Македонија
(Фото) Абази дојде со Трајчева за да ја чуе пресудата за Рашковски

Шефот на Обвинителството за гонење организиран криминал и корупција, Ислам Абази, дојде на рочиштето за изрекување пресуда на Драги Рашковски и другите обвинети во случајот „Софтвери“.
Тој ја придружува обвинителката Ивана Трајчева, која го застапува обвинението.
Ова значи дека тој ќе ја проследи одлуката што ќе ја донесе судечкиот совет на денешното рочиште – дали Рашковски и другите ќе бидат прогласени за виновни или не.
Ова е вторпат како Абази се појавува во Кривичниот суд за овој предмет. Претходниот пат беше кога обвинителката Трајчева даваше завршни зборови за случајот.
По изборот за шеф, Абази ретко се појавува во јавност и не застапува обвиненија.
Што направиле
„Софтвери“ е предмет отворен по допрен глас од обвинителката Ивана Трајчева. Обвинението е за набавка на два софтвера и исплата на хонорари. Првиот софтвер е за сообраќајни прекршоци и биометриска идентификација, кој, според обвинителката, никој не ги користел, а Генералниот секретаријат со кој управуваше Рашковски ги набавил иако немал надлежност за тоа. Дополнително, обвинителката докажуваше дека тендерите биле наместени.
Вториот дел од обвинението е за хонорарите. Тој склучувал авторски договори со физички лица што не ги извршувале работните обврски. Според обвинението, тие подигнувале дел од парите и му ги враќале на Рашковски. Со тоа е направена штета на буџетот во вкупен износ од 1.320.000 денари.
За што се гонат
Првообвинет е Рашковски. Обвинет е дека сторил продолжено кривично дело злоупотреба на службената положба и овластувањето и кривично дело перење пари и други приноси од казниво дело. Дополнително, во текот на постапката му беше ставено на товар уште едно кривично дело – фалсификување исправа бидејќи презентира извод од банка со нецелосни податоци, а ги претставуваше како целосни.
Второобвинет е Ивица Димитровски, професор на Факултетот за информациски технологии и компјутерско инженерство (ФИНКИ) и ангажиран во Генералниот секретаријат. Се гони за кривичното дело злоупотреба на службената положба и овластувањето. Според обвинението, иако изготвувал техничка спецификација за тендерите, а истовремено учествувал и во постапките за јавни набавки за нив – во едната како изведувач, во другата како подизведувач. И Димитровски се товари дека ги враќал парите што му биле исплаќани од Генералниот секретаријат.
Третообвинет е Игор Христов. Станува збор за сопственик фирмата „ГБЦ системи“. Доколку се следи текот на набавката на опремата, која секогаш завршувала во Генералниот секретаријат, ќе се утврди дека секоја фирма што склучила некој од четирите договори за јавни набавки ја набавила од неговата фирма. Истовремено, и тој бил надворешен соработник во Владата. Рашковски и сам призна дека се стари пријатели.
Даниел Станчев е четвртото обвинето лице. Тој е сопственик на фирмата „Инвока груп“ за која јавноста дозна кога беше утврдено дека користела простории на Правниот факултет, каде што предава првообвинетиот Рашковски. Според презентираните пораки од Обвинителството, тој бил во постојана комуникација со Рашковски кога се подготвувале тендерите, кога се спроведувала јавната набавка и се договараат за последна цена во јавната набавка. Сите овие пораки беа презентирани во судница, а Рашковски никогаш не ја демантира содржината, туку само дека не се гледа неговото име. Притоа обвинителката на секое рочиште потенцира кои лица и броеви биле во посочените вибер-групи, меѓу нив и Рашковски, потпишан како „Перо 078“. Дури и обвинетите кога контактирале меѓусебно, зборувале за „Перо“, а според обвинението, тоа е Рашковски. Тој негира дека има ваков прекар.
Хонорарците што се гонат дека зеле пари без да работат се Игор Ивановски и Маја Силјановска. Истовремено, хонорарец е и Ирена Ивановска, која ја има во комуникациите од вибер-групите заедно со Станчев и Рашковски. Обвинението е дека Ирена Ивановска им ги дава своите извештаи на својот брат Игор Ивановски и на Маја Силјановска за тие да ги достават извештаи само со сменето име. Дополнително, двајцата хонорарци Игор и Маја, според обвинението, враќале дел од парите што завршувале кај Рашковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Велеа дека лидерска е губење време, па обвинуваат за моноетничност, ги повикувам повторно

