Македонија
Царовска-Бабиќ: Македонија и БИХ може да разменуваат искуства во делот на социјалната заштита

Министерката за труд и социјална политика, Мила Царовска, денеска се сретна со амбасадорката на Босна и Херцеговина во Македонија, Лепа Бабиќ. На состанокот тема на разговор беше унапредувањето на соработката меѓу двете земји, но и во целиот регион, на правата од социјалната заштита, како и инклузија на лицата со попреченост и со ретки болести.
„Македонија и Босна и Херцеговина може да разменуваат искуства за различни сфери од секторот социјална заштита и со тоа меѓусебно да се поддржуваат и да си помагаат. Такви иницијативи веќе постојат за црпење искуства за центрите за активно стареење кои во БиХ веќе подолго време одлично функционираат“, истакна министерката Царовска на состанокот.
Амбасадорката Бабиќ најави дека ќе иницира потпишување меморандум за соработка во делот на социјалната заштита, кој треба да придонесе за олеснување и зајакнување на комуникацијата и соработката меѓу институциите и експертите од двете држави.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Пешаците и возачите на велосипеди и тротинети од денес под нови правила: нема слушалки и телефони

Од денес стапуваат во сила измените и дополнувањата на Законот за безбедност на сообраќајот на патиштата.
Републичкиот совет за безбедност на сообраќајот на патиштата потсети дека измените се насочени кон унапредување на безбедноста на најранливите категории учесници и намалување на бројот на сообраќајни незгоди предизвикани од невнимание.
Со новите правила, пешаците ќе мора да преминуваат коловоз и велосипедска патека без користење на слушалки во двете уши, мобилни телефони, таблети, смарт часовници и други уреди кои им го одвлекуваат вниманието.
Исто ограничување важи и за возачите на велосипеди, мопеди, мотоцикли, трицикли и четирицикли, освен ако користат специјализирани комуникациски уреди вградени во заштитни шлемови. Новите одредби ги опфаќаат и возачите на електрични тротинети, на кои им е забрането користење електронски уреди за време на управување.
Советот истакнува дека ваквите измени поставуваат нови стандарди за одговорно однесување во сообраќајот, со цел да се намали ризикот и да се заштитат човечките животи.
„Безбедноста на патиштата е заедничка одговорност на сите нас“, порачуваат.
Според законот, пешаците и возачите на велосипеди, мопеди и електрични тротинети кои користат слушалки на двете уши, телефони и слично при преминување на улица или велосипедска патека ќе бидат казнети со 40, односно 50 евра.
Македонија
Без струја денес повеќе делови од Скопје

Од ЕВН Македонија АД информираат дека во петок, 26 септември 2025 година, повеќе делови од Скопје и околината ќе останат без електрична енергија.
– во периодот од 08.30 до 12.30 часот, корисниците од селата Катланово и Градманци, како и корисниците од викенд населбите Месна Река и Кочкова Населба. (општина Петровец )
– во периодот од 09.00 до 11.30 часот, викендиците лоцирани кон манастирот Свети Илија, како и дел од корисниците од село Бањани. (општина Чучер Сандево )
– во периодот од 09.00 до 12.00 часот, дел од корисниците од улиците Лука Геров и Андон Кецарков. ( општина Ѓорче Петров )
– во периодот од 10.00 до 14.00 часот, корисниците од ул. Смолјани. ( општина Ѓорче Петров )
– во периодот од 11.00 до 12.00 часот, дел од корисниците од улиците Иван Цанкар и Франце Прешерн. ( општина Карпош )
Македонија
До понеделник посвежо време со повремени врнежи, локлно поројни со грмежи и ветер

Времето денес ќе биде променливо облачно и посвежо со повремени врнежи од дожд. Ќе дува умерен до засилен ветер од југоисточен правец. Локално врнежите ќе бидат поројни и пообилни (над 20 l/m²), проследени со појава на грмежи и засилен ветер. Минималната температура ќе биде во интервал од 9 до 18, а максималната ќе достигне од 17 до 24 степени.
Во Скопје, променливо облачно време со повремени врнежи од дожд. Во делови од котлината ќе биде нестабилно со пороен дожд и услови за појава на грмежи. Ќе дува умерен до засилен југоисточен ветер. Минималната температура ќе се спушти до 17, а максималната ќе достигне до 24 степени.
Под влијание на циклонска активност до понеделник времето ќе биде променливо облачно и посвежо со повремени врнежи од дожд. Локално врнежите ќе бидат поројни и пообилни (над 20 l/m²), проследени со грмежи и засилен ветер. Дневната температура ќе опадне за 8 до 10 степени во однос на денешната.