Македонија
Хелсиншки комитет реагира на назначувањето нови директори во затворите

Владата на седница одржана на 15 декември го разреши в.д. директорот на Казнено-поправната установа Скопје, Есад Рахиќ, а за нов директор го назначи Филип Андов, советник на премиерот Заев, кој претходно работел како менаџер на локални барови. Во изминатиот период беше разрешен и директорот на Воспитно – поправниот дом „Волковија“ на негово барање, а за нов директор беше назначен Даниел Антовски, кој претходно работел како наставник.
Директорот на установата и неговиот заменик ги именува и разрешува Владата на предлог на директорот на Управата. Потребните услови кои треба да ги исполнува едно лице за да биде назначено за директор или заменик-директор на казнено-поправна установа се таксативно набројани во Законот за извршување на санкциите, а како еден од дополнителните услови е лицето да има најмалку седум години работно искуство, од кои четири години во областа на извршувањето на санкциите или сродни работи.
„Истражувачката репортерска лабараторија Македонија информира дека Филип Андов, кој е назначен за нов директор на КПУ Скопје, претходно бил советник на премиерот Заев за креирање политики кои се од посебен интерес на граѓаните на Град Скопје, додека паралелно тој професионално работел и како стопанственик во бизнис-секторот.
Оттука, се отвора прашањето дали компетенциите на новоизбраните директори одговараат на висината на задачата, а тоа е раководење со една од најголемите казнено-поправни установи и со единствената воспитно-поправна установа во државата. Лицата кои раководат со овие установи мора да имаат претходно искуство во областа на извршувањето на санкциите. Тие мора добро да ја разбираат проблематиката за да ја застапуваат установата, да се грижат за унапредување на правата на притворените и осудените лица, да одлучуваат за нивните погодности и обврски, за нивниот третман и работен ангажман со цел ресоцијализација и нивна понатамошна социјална интеграција во општествениот живот“, се вели во соопштението на Хелсиншкиот комитет за човекови права и Македонското здружение на млади правници.
Во последниот период е нотиран некаков напредок во поглед на подобрување на условите и состојбите во казнено-поправните установи во Република Северна Македонија. Така, реконструирана беше најголемата казнено-поправна установа во државата – Идризово во чии нови нови објекти беа трансферирани голем број осудени лица. Заврши и реконструкцијата на КПУ Битола, со комплетно опремување на просториите во кои престојуваат осудените лица, а беше отворен и новиот објект на Воспитно-поправниот дом во општина Волковија. Покрај ова, не смее да се занемари фактот дека во некои установи сè уште постојат системски проблеми, кои се провлекуваат во оваа област подолг период. Пенитенцијарниот систем сè уште се соочува со големи тешкотии и предизвици, особено во поглед на материјалните услови, здравството, образованието и ресоцијализацијата на осудените лица.
„Години наназад апелираме на потребата да бидат назначени луѓе на раководните позиции во казнено- поправните установи кои не само што имаат експертиза и искуство во затворскиот систем туку се и сензибилизирани за потребата од унапредување и заштита на основните човекови права на осудените и притворените лица. Поставувањето несоодветни кадри е сосема спротивно на ваквите заложби и може да доведе до уназадување, наместо до унапредување на пенитенцијарниот систем во земјава“, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Храброста на нашите колеги е пример за идните генерации“, порачаа од ЕБР на Денот на Единицата

Единицата за брзо распоредување (ЕБР) денеска одбележува 24 години од своето формирање, а припадниците на оваа единица потсетија дека не ги забораваат своите колеги кои го дале животот за безбедноста и мирот на Македонија.
„Додека денес го одбележуваме Денот на Единицата за брзо распоредување и им оддаваме почит на храброста, посветеноста и професионализмот на припадниците на оваа единица, не смееме да ги заборавиме сите оние кои го дадоа својот живот за безбедноста и мирот на нашата татковина“, порачаа од ЕБР преку социјалните мрежи.
Тие додадоа дека жртвата на нивните колеги претставува темел на слободата, а нивната храброст е пример за идните генерации.
„Вечна им слава и почит“, завршуваат од ЕБР во пораката по повод јубилејот.
Македонија
Алиу вети транспарентност, граѓаните ќе знаат кој го помага македонското здравство

