Македонија
(Видео) Хан: Македонија се врати на европскиот пат, но има уште многу да се работи
Македонија се врати на европскиот пат, но има уште многу да се работи, изјави еврокомесарот Јоханес Хан на заедничката прес-конференција со премиерот Зоран Заев на која му го предаде извештајот на Европската Комисија за напредокот на Македонија во кој се содржи чиста препорака за почеток на преговори. Тој рече дека реформите мора да продолжат, особено во независноста на судството, и истакна дека промената не значи само да се подобри легислативата, туку е потребна и нејзина имплементација.
„Не можам да ја скријам мојата лична среќа за овој успех постигнат по многуте посети. Ова е еден пат кон Европа и останува уште многу да се направи, но уште еднаш искрено им честитам на Владата и на опозицијата, која конечно беше сериозна во поддржувањето на оваа национална цел. Сите овие страни придонесоа до овој момент кој е важен за патот кон ЕУ на Македонија“, рече Хан.
Тој рече дека и граѓаните ја заслужија оваа неусловена препорака со која сите земји членки на ЕУ го признаа фокусирањето на земјата кон постигнувањето на целите.
„Земјата помина долг пат и покрај тешките околности за да ја надмине длабоката политичка криза и сега сте цврсто назад на европскиот пат. Гледаме дека има позитивна промена, обновено чувство на отвореност и надеж во земјата. Ги чувствувам атмосферата и добрите вибрации во земјата. Македонија стана ветување за демократска промена во целиот регион. Со имплементирање на договорот од Пржино реформите се спроведуваат, имаме отворени и транспарентни реформи. Но, за да се задржи ова, нема простор за задоволство, реформите мора да продолжат, особено во независноста на судството, промената не е само да се подобри легислативата, туку и нејзина имплементација“, рече Хан.
Според него, Владата со планот 3-6-9 постигнала многу за усвојување на неопходното законодавство и сега треба да се имплементира.
„Вие може да бидете модел за регионот. Доколку имате конкретна имплементација, постои можност за што побргу влегување во новата фаза. Мислам дека добро почнавте и важно е да се одржи ова во смисла на транспарентност и независност“, рече Хан, кој му го предаде извештајот на Заев.
Тој го поздрави враќањето на ВМРО-ДПМНЕ во парламентот и рече дека очекува нејзино учество во дебати и поддршка во реформите.
Во однос на преговорите со Грција, Хан оценува дека е важно да се најде решение. „Ова е важно не затоа што би почнале преговорите за членство во ЕУ, туку за да се одржуваат добри односи со соседите“, рече Хан. Тој го посочи договорот со Бугарија како позитивен пример и во таа насока порача дека треба да се искористи моментот за да се постигне решение.
„Секогаш секој ќе треба да се откаже од нешто, тоа е компромис. Но, информиран сум дека двете страни се одлучни за постигнување фер и достинствено решение. Им честитам на министрите за надворешни работи за посветеноста да се надминат проблемите од минатото“, одговори Хан на новинарско прашање дали ЕУ има план Б ако не се реши спорот за името со Грција.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Минчев со честитка за 8 Декември – Свети Климент Охридски
Министерот за јавна администрација, Горан Минчев, испрати честитка по повод 8 Декември – Свети Климент Охридски.
„Нека е честит големиот христијански празник, 8 Декември – Свети Климент Охридски.
Делото на Свети Климент, неговата посветеност на образованието и на создавањето силна духовна и културна традиција, останува траен темел на нашата историја и идентитет.
Неговиот пример не поттикнува да создаваме подобро општество засновано врз знаење, честитост и заемна поддршка.
Нека празникот ни донесе личен и колективен напредок, а во нашите домови мир, здравје и радост“, пишува во честитката.
Македонија
Запленети 237 парчиња разновиден рачен, батериски и електричен алат без документација, уапсени две лица
Полицијата заплени 237 парчиња разновиден рачен, батериски и електричен алат без документација, а уапсени се две лица.
Според информациите на МВР, вчера на автопатот Табановце-Куманово, полициски службеници ги лишија од слобода Л.А.(32) од с.Никуштак и А.Ш.(32) од Скопје.
Полициските службеници запреле патничко возило „мерцедес” со скопски регистарски ознаки, управувано од Л.А., а сопатник А.Ш., и при преглед на возилото пронајдени се 237 парчиња нов неупотребуван разновиден рачен, батериски и електричен алат, без никаква документација.
Возилото и алатот се одземени, а лицата се уапсени и по документирање на случајот ќе биде поднесен соодветен поднесок.
Македонија
Доделување на наградата „Св. Климент Охридски“
Во Кристалната сала на Собранието, денеска, Одборот за доделување на државната награда „Св. Климент Охридски“ ќе ја додели државната награда „Св. Климент Охридски“ за 2025 година за највисоко признание за долгогодишни остварувања во областа на воспитанието, образованието, културата, уметноста, здравството, заштитата и унапредувањето на човековата околина и во социјалната дејност од јавен интерес на Република Северна Македонија.
Државната награда „Св. Климент Охридски“ за остварување во областа на воспитанието и образованието му се доделува на академик Витомир Митевски, филозоф и класичен филолог, а наградата за остварување во областа на културата и уметноста, им се доделува на композиторот Живоин Глишиќ и на ликовниот уметник Беди Ибрахим.