Јас повикав на средба со сите претседатели на политичките партии и, да ве потсетам, претседател на една албанска партија рече дека тоа би било губење време (се мисли на Таравари), а сега нè обвинуваат за некаква моноетничка средба. Ова го истакна претседателот на СДСМ, Венко Филипче, во одговор на новинарско прашање поврзано со обвинувањата од албанскиот блок на политичките партии дека вчерашната средба во Владата со премиерот Христијан Мицкоски е план за моноетничка соработка.
„Јас на тој состанок го претставував СДСМ, а премиерот Христијан Мицкоски ВМРО-ДПМНЕ, и ние се состанавме како лидери на двете најголеми партии во македонскиот блок. Притоа премиерот Мицкоски беше првиот што без забелешка и единствен што ја прифати поканата за средба“, истакна денеска Филипче од Струмица.
Тој уште еднаш упати јавен повик до сите политички партии за организирање лидерска средба.
„Апсолутно, сметам дека треба да продолжиме во следниот период во насока на организација на средба на лидерите на сите поголеми политички партии. Ова нека биде уште еден мој повик до сите партии бидејќи јас тука не гледам никаква потреба да се делиме на македонски или албански блок кога станува збор за интересите на државата“, потенцира претседателот на СДСМ.
Филипче истакна дека никој нема право да го обвинува Социјалдемократскиот сојуз на Македонија за етнички или националистички политики или пристап имајќи предвид дека во извршниот одбор на СДСМ има Албанец, Македонка муслиманка, а во следниот период ќе има и Ромка.
Претседателот на СДСМ повтори дека вчерашната средба со премиерот била конструктивна и на неа било договорено формирање заеднички тела или групи што ќе работат на подготовката на законите од реформската агенда, со фокус на правосудството, енергетиката и стратешките проекти во здравството, а кои треба да стигнат во Собранието.
Македонија
Антикорупциската комисија jа запре постапката за имотниот лист на Филипче, не криел податоци

Антикорупциската комисија jа запре постапката за имотниот анкетен лист на пратеникот и претседател на СДСМ, Венко Филипче.
По проверките во Катастарот, Централниот регистар, МВР, УЈП и повеќе банки, утврдиле дека анкетниот лист на Филипче бил целосен и нема прикривање податоци за имот.
Антикорупциската комисија лани ја отвори постапката за проверка на имотниот лист на опозицискиот лидер. Претходно, владеачката партија ВМРО-ДПМНЕ обвинуваше дека имотниот лист на претседателот на СДСМ бил поголем и тој имал повеќе станови сега како пратеник отколку претходно кога беше министер за здравство. Становите не ги пријавил кога требало и најавија дека ќе поднесат претставка до антикорупциската комисија.
Македонија
Левицата со демант до ВМРО-ДПМНЕ: Цената на квадратот е дефинирана со деловни преговори

Левица ги демантира, како што велат, паушалните обвинувања на премиерот Мицкоски и неговата криминогена партија, кои во обид да го амортизираат нивното катастрофално работење, шират невистини и спинови за единствената легитимна опозиција Левица.
„Покрај обидот на Мицкоски да направи сензација од непостоечка тема, мислејќи дека ареолот на криминал кој тие го имаат воспоставено во политиката во однос на нивната Бела палата, ќе се преслика на другите политички партии – ја информираме јавноста дека Левица преку хипотекарен кредит ги обезбеди своите први простории откако постои, како централа за сите политички активности на Партијата. Односно, купените простории се под залог. Цената на квадратот, како и во сите случаи на купопродажба, е дефинирана со деловни преговори помеѓу продавачот и купувачот. Се работи за подрумски простории, кои се во руинирана состојба. Со спомнуваната банка Левица нема никаква деловна соработка, освен како продавач на овој имот кој бил под стечај веќе две години и пропаѓал“, велат од партијата.
Од Левица додаваат дека документите за купопродажба се јавно достапни во Катастарот на недвижности, иако, како што велат, премиерот на собраниската говорница мафташе со документи како да се службена тајна. „Имено, кога станува збор за тајни документи, нам како опозиција повеќе не’ загрижува вмешаноста на високите владини функционери во излевањето на државни тајни кон картели преку своето обезбедување“, се наведува во демантот од Левица.