Градоначалникот на Гази Баба и кандидат за нов мандат, Бобан Стефковски, информира дека започна со градба третата нова детска градинка во општината.

„Почнаа градежните активности за новата детска градинка помеѓу Маџари и Керамидница. Градинката ќе биде со површина од 1360 метри квадратни со капацитет за 150 деца. Вредноста е 147.000.000 денари, средства обезбедени од Владата. По градинките во Трубарево и Инџиково, денес ја почнуваме и третата градинка! Ова никогаш досега не се случило – во еден мандат, еден градоначалник да гради три нови градинки! И не застануваме тука! Во вториот мандат – нови градинки и за Хиподром 2, Керамидница и Сингелиќ!“, објави Стефковски на „Фејсбук“.

Снимките кои излегоа во јавноста, на кои јасно се гледа односот на градоначалникот на Кичево, Фатмир Дехари, кон жени вработени во Општината, претставуваат скандал и срам за државата, изјави Марија Митева, член на ИК на ВМРО-ДПМНЕ.

Според неа, навредите, понижувањето и злоупотребата на службената позиција се однесување кое не му доликува на човек, а уште помалку на градоначалник.

„Најостро го осудуваме овој чин и бараме итна реакција од сите надлежни институции и организации, од Јавното обвинителство кое треба и мора да го провери овој случај, дали бил изолиран или пак станува збор за начин на делување на Дехари, па се до Народниот правобранител и сите организации кои ги застапуваат и штитат правата на жените“, рече Митева.

Таа додава дека нема простор за молк и дека ова е чин за осуда и санкционирање.

„Секој кој ја злоупотребува својата функција за навредување и вознемирување на своите вработени мора да сноси кривична, но и морална одговорност. Дехари со ваквото однесување ја изгуби секоја доверба, градоначалник кој покажал такво непочитување кон жените и институцијата што ја води, не ја заслужува довербата на граѓаните. И сигурни сме дека и албанската заедница се срами од ваквото однесување, бидејќи ова не е прашање на етничка припадност, туку на човечко достоинство и морал“, изјави Митева.

Кадидатот за градоначалник на Скопје од ВМРО-ДПМНЕ, Орце Ѓорѓиевски, е убеден во победа, а вели дека искрено очекува тоа да се случи уште во првиот круг. Вели дека победа во првиот круг очекува не за себе, туку поради граѓаните, оти пролонгирање на процесот за три недели ќе значи пролонгирање на голготата која сега се случува.

„Искрено, да, очекувам силна победа во првиот круг. Верувам во народот, верувам во граѓаните. Таа победа јас не ја барам и не ја очекувам поради себе, не ја очекувам за да добијам политичка круна од сето тоа. Де факто, во Скопје на сите им е јасно кој ќе биде победникот на овие избори, но победата во првиот круг би значела многу побрзо влегување во костец со проблемите. Каде и да погледнете околу нас, имаме мини депонии, околу сите микролокации со контејнери. Три недели пролонгирање на целиот процес ќе биде три недели повторно живеење во голгота и во хаос“ вели Ѓорѓиевски.

Победа во првиот круг рече дека бара и оти доаѓаат зимските месеци кога градот треба да се реорганизира и да не дозволи повторно возрасни лица, студенти и средношколци да чекаат со часови и да мрзнат на автобуските станици.

„Знаете дека сум работник и ќе дадам сè од себе многу бргу да ги средиме сите процеси, да ги нормализираме од првиот ден кога ќе влезам во Град Скопје. Пролонгирањето на три недели само ќе значи пролонгирање на целата голгота што се случува. Јас сум апсолутно свесен дека има кандидати како никогаш досега. Математички е изводливо ако народот реши на таков начин да постапи. Јас верувам силно во овој народ. Изминативе четири години покажав дека апсолутно во сите ситуации сум на страната на граѓаните, дека тие ми се приоритет, дека човекот ми е приоритет и така ќе функционирам во наредните четири години“, рече Ѓорѓиевски и ги повика и граѓаните, но и политичките партии, да му дадат поддршка за победа во првиот круг од изборите.

И денес ветуваше дека кога ќе стане градоначалник на Скопје, градот ќе блесне, односно покрај тоа што ќе го исчисти, ќе го реши и сообраќајниот хаос. Во првите шест месеци вети дека ќе се заврши мостот на „Љубљанска“ и поврзувањето од Карпош кон „Скупи“, на крајот од првата година од мандатот ќе заврши изградбата на клучката кај Момин Поток, веднаш по изборите рече дека ќе почне да ја проширува улицата Цветан Димов во Чаир за да има шест коловозни ленти, а истовремено ќе ги почне и кружните текови во центарот неопходни за да почне да функционира подземната сообраќајница под „Лимак“, како и првата фаза од булеварот Хрватска, кој ќе ги поврзе Гази Баба и Бутел и ќе го растовари метежот во Автокоманда.