Министерот за внатрешни работи, Панче Тошковски, во статус на социјалните мрежи се огласи по критиките од опозициските партии за одговорноста и истрагата во случајот со дискотеката „Пулс“ во Кочани.

Тошковски вели дека ДУИ, СДСМ и Левица, синхронизирано и оркестрирано ги насочиле нападите кон него, со сите свои расположливи сили, а дополнети и со нови, очекувано продолжени удари од страна на СДСМ утрово, чувствува обврска пред јавноста да укаже на суштината на оваа, како што ја нарекува, невообичаена и сè поочигледна алијанса.

„Три партии, различни во својата форма, а слични во својата природа, вчера се здружија во обидот да фрлат сенка над она што три децении го чека македонскиот народ – расчистување со корупцијата и ставање крај на политиката на неказнивост. Три партии, кои наводно се борат една против друга, вчера покажаа дека нивниот заеднички интерес е посилен од сите нивни привидни разлики.

ДУИ – партијата која во долгите години на владеење заедно со СДСМ создаде заробена држава, со систем во кој криминалот не беше исклучок, туку правило. Партијата која остави зад себе пустош од корумпирано судство, нефункционално образование без учебници, здравство кое наместо лекови произведуваше трагедии, загаден воздух кој го труе секој граѓанин и институции заробени од партиски војници наместо од професионалци.

Истите тие функционери на ДУИ кои некогаш со ароганција велеја дека не одговараат пред законот, туку само пред Али Ахмети, а кога некој ќе им спомнеше одговорност за криминал, одговараа со закани со чизмите од таванот, денес панично се разбегаа бидејќи за првпат почувствуваа дека законот е над партијата. Па би сакал вака јавно да ги прашам:

Каде е денес Артан Груби? Каде е денес Прпарим Бајрами? Зарем не беа токму тие најгласните борци за правата на Албанците, кои наместо права, си обезбедија само привилегии за себе и своите семејства? ДУИ никогаш не се бореше за Албанците, се бореше само за позиции од кои можеше да го ограбува и албанскиот и македонскиот народ.

И сега, кога за првпат по 30 години владеењето на правото не е само празна флоскула, туку реалност, кога институциите конечно почнаа да функционираат и правдата пристигнува до оние кои мислеа дека засекогаш ќе бидат недопирливи, ДУИ без срам зборува за одговорност.

СДСМ пак, кои зборуваат за селективност и неправда, треба да се присетат дека за време на нивното седумгодишно владеење со ДУИ, државата ја потресоа три големи трагедии во кои животот го загубија над 70 луѓе. И сега добро запомнете: за сите тие загубени животи, СДСМ не поднесе НИЕДНА кривична пријава. Ниедна! Истите тие денес велат дека истрагата за Кочани е фарса, а во оваа наводна „фарса“ веќе имаме над 50 осомничени. Зборуваат за морален пораз, привезоците на ДУИ кои седум години беа тивките соучесници во распаѓањето на државата, а денес, без грам срам, се обидуваат да се претстават како глас на совеста. Лицемерието нема граница, а СДСМ треба да знае дека меморијата на македонските граѓани не е толку кратка како што би посакувале.

Но најинтересна е улогата на Левица, политичките паразити кои живеат и се хранат од народниот гнев создаден токму од нивните денешни партнери, ДУИ и СДСМ. Левица, која со години не пропушта можност да се претстави како алтернатива, всушност е само уште една алатка на истите структури кои на Македонија ѝ ја одземаа иднината. Денес, кога конечно системот се чисти, Левица ги напушти своите наводни принципи и застана во одбрана на токму оние кои ги обвинуваше до вчера. И не е тоа затоа што тие се нова партија со визија, туку затоа што најдобро опстојуваат во времиња кога системот е разнишан, а довербата на граѓаните во институциите е убиена од нивните некогаш прикриени, а денес очигледни сојузници.

Вчерашниот ден најдобро покажа каде сме и зошто толку силно удираат. Не се напаѓа оној што не претставува закана, се напаѓа оној што навистина менува нешто. Оној што не прифаќа да биде дел од нивниот удобен систем на молк, неказнивост и меѓусебна заштита. Токму затоа, јас овие напади не ги гледам како закана, туку како комплимент дека конечно правдата ги допре оние кои мислеа дека засекогаш ќе останат недопирливи.

Ова не е само моја битка, ова е наша битка. Ова е битка на сите граѓани кои 30 години живеат во држава во која политичката елита си играше фудбал по канцеларии и ја шутираше Македонија како топка. Денес, наместо тие да ја шутираат државата како што сакаат, законот почна да ги удира токму таму каде што најмногу ги боли.

