Мобилен тим спречи обид за шверц на 2.220 лека, и тоа: таблети Jardiance од 25 мг – 780 парчиња, инсулин Sanofi Lantus Solostar 100 u/ml – 40 парчиња, таблети Xarelto 15 мг – 728 парчиња и таблети Eliquis 5 мг – 672 парчиња. Случајот е откриен во внатрешноста на државата кај патарината Романовце при контрола на автобус со турски регистарски таблички, кој сообраќал на релација Турција – Косово.

1.100 инсулински игли се откриени од мобилен царински тим при контрола на автобус на влез во државата на граничниот премин Табановце. Во автобусот, кој сообраќал на релација Биелефелд – Струга, пронајдени се и непријавени 57 термомотори и термостати за регулирање подно греење.

183 клучеви за возила и 98 делови и уреди за декодирање клучеви се откриени на Меѓународниот аеродром „Скопје“ во патните торби на државјанка на Косово, која допатувала со лет од Виена.

123 парчиња автоделови се пронајдени под задното седиште и во просторот за резервна гума на комбе со бугарски регистарски таблички, а управувано од македонски државјанин, на влез во државата на граничниот премин Делчево.

Служба за мобилни скенери спречи обид за шверц на седум дела за моторна санка. Делото е откриено на влез во државата на граничниот премин Табановце при контрола на камион со македонски регистарски таблички, во кој биле скриени деловите.

Царински службеници на Меѓународниот аеродром „Скопје“ во багажот на двајца романски државјани, кои имале намера да отпатуваат со лет за Лондон, открија 144 штеки цигари, 960 грама тутун.

48 илјади пара чорапи со вкупна вредност од 442.536 денари, кои не биле опфатени со царинските декларации, се пронајдени при контрола на стока по потекло од Косово, пријавена за увозно царинење во царинската филијала Скопје 3, наменета за увозник од Скопје.

73 парчиња облека и обувки се откриени од страна на Службата за мобилни скенери во патните торби на македонски државјанин при контрола на автобус на граничниот премин Табановце.