметки кон јавните претпријатија; Електронски систем на волонтери и онлајн платформа за општински форум. Платформата ќе биде изработена со јасни и разбирливи инструкции за користење, со цел да биде искористено од страна на различни категории граѓани од различни возрасни структури.
Дополнително, платформата е така креирана што нејзината инфраструктура ќе биде столб на идната потполна дигитализација на општинските услуги преку нејзино лесно и економично збогатување со нови сервиси за граѓаните и правни лица, униформност и стандардизација на работењето на општинските службеници, рационализација на трошоците и други предности.
На јавниот повик, реализиран во периодот 2.10 до 19.10 учествуваа 13 домашни компании, од кои 8 преминаа во фаза на финална селекција.
На отворањето на јавниот повик, директорот на ФИТР, Јован Деспотовски, истакна дека „дигитализацијата на јавниот сектор го отклучува потенцијалот за поголема ефикасност и поголем квалитет на услугите. Јавниот сектор така станува поотворен, потранспарентен во своето работење, а со тоа го затвораме просторот за ризик од т.н. ‘ситна’ корупција, со кој се соочуваат многу наши сограѓани секојдневно при потребата за користење на услуги од јавните службеници“.
Нарине Сахакјан, постојана претставничка на УНДП во земјава, најавува продолжување на поддршката за примена на иновации во јавниот сектор.
„УНДП е посветена на поддржување на иновации и дигитализација во различни сектори како начин за надминување на предизвиците создадени од Ковид-19 и за трансформирање на постоечките системи со воведување пофлексибилни и отпорни начини за пристапување до јавните услуги. Во таа насока е и нашата соработка со Фондот за иновации, за остварување на заедничката цел на зајакнување на иновациските активности во земјата, со посебен фокус на јавните услуги и зајакнувањето на соработката меѓу јавниот и приватниот сектор“, рече таа.
Одлуката за избор ја донесе Комисијата за евалуација и избор составена од претставници на УНДП, ФИНКИ, ФИТР и двајца претставници од општините. Степенот на технолошкиот напредок и степен на дигитализација, квалитет на проектот, капацитет на проектниот тим и влијание беа клучни критериуми за оценка на предлог-проектите.
УНДП ги обезбедува средствата за повикот – 4 милиони денари, а спроведувањето му е доверено на Фондот и ќе се врши со користење на успешно воспоставените процедури и капацитетите на ФИТР. Е-Платформата треба да биде изработена за максимум 30 дена и да биде имплементирана до крајот на годинава.
Избраните дигитални алатки во оваа прва фаза ќе се имплементираат во 5 пилот општини: Центар Жупа, Боговиње, Свети Николе, Прилеп и Куманово кои се селектирани преку Програмата за развој на Обединетите Нации (УНДП) насочена кон поддршка на државата за справување со ефектите од Ковид-19, како и спроведување брза и сеопфатна социоекономска анализа за ефектите од пандемијата и утврдување можности за побрзо опоравување на локално ниво.
Избраното решение исто така ќе биде целосно бесплатно достапно и за останатите единици на локална самоуправа од С Македонија, кои ќе изразат подготвеност за нивно имплементирање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Дијаспора
Муцунски се сретна со претставници на македонската дијаспора во Австралија
![](https://makfax.com.mk/wp-content/uploads/2025/02/Mucunski-vo-Avstralija.jpg)
Во рамки на работната посета на Австралија, министерот за надворешни работи и надворешна трговија, Тимчо Муцунски, присуствуваше и се обрати на натпревар на Престон Лајонс, еден од најуспешните македонски фудбалски клубови во Австралија. Клубот претставува спортски симбол на македонската заедница и ја негува традицијата и врските со татковината преку спортот.
„Во црвено-жолта боја, тука од Мелбурн навивавме за тимот кој е гордост на македонската заедница, успешен спортски модел и симбол на спортскиот дух во Австралија,“ напиша Муцунски во објавата на социјалните мрежи. Тој натпреварот го проследи заедно со неколку успешни македонски стопанственици, кои со својата поддршка придонесуваат за зачувување на македонскиот спортски и културен идентитет во дијаспората.
Посетата на Австралија е можност за зајакнување на врските со нашите иселеници, кои имаат значајна улога во градењето мостови на соработка. Во рамки на посетата, министерот Муцунски го посети и македонскиот манастир Св. Климент Охридски – најстариот македонски манастир во дијаспората, како и соборниот храм Раѓањето на Пресвета Богородица во Мелбурн, истакнувајќи дека црквите се важен столб за зачувување на македонскиот идентитет, култура и традиција.
Дополнително, министерот Муцунски оствари средба со претставници на Македонското здружение за благосостојба на заедницата (MCWA), водечка организација во Австралија посветена на обезбедување индивидуализирана грижа за постари лица, со акцент на културната компетентност и инклузивноста. Како заеднички ориентирана организација, MCWA нуди широк спектар на услуги, вклучувајќи програми за добросостојба и рехабилитација, следејќи ги најдобрите практики и регулаторни стандарди.
Македонија
Тошковски ги посети пожарникарите во Кочани: Со 324 пожари само во 2024 година одговорноста е огромна
![](https://makfax.com.mk/wp-content/uploads/2025/02/Toskovski-Kocani.jpg)
Министерот за внатрешни работи Панче Тошковски денес при посетата на кочанскиот крај ги посети и припадниците на Доброволното противпожарно друштво Кочани и Територијалната противпожарна единица Кочани.
„Овие храбри луѓе, со огромна посветеност ги покриваат не само Кочани, туку и општините Зрновци и Чешиново-Облешево. Со 324 пожари само во 2024 година, нивната одговорност е огромна, а меѓусебната соработка меѓу ДПД и ТППЕ е на завидно ниво. Имав можност да ги видам нивните ресурси, да ги слушнам предизвиците со кои се соочуваат и да разговараме за тоа како да изградиме поефикасен систем за справување со пожари и елементарни непогоди. Јасно е дека се потребни сериозни системски реформи за да обезбедиме брза, ефикасна и координирана реакција во секоја кризна ситуација. Како министер ќе направам сè што е во моја моќ за да ги поддржиме овие храбри луѓе и заеднички да вложуваме во иднината на доброволните противпожарни друштва.“, потенцираше министерот Тошковски.
Министерот Тошковски изрази благодарност до сите пожарникари и доброволци за нивната пожртвувана работа која е од непроценливо значење за безбедноста на граѓаните.
Македонија
Со извикување „Правда за Фросина“, „Секој еден може да е следен“ огромна колона граѓани маршираше за Фросина во Неготино
![](https://makfax.com.mk/wp-content/uploads/2025/02/negotino3.jpg)
Огромна колона револтирани граѓани денес во Неготино излегоа на протестен марш за смртно прегазената Фросина Кулакова. Извикуваа „Правда за Фросина“, „Секој еден може да е следен“ и мирно протестираа.
Многумина носеа маички со лого „Правда за Фросина“, имаше нејзини фотографии, а во првите редови беше нејзиното семејство.
Нејзината сестра, Росица, и денес кажа дека ако убиецот на нејзината сестра бил соодветно казнет, Фросина денес ќе била жива.
„Доколку судијката му го продолжила притворот сè до правосилност на одлуката, а по вчерашната одлука на Апелација, тој само ќе беше спроведен во затвор, а мојата сестра ќе беше жива. Затоа бараме одговорност и од судијката Даниела Алексовска – Стојановска“, рече Росица, сестрата на Фросина.
Другарките на Фросина испратија порака дека мора да се казни неодговорноста на возачот без возачка дозвола за да се поттикне одговорноста кај секој возач. Тие кажаа дека маршот во Неготино е поддршка на сите семејства што изгубиле некого и кои мора да продолжат со товарот на загубата.
„Стоп за сообраќајното насилство“ беше мотото на денешниот протест во родниот град на Фросина, а дојдоа луѓе и од други градови. Во колоната револтирани граѓани од македонското судство, беа и роднини и пријатели на други загинати кои бараа повторно да се разгледаат судските случаи.
За да излезе на виделина правдата за Фросина се протестира втора недела. Таа загина во сообраќајна несреќа на булеварот Партизански одреди во Скопје, кога во неа со автомобил удри 20-годишниот Васил Јованов, кој го управувал возилото без возачка дозвола, пијан и на црвено светло.