Затоа продолжуваме напред, со јасна визија, со уште поголема одлучност. Правдата почна да тропа на вратата на секој оној кој мислеше дека таа никогаш нема да го посети. И таа правда нема да се врати назад без резултати.

Ако нападите се цена што мора да ја платиме за ова, тогаш јас сум подготвен секој ден да ја плаќам, затоа што ова не е само политичка битка. Ова е враќање на Македонија таму каде што ѝ е местото, во рацете на граѓаните, а не во рацете на криминалците. Македонија мора да биде држава каде што одговорноста нема партиска боја, а правдата нема цена. Токму таа Македонија е целта за која вреди да се издржат сите овие напади. И таа Македонија, заедно со граѓаните, конечно ќе ја изградиме“, напиша Тошковски.

„Венко Филипче не е само партиски другар на Зоран Заев, тие се и тендер тандем кои ги интересираат само провизиите, од кои сега градат и висококатници во најексклузивните светски дестинации. Освен СДС, турите со скапите мотори низ државата и регионот, нивна заедничка спојка сега е и Дубаи, каде што ги вложуваат парите од провизиите кои тендер тандемот Филипче-Заев ги печалеше на грбот на народот“, велат од ВМРО-ДПМНЕ.

„Филипче и Заев се неразделен тендер тандем уште од времето кога заеднички владееле со државата и народот го пљачкале. Нив ги интересира само провизиите од тендерите, државата и народот не им се битни, за народот и државата не им е гајле, тие им послужија само како средство за лично богатење.

Ковид кризата, во која од вирусот починале скоро 10 илјади луѓе, се случи за време кога Венко Филипче беше министер за здравство. Тој, заедно со својот тендер партер Заев, корона кризата ја претвориле во можност за нивно богатење.

Во ек на оваа криза, додека луѓе умираа, тогаш министерот Венко Филипче, направил јавна набавка за томографии, за кои што македонските граѓани платиле дополнителни 15 милиони денари.

Имено, првично имало јавен повик за томографии на кој требало да се плати 21 милион денари, но двајцава мајстори за афери и тендери, Филипче и Заев си одлучиле дека тоа не им одговара, па си го поништиле тендерот. После тоа, со истата фирма си направиле нов тендер по нивна мерка, но поскап за 15 милиони денари.

За време на кризата со вирусот Ковид 19, кога граѓаните секојдневно бараа вакцини за спас, Заев и Филипче си средиле тендер по нивен терк, но поскап за граѓаните.

Тоа е овој тендер тандем кој постепено го уништуваше македонското здравство за сега, од спечалените провизии, да гради висококатници во Дубаи.

Затоа Заев и си го постави својот послушен пион, Венко Филипче за претседател на СДС, кој го интересира само власт за да дофати уште некој тендер, за уште некоја провизија.

Но, Флипче треба да знае, дека за профитерите на маката на граѓаните и уништувачите на нивното достоинство, нема место на македонската политичка сцена и како што Заев и Ковачевски се испратени во пензија, и него го чека истото“, соопшти ВМРО-ДПМНЕ.

Министерот за здравство, Арбен Таравари, вели дека ќе има одговорност ако бидат утврдени пропусти во случајот со смртта на пациентот Тони Ангеловски, кој со пукната аорта почина чекајќи операција на Клиниката за кардиохирургија.

Таравари рече дека се уште го нема видено извештајот.

„Ќе го видам извештајот. Ќе треба да има веднаш и стручна комисија. Според моите информации, едната сала работела. Но дајте ми време да го видам извештајот“, рече Таравари.

Семејството на 59-годишниот Ангелковски претходно обвини дека тој не бил опериран бидејќи од клиниката им кажале дека нема слободни сали. Ги препратиле до приватни болници каде им било кажано дека квотата била исполнета до јуни. И покрај тоа ги повикале да го донесат пациентот, да го стабилизираат но бидејќи немале дел кој им е потребен, не можело веднаш да се изврши процедурата.

Од клиниката за кардиохирургија велат дека пациентот веднаш бил згрижен, ја примил потребната терапија, по што состојбата му се стабилизирала. Откако биле разгледани сите наоди, лекарскиот конзилиум утврдил дека ако се изврши отворен хируршки третман, шансите за преживување на пациентот би биле екстремно мали, што му било и објаснето на семејството. Од тука потврдија дека втората сала е надвор од функција повеќе од еден месец заради поставување на нов апарат кој бара и реадаптација на просторот.

Препорачани биле две приватни болници како и лекување во странство.