Министерството за здравство воведе нов електронски модул за транспарентен преглед на донациите во здравството, со кој јавноста ќе може во секое време да има увид во видот, вредноста и донаторите на пристигнатата помош.
Модулот е достапен на веб-страницата donacii.zdravstvo.gov.mk и овозможува детални информации за секоја донација примена од Министерството или јавните здравствени установи.
Министерот за здравство, Азир Алиу, истакна дека досега се евидентирани над 400 донации, а бројката постојано расте.
„Од самиот модул се гледа дека донациите доаѓаат од широк спектар донатори – од меѓународни институции и организации, држави и хуманитарни фондации. Токму нивната поддршка е клучна потврда за довербата и значењето што го има нашиот здравствен систем“, изјави Алиу.
Податоците покажуваат дека најголемиот дел од донациите, дури 85%, се однесуваат на медицински материјали, меѓу кои лекови, вакцини, апарати и други средства за јавните здравствени установи.
Алиу додаде дека со новиот систем ќе се избегнат ситуации кога во земјата стигнува опрема со различни оперативни системи или апаратура без достапни резервни делови и сервис.
„Со овој модул, испраќаме јасна порака дека во здравството нема скриени процеси и тајни договори, дека секоја донација е видлива, секоја помош е евидентирана, а секој граѓанин има право на информација“, порача министерот.
Македонија
Македонија преживуваше драматичен ден, пожарот во Јасен сè уште под закана

На територијата на Македонија до утрово биле регистрирани вкупно 18 пожари на отворен простор, покажуваат податоците на Центарот за управување со кризи (ЦУК). Од нив, 17 се целосно изгаснати, еден е ставен под контрола, а активни пожари во моментов нема.
Според информациите, единствениот пожар кој сè уште е под надзор, но не е целосно изгаснат, е оној во општина Македонски Брод, во паркот „Јасен“, каде што горела мешана шума. Екипите остануваат на терен за да спречат повторно разгорување.
Во текот на вчерашниот ден и ноќта биле изгаснати серија пожари низ целата држава. Во скопскиот регион беа зафатени повеќе локации: во Сопиште, кај браната „Козјак“, изгоре ниска вегетација и делови од шума, додека во Студеничани пожарот се прошири на планинскиот врв Китка, зафаќајќи мешана шума во близина на селата Горно Количани и Драчевица.
Во југозападниот регион, екипите интервенирле во Кичево, кај селото Душегубица, каде што горела ниска вегетација, а во Охрид во селото Велгошти пожарот зафатил поголема површина од ниска вегетација. Во Кавадарци, кај селото Брушани, гореле тревни површини, додека во Демир Хисар огнот избувнал на депонија во селото Кутретино.
Пожари имало и во Битола, каде што биле зафатени две локации – во месноста Тепсија и во селото Велушта, додека во Новаци, помеѓу Суводол и селото Балдовци, изгорела ниска вегетација. Прилеп и околината исто така беа погодени: во селото Беловодица, на местото викано Ливада, и во селото Лењиште бил зафатен шумски појас со букви, а во друг пожар, во близина на дата-центар во Прилеп, изгореле тревни површини.
Во општина Долнени, кај селата Стровија и Долгаец, бил зафатен простор со мешана шума, додека во Брвеница, во селото Милетино, горела ниска вегетација. Пожар избувнал и во Гостивар, во близина на градската болница, но бил брзо ставен под контрола. Во Врапчиште, кај селото Тумчевиште, и во Чешиново-Облешево, кај објектот „Мак Млин“ каде што гореле ѓубриште и гуми, екипите интервенирале за да спречат ширење.
Истовремено, во струмичкиот регион пожар избувнал кај селата Турново и Иловица, зафаќајќи депонија, но истиот бил изгаснат навреме.
Иако пожарите биле успешно изгаснати или ставени под контрола, надлежните апелираат за внимателност и совесност, бидејќи високите температури и сувата вегетација создаваат услови за нови огнени стихии.