Македонија
Формирана Интерпартиска парламентарна група за следење на Националната развојна стратегија
Во Собранието се одржа Инаугуративната седница за Интерпартиската парламентарна група за следење на Националната развојна стратегија.
Со седницата претседаваше претседателот на Собранието на Република Северна Македонија, Африм Гаши, кој е иницијатор за формирање на Групата. На седницата, покрај членовите, учествуваа копретседавачите на Групата и координатори на пратеничките групи на ВМРО-ДПМНЕ И СДСМ, Никола Мицевски и Оливер Спасовски, и генералниот секретар на Владата, Игор Јанушев и постојаниот претставник на УНДП, Арменд Григоријан.
Во своето обраќање, претседателот Гаши подвлече дека иницијативата за формирање на оваа Интерпартиска група ја поднел воден од значењето на Националната развојна стратегија за Република Северна Македонија, обемноста на реформите кои се очекува да бидат имплементирани преку нејзина примена, клучната улога на Собранието во процесот на донесување одлуки и неговата активна вклученост во координација на процесите на државно ниво, како и надзорната улога на Собранието врз извршната власт.
Нагласи дека Националната развојна стратегија е клучен стратешки документ што ја дефинира визијата за развој на државата и се темели на три национални развојни цели: зајакнување на конкурентноста на економијата, отворени модели на управување и социјална инклузија. Оваа стратегија обезбедува кохезија; демографска ревитализација, социјален и културен развој; сигурно, безбедно и отпорно општество; владеење на правото и добро управување и зелена трансформација.
Копретседавачот Мицевски укажа дека во време на глобални геополитички, климатски и политички предизвици, брзи технолошки промени и зголемени социјални нееднаквости, на земјава ѝ е потребна јасна, инклузивна и долгорочна визија.
„Националната развојна стратегија е државен документ кој многу тесно е поврзан со нашата стратешка цел – интеграција во Европската Унија. Многу од приоритетите содржани во Стратегијата — владеење на правото, еколошка трансформација, дигитализација, социјална инклузија, се европски вредности и стандарди. Со оваа стратегија нашата земја покажува дека е подготвена не само да се приближи до ЕУ, туку и суштински да ги имплементира европските вредности“, рече Мицевски.
Копретседавачот Спасовски подвлече дека Националната развојна стратегија е водилка за клучните приоритети на државата во следните 20 години.
„Нејзиното усвојување и имплементација покажува голема политичка зрелост, но и одговорност за заедничките, национални и долгорочни цели на државата. Се фокусираше на инклузивните политики, особено за младите, не само како корисници, туку и како креатори на Стратегијата, но и на ранливите групи, маргинализираните групи, лицата со попреченост и сите групи кои се соочуваат со било какви бариери“, рече тој.
Присутните се осврнаа и на воспоставениот систем за следење на НРС преку дигитална Контролна табла на www.nrs.mk , а во соработка со МАНУ и Универзитетот од Денвер се развиваат сценарија и индикатори за оценка на напредокот. Со поддршка на партнерите УНДП и Министерството за финансии на Словачка имплементацијата на Националната развојна стратегија ќе биде имплементирана во периодот кој следи со активно учество на сите заинтересирани страни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла
Македонија
Божиновска и Јоксимовиќ: Забрзана изградба на гасниот интерконектор Македонија–Србија, се редефинира енергетската карта на регионот
Во рамки на 14. Меѓународен форум за енергија и одржлив развој (IFESD-14), што се одржува во Скопје, министерката за енергетика, рударство и минерални суровини, Сања Божиновска, оствари работна средба со Јована Јоксимовиќ, помошничка министерка за рударство и енергетика на Република Србија, задолжена за меѓународна соработка и европска интеграција.
Во фокусот на разговорите беше изградбата на гасниот интерконектор меѓу Македонија и Србија, проект од стратешко значење за енергетската безбедност и диверзификација на снабдувањето со гас во регионот.
Двете соговорнички се согласија дека проектот треба да се реализира во забрзана динамика, со цел да се овозможи поврзување на гасните системи на двете земји и пристап до нови извори на гас.
На маргините на форумот dополнително, во Министерството за енергетика на Македонија се одржа работен состанок на кој се дискутираше координацијата на институциите и операторите во двете земји за реализација на проектот. Ба разгледани процедурите и техничките чекори за понатамошно убрзување на активностите.
„Гасниот интерконектор со Србија е еден од најважните регионални инфраструктурни проекти што ќе овозможи вистинска енергетска стабилност и сигурност. Овој проект не е важен само за Македонија и Србија – тој е значаен и за цела Европа. Со оваа нова енергетска врска, двете земји добиваат пристап до алтернативни извори и рути, а Европа добива посилен и подобро поврзан Балкан. Ова е чекор што ја позиционира нашата земја како активен и одговорен партнер во новата енергетска карта на Европа. Нашата заедничка цел е овој проект да се реализира во најкраток можен рок – затоа што секој ден е важен за нашата енергетска иднина. Со заеднички напори ќе го реализираме овој проект, во тесна координација и постојана комуникација со нашите партнери од Србија “ изјави Божиновска.
„Гасниот интерконектор со Македонија е проект кој има значење подалеку од нашите граници. Тој е дел од визијата за регион кој е енергетски поврзан, сигурен и усогласен со европските цели. Србија и Македонија заедно покажуваат дека со партнерство и заедничка стратегија можеме да обезбедиме стабилна и предвидлива енергетска иднина. Соработката меѓу нашите две земји во областа на енергетиката е пример како регионалното партнерство може да донесе конкретни резултати. Соработката со колешката Божиновска и со македонскиот тим е интензивна и исклучително конструктивна. Уверена сум дека со заедничка координација и поддршка на нашите оператори ‘Србијагас’ и ‘Номагас’, ќе создадеме нова енергетска оска на стабилност меѓу двете земји. Имаме јасна динамика, завршени студии и поддршка од европските институции. Следниот чекор е координирана акција за изградба. Заеднички ќе работиме на тоа интерконекторот да стане реалност во најскоро време,“ истакна Јована Јоксимовиќ, помошничка министерка за меѓународна соработка и европска интеграција во Министерството за рударство и енергетика на Србија.
Македонија
Утре без вода делови од Карпош
Од ЈП Водовод и Канализација известуваат дека утре ( Четврток )поради изведување на водоводен приклучок ф-100мм на ул. Софиска 7, прекинато водоснабдување ќе имаат корисниците од следниве улици: Софиска, Бриселска, Петар Драганов, Његошева, Копенхагенска и Стокхолмска.
Водоснабдувањето ќе биде прекинато од 09:00 часот до завршување со работните активности. (општина Карпош